Munyagishari yasabye kuburana yemera ibyaha bya Jenoside yahakanye mbere

Yanditswe na Rabbi Malo Umucunguzi
Kuya 12 Ugushyingo 2020 saa 11:15
Yasuwe :
0 0

Urukiko rw’Ubujurire rwatangiye kuburanisha mu bujurire urubanza rwa Bernard Munyagishari, uheruka guhamwa n’ibyaha bya Jenoside agakatirwa gufungwa burundu, aho Ubushinjacyaha bwabwiye urukiko ko kuri iyi nshuro yemeye kuburana yemera ibyaha.

Kuri iyi nshuro, iburanisha ryatangiye kuba mu rurimi rw’igifaransa nk’uko byemeranyijweho n’ababuranyi.

Umucamanza yabanje kubaza Ubushinjacyaha, ko ubuheruka hari inyandiko byavuzwe ko bwagombaga gutanga ifitanye isano n’urubanza, ariko bikaba bitarakozwe.

Umushinjacyaha yavuze ko basanze bitakiri ngombwa kubera ko Munyagishari yemeye kuburana mu bujurire yemera ibyaha. Ni mu gihe mu iburanisha mu mizi yabihakanaga, ndetse urwo rubanza rwaburanwe mu Kinyarwanda none ubu ururimi rwahinduwe.

Umucamanza yashatse guha ijambo Munyagishari ku byavuzwe n’Ubushinjacyaha, ariko avuga ko ntacyo yiteguye kuvuga igihe atari hafi y’umwavoka we ku ruhande.

Me Shoshi umwunganira na we yashimangiye ko batifuza kuburana batari kumwe ngo bagende bajya inama, cyane ko muri dosiye nk’iyi hari aho biba ngombwa, ku buryo bikenewe ko baba bari kumwe, haba kuri gereza ya Mageragere aho yimuriwe avanywe i Mpanga cyangwa se ku rukiko.

Nyamara ngo ntabwo byemewe ko abavoka binjira muri gereza muri ibi bihe by’icyorezo cya Coronavirus gikomeje kugaragara mu mfungwa n’abagororwa.

Ubushinjacyaha bwavuze ko nta kibazo babona muri ubwo busabe bwo kuba umuburanyi yaba ari kumwe n’umwavoka we.

Umucamanza ariko yavuze ko nyuma y’uko muri za gereza hagaragaye ubwandu bwa Covid-19 hafashwe ingamba zo kwirinda ko hari abantu bavuye hanze binjiramo, kandi ngo ni ikibazo gikomeye cy’ubuzima umuntu atavuga ko kizakemuka ejo, abaza niba hatashakwa igisubizo cyakwifashishwa urubanza rugakomeza.

Umushinjacyaha yavuze ko hatekerezwa niba nka Munyagishari yahabwa telefoni n’amayinite, akajya ahabwa umwanya wo kwiherera akavugana n’umwavoka we igihe bibaye ngombwa, hakarebwa niba byafasha iburanisha.

Urukiko rwanzuye ko rufata umwanya muto wo kwiherera, rugasuzuma icyemezo cyafatwa ku mpungenge zagaragajwe.

Nyuma yo kwiherera kw’inteko iburanisha, umucamanza yanzuye ko iburanisha risubikwa, rikazasubukurwa ku wa 17 Ugushyingo 2020 saa tatu, umwanzuro ku buryo buzakoreshwa ngo Munyagishari avugane n’umwunganira ukazamenyeshwa ababuranyi binyuze mu ikoranabuhanga rya IECMS.

Ku wa 20 Mata 2017 nibwo Urukiko Rukuru rwahamije Bernard Munyagishari icyaha cya Jenoside, rumukatira gufungwa burundu.

Bernard Munyagishari yoherejwe mu Rwanda n’Urukiko Mpuzamahanga Mpuzamahanga (ICTR) yahamijwe icyaha cya Jenoside, icyaha cyo kwica nk’icyaha cyibasiye inyokomuntu ariko yagizwe umwere ku cyaha cyo gusambanya abagore ku ngufu.

Yasomewe urubanza adahari kuko yari amaze igihe yararwikuyemo, agaragaza ko atemera abavoka yahawe.

Ariko uru rubanza rwasomwe abavoka babiri baruburanaga bahari, ndetse bahita batangaza ko bajuririye iki cyemezo cy’urukiko.

Munyagishari yashinjwaga kugira uruhare muri Jenoside yakorewe Abatutsi mu 1994, ibyaha byibasiye inyoko muntu no gufata abagore ku ngufu. Yafashwe kuwa 25 Gicurasi 2011 muri Repubulika iharanira Demokarasi ya Congo, yoherezwa Arusha kuwa 14 Kamena 2011.

Uyu mugabo wayoboraga MRND ku Gisenyi yagejejwe mu rukiko bwa mbere kuwa 20 Kamena 2011 i Arusha, aza koherezwa kuburanira mu Rwanda kuwa 24 Nyakanga 2013.

Uru rubanza ruri kuburanishwa hifashishijwe ikoranabuhanga kubera ingamba zo kwirinda icyorezo cya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .