00:00:00 IGIHE NETWORK KN KINYARWANDA EN ENGLISH FR FRANCAIS

Muhanga: Abafite ubumuga bwo kutabona bahawe inkoni y’umweru ibafasha kugenda

Yanditswe na Prudence Kwizera
Kuya 17 Ukwakira 2021 saa 07:47
Yasuwe :
0 0

Abagera kuri 50 bafite ubumuga bwo kutabona bo mu Karere ka Muhanga bahawe inkoni y’umweru ibafasha kugenda ndetse borozwa n’ihene kugira ngo bafashwe no mu rugendo rw’iterambere.

Ni igikorwa cyakozwe n’Ishami ry’Ubuvuzi bw’Amaso mu Bitaro bya Kabgayi ku bufatanye n’umuryango CBM/Christian Blind Mission ndetse n’Akarere ka Muhanga, mu rwego rwo kwizihiza Umunsi Mpuzamahanga wo kurwanya Indwara z’amaso.

Umuyobozi wa Serivisi zo kuvura amaso mu Bitaro bya Kabgayi, Dr Tuyisabe Théophile, yavuze ko bababazwa cyane no kuvura umuntu indwara z’amaso akanga gukira, bityo bakaba baratekereje icyo bakora mu rwego rwo gufasha abantu batabona.

Ati “Dutekereza ikintu twakorera wa muntu twavuye indwara z’amaso bikanga, tukamusezerera kuko adashobora kubona. Dusanga rero akeneye kubona inkoni y’umweru imufasha byibuze gutambuka akava aho atuye, niba yicaye mu rugo akaba yabasha kwijyana kwihagarika, akaba yagira n’uturimo akora mu rugo yifashishije ya nkoni.”

Yakomeje avuga ko bibabaje kuko kugeza ubu inkoni z’umweru zifasha abatabona kugenda zidashobora kugurwa hakoreshejwe ubwishingizi.

Ati “Icyo gihe rero wa muturage udafite ubushobozi aba abangamiwe no kuba yayibona. Twakoresheje uko dushoboye tubasha gushakira abantu 50 inkoni n’ihene zo korora kugira ngo babashe no kwiteza imbere.”

Kugeza ubu inkoni y’umweru imwe igura amafaranga agera mu bihumbi 20 Frw.

Bamwe mu bafite ubumuga bwo kutabona bahawe inkoni y’umweru, bavuze ko bishimiye ko bagiye kujya babasha gutambuka no gukora imirimo yo mu rugo yoroheje. Bishimira kandi ihene bahawe bakemeza ko ari itungo ritazabagora korora.

Ndagijimana Emmanuel ati “Kuba bampaye inkoni y’umweru ndabyishimiye cyane kuko sibanashaka gutambuka, ngiye kujya ntambuka nkore uturimo mu rugo kandi n’iyi hene bampaye nzabasha kuyitaho kuko ni itungo ritagoye, nzayifata neza inteze imbere.”

Utabazi Dominique na we yavuze ko yigeze kugira inkoni y’umweru ariko ayiha umugore we kuko na we afite ubumuga bwo kutabona.

Ati “Inkoni y’umweru nigeze kuyigira ariko nyiha umugore wanjye kuko na we atabona, njyewe nkajya nkoresha ikibando, ubu rero biranshimishije kuba nyibonye. Ubu noneho ngiye kujya mbasha kugenda. Iyi hene nayo igiye kumfasha kwiteza imbere impa ifumbire kandi n’ibyara nzakuramo isabune n’umunyu.”

Abo bafite ubumuga bahawe ihene bishimira ko banahuguwe ku korora amatungo magufi ku buryo bitazabagora.

Mu Karere ka Muhanga nta mibare ihamye igaragaza abakeneye inkoni y’umweru, ariko ubuyobozi bw’Ibitaro bya Kabgayi buvuga ko hari gukorwa ubuvugizi ngo ziyongere kandi zijye zigurwa hakoreshejwe ubwishingizi kugira ngo byorohere abaturage bazikeneye.

Abafite ubumuga bwo kutabona bavuze ko bishimiye ko bagiye kujya babasha gutambuka no gukora imirimo yo mu rugo yoroheje
Bishimiye ko ihene bahawe zizabafasha kwiteza imbere
Guhabwa inkoni yera byahuriranye no kwizihiza Umunsi Mpuzamahanga wo kurwanya Indwara z'amaso
Abahawe inkoni yera muri Muhanga ni 50

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .