00:00:00 IGIHE NETWORK KN KINYARWANDA EN ENGLISH FR FRANCAIS

Munyenyezi Béatrice yanze gufungirwa muri Gereza ya Nyamagabe

Yanditswe na Prudence Kwizera
Kuya 19 September 2022 saa 10:55
Yasuwe :

Munyenyezi Béatrice ukurikiranyweho ibyaha bya Jenoside yakorewe Abatutsi muri Mata 1994, yanze gufungirwa muri Gereza ya Nyamagabe bitewe n’uko ngo atahabona ibyangombwa birimo amafunguro yihariye ajyanye n’uburwayi afite.

Kwanga gufungirwa i Nyamagabe byatumye yimurirwa muri Gereza ya Nyarugenge izwi nka Mageragere mu Mujyi wa Kigali.

Ni nyuma y’uko yari yarajyanywe gufungirwa i Nyamagabe kugira ngo yoroherwe no kugera i Huye ku rukiko aho aburanira.

Byari biteganyijwe ko aburana kuri uyu wa Mbere tariki ya 19 Nzeri 2022 ku isaha ya Saa Tatu mu Rukiko Rwisumbuye rwa Huye aho asanzwe aburanira ariko ntabwo yagaragaye mu rukiko kuri iyo saha.

Mu rukiko hari abamwunganira mu mategeko ari bo Me Bikotwa Bruce na Me Gashema ndetse n’ubushinjacyaha bwari buhari.

Inteko iburanisha ikimara kugera mu rukiko yavuze ko hari amabaruwa abiri yakiriye arimo iya Gereza ya Mageragere ndetse n’iya Munyenyezi.

Mu ibaruwa Gereza ya Nyarugenge yandikiye Urukiko Rwisumbuye rwa Huye ku wa 18 Nzeri 2022, ivuga ko Munyenyezi yanze kujya gucumbikirwa muri Gereza ya Nyamagabe bityo ko yaburanishwa hifashishijwe ikoranabuhanga kuko bafite imbogamizi z’imodoka yo kumutwara imuvana i Kigali imujyana i Huye.

Hasomwe n’ibaruwa Munyenyezi yandikiye Urukiko Rwisumbuye rwa Huye ku wa 18 Nzeri 2022 avuga ko Gereza ya Nyamagabe itabasha kumuha amafunguro akeneye nk’uko biteganyijwe kandi arwaye.

Yasabye ko yifuza ko yakomeza gufungirwa muri Gereza ya Nyarugenge akajya ajyanywa i Huye kuhaburanira akongera agataha.

Mu rukiko kandi hari abatangabuhamya babiri ari bo Ntasoni Janvier na Nyiraburiri Patricia bari bahamagajwe ngo bajye gutanga ubuhamya muri urwo rubanza nk’abashinjura Munyenyezi. Bose bagiye imbere y’inteko iburanisha hafatwa imyorondoro yabo.

Inteko y’abacamanza mu Rukiko Rwisumbuye rwa Huye ubwo yari itangiye kubaza abunganira Munyenyezi n’ubushinjacyaha icyo bavuga kuri ayo mabaruwa ndetse no ku batangabuhamya, Gereza ya Nyarugenge yoherereje ubutumwa urukiko ivuga ko imodoka yo kumutwara ibonetse bityo ko agiye koherezwa i Huye kuburana.

Inteko iburanisha yagiye kwiherera kugira ngo ifate umwanzuro hamenyekane niba yategereza Munyenyezi cyangwa niba iburanisha ryasubikwa. Yaje kwanzura ko iburanisha rikomeza kuri uyu wa Mbere saa Munani.

Munyenyenzi yaherukaga mu rukiko ku wa 19 Nyakanga 2022 ubwo yari yatangiye kwiregura ku byaha aregwa.

Akurikiranyweho ibyaha birimo icyo kwica n’icya Jenoside, gucura umugambi wo gukora Jenoside, gutegura Jenoside no gushishikariza abantu ku buryo buziguye cyangwa butaziguye gukora Jenoside.

Harimo kandi icyaha cy’ubufatanyacyaha muri Jenoside, icyo kurimbura n’icyibasiye inyoko muntu. Yagejejwe mu Rwanda ku wa 16 Mata 2021 yoherejwe na Leta Zunze Ubumwe za Amerika.

Ibyo byaha Munyenyezi ashinjwa ko yabikoreye muri Komine Ngoma mu yahoze ari Perefegitura ya Butare, ubu ni mu Karere ka Huye.

Munyenyezi Béatrice yanze gufungirwa muri Gereza ya Nyamagabe yimurirwa i Mageragere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .