00:00:00 IGIHE NETWORK KN KINYARWANDA EN ENGLISH FR FRANCAIS

Mu Rwanda hatangijwe ihuriro ku ruhare rw’ibiribwa mu kurwanya imirire mibi

Yanditswe na Akayezu Jean de Dieu
Kuya 21 Ukuboza 2022 saa 01:48
Yasuwe :

Umuyobozi Mukuru w’Ikigo gishinzwe Imikurire no kurengera umwana, Nadine Umutoni Gatsinzi asanga abikorera by’umwihariko abashoye imari mu buhinzi n’ubworozi bafite uruhare rukomeye mu gufasha leta mu rugamba rwo kurwanya imirire mibi n’igwingira ry’abana.

Ni ibitangazwa mu gihe mu Rwanda haherutse gutangizwa ihuriro ry’abaharanira ukwihaza mu biribwa no kurwanya imirire mibi rizwi nka SUN [Scaling Up Nutrition Business Network].

Ni urubuga abikorera bahuriramo bakarebera hamwe ibyo bashobora gukora kugira ngo ibihugu byihaze mu biribwa, ndetse n’abo bashobora gufatanya muri uru rugamba ndetse n’uruhare rwa buri wese by’umwihariko.

Ni uburyo busanzwe henshi ku isi, bukaba buyoborwa n’umwe mu bungirije Umunyamabanga Mukuru w’Umuryango w’Abibumbye. U Rwanda kuva mu mwaka wa 2012 nibwo rwagiye muri iyo gahunda bise SUN-Mouvement.

Umuyobozi Mukuru w’Ikigo gishinzwe Imikurire no kurengera umwana, Nadine Umutoni Gatsinzi, avuga ko u Rwanda rwagiye muri iryo huriro kugira ngo abakora mu rwego rw’ubuhinzi no kuzamura agaciro k’ibibukomokaho bigire kuri bagenzi babo.

Yavuze ko abakora mu nzego z’ubuhinzi barebeye hamwe uko ibyo bakora byagirira mbere na mbere akamaro abo mu gace bakoreramo izo business.

Ati “Abakora izi business bareba niba batakongerera agaciro ibiva mu buhinzi bwabo k’uburyo bifasha abatuye hafi aho, urugero twabonye ni nka rwiyemezamirimo wongereye agaciro ibijumba by’umuhondo. Murabizi ko hari na Shisha Kibondo itangwa na Leta ariko murabizi ko atari byo byonyine byatangwa.”

Mu gihe kiri imbere kandi ngo hari ba rwiyemezamirimo bashaka kujya batangira gusya amagi bakayakoramo ifu izongera imirire myiza, abandi nabo ngo basya amafi cyangwa indagara kandi byose ni ibintu bizafasha Leta kugabanya imirire nkene mu baturage.

Umutoni avuga ko bizafasha gahunda Leta y’u Rwanda gukomeza guhangana n’igwingira mu bana kuko kugeza ubu ringana na 33% ku bana bose b’u Rwanda.

Rwiyemezamirimo Diègo Twahirwa avuga ko bashima imikoranire yatangijwe hagati ya ba rwiyemezamirimo bakora mu rwego rw’ubuhinzi. Asanzwe yohereza hanze ibikomoka ku buhinzi birimo n’urusenda.

Twahirwa avuga ko intego y’abikorera ku giti cyabo mu ishami ry’ibituruka ku buhinzi, ari ugutuma umusaruro uboneka ari mwinshi kandi udahenze.

Ati “Turi gukora k’uburyo tubanza guhaza isoko ry’imbere mbere yo koherereza amasoko yo hanze. Icy’ingenzi ni uguharanira ko ibiribwa byose bigera ku muguzi bimeze neza, byarasuzumwe ubuziranenge.”

Yavuze ko ibigo bishinzwe gusuzuma ubuziranenge byagombye kujya bisuzuma ibintu byose bifite aho bihuriye n’ibiribwa harimo n’imiti iterwa ibihingwa kugira ngo umuguzi azabone ibiribwa bimeze neza.

Nawe avuga ko kugira ngo abikorera ku giti cyabo bashobore gufasha Leta kugera ku ntego yo kugabanya igwingira mu bana by’umwihariko no kugabanya imirire mibi mu Banyarwanda ari ngombwa ko bongerera agaciro ibikomoka k’ubuhinzi.

Umuyobozi wungirije w’Ishami ry’Umuryango w’Abibumbye rishinzwe ibiribwa, World Food Program, Ahmareen Karim ashima ko u Rwanda rukora uko rushoboye ngo abarutuye bihaze mu biribwa.

Avuga ko ibyo rukora bigamije gutuma ejo hazaza habazaba barutuye hazaba heza kuko ruzaba rufite abantu bakuze barya neza. Yemeza ko gahunda yo kugaburira abana ku ishuri ari ingenzi mu kugabanya ibibazo bagirira ku ishuri.

Inzego zose ziyemeje gufatanya mu guteza imbere imirire myiza binyuze mu kongera ibiribwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .