Mu Rwanda hari amoko arenga 53 y’ibikeri ashobora kugira uruhare mu iterambere ry’igihugu-Ubushakashatsi

Yanditswe na Iradukunda Regis
Kuya 16 Nyakanga 2020 saa 02:45
Yasuwe :
0 0

Kuva mu 2018, ubushashakashatsi bumaze kugaragaza ko mu Rwanda hari amoko atandukanye y’ibikeri biba ahantu hatandukanye, kandi hari uruhare bigira mu iterambere ry’igihugu bityo ko bikwiriye kubungabungwa.

Umushakashatsi w’Umunyarwanda ku rusobe rw’ibinyabuzima, Mapendo Mindje akaba n’umwarimu muri Kaminuza y’u Rwanda, yavuze ko yakoze ubushakashatsi ku moko y’ibikeri abona ko mu Rwanda hagaragara amoko agera kuri 4 y’ibikeri binini ari byo byitwa Nyamabondo, amoko 49 y’imitubu ndetse n’ubundi bwoko na bwo bushyirwa mu itsinda ry’ibikeri bwitwa cecilian.

Avuga ko ayo moko yose atandukanywa n’amajwi yayo, aho aba, amabara ndetse n’imiterere y’uruhu rwayo.

Ubushakashatsi bwe avuga ko ari bwo bwa mbere bukozwe mu Rwanda, yabukoreye mu bishanga nka Mugesera mu burasirazuba bw’u Rwanda, Rugeramigozi ho mu Majyepfo ndetse n’ibindi bishanga bigera kuri 14 byo mu Mujyi wa Kigali.

Avuga ko bibanda cyane ku biba mu bishanga kuko baba bashaka guhuza amakuru y’ibihatuye n’imiterere y’ibyo bishanga.

Avuga kandi ko muri ubwo bushakashatsi yaje kuvumbura ko hari ubwoko butatu bw’ibikeri bwihariye ku Rwanda gusa utasanga ahandi. Harimo ubwitwa Hyperolius jackie, Hyperolius rwandae ndetse n’ubwitwa cecilian bwasanzwe mu ishyamba rya Cyamudongo mu Majyepfo y’u Rwanda. Umwihariko w’ibi bikeri akaba ari uko utabisanga ahandi ku isi.

Ni ubushakashatsi bwibanze ku kugaragaza amoko y’ibikeri biri mu Rwanda ndetse n’umumaro wabyo ku baturage n’ibidukikije.

Ku bijyanye n’umumaro wabyo Mapendo Mindje yagize ati, “Ibikeri mu by’ukuri bimenyekanisha imihindagurikire n’umwimerere w’igishanga. Mu gihe cyo gushora amafaranga menshi mu kugura ibikoresho byifashishwa, dushobora kwifashisha ibikeri tukabona amakuru yose dukeneye ku bishanga.”

Yongeraho ko ibikeri birya udukoko duto, bityo bikagabanya umubare w’utwashoboraga kwangiza ibihingwa n’ibindi bimera, abahinzi bakabona umusaruro.

Avuga ko ibikeri bigira uruhare mu bukerarugendo mu buryo abantu badapfa kumenya.

Ati “Ibikeri ni ibiribwa bikomeye ku nyoni nini. Hari inyoni zirira ibikeri kandi zikaba zikurura ba mukerarugendo nk’izo mu gishanga cya Nyandungu, Kamiranzovu, ibishanga by’Akagera… Haramutse hatakiba ibikeri rero, tubona ko izi nyoni zishobora guhunga cyangwa zikazimira. Icyo gihe byahombya igihugu byinshi.”

Mapendo Mindje avuga ko uretse kuba igikeri cyakwifashishwa muri ibi, gishobora no kwifashishwa mu kuvura n’ubwo bitaragera mu Rwanda.

Ati “Ikindi ubushakashatsi bwakozwe n’Abadage mbere yacu, bugaragaza ko ya matembabuzi yabyo cyangwa se ubumara, bikorwamo imiti y’ibisebe, amasununu aza ku mubiri ndetse n’ibindi. Ibyo twe mu Rwanda ntiturabigeraho gusa ubushakashatsi twarabutangiye. ”

Yongeraho ko hari n’igikeri cyitwa “Xenopus victorianus” kiboneka no mu Rwanda cyifashishwa mu gusuzuma niba umugore atwite.

Mu ku bibungabunga, Mapendo Mindje avuga ko umuntu wese akwiriye kumva ko uko abangamirwa ari na ko n’ibindi binyabuzima bibangamirwa kandi kuko byo bitabasha kwivuganira, abantu bagomba kubibera abavugizi.

Ati “Twirinde kubangamira ikinyabuzima icyo ari cyo cyose, kuva ku gito kugeza ku kinini kubera ko buri kimwe gifite umwihariko mu iterambere rya muntu n’ibidukikije muri rusange.”

Iby’ubushakashatsi ku bikeri byaherukaga kugarukwaho na Perezida w’u Rwanda Paul Kagame mu 2017, mu nama yari yahuje inteko rusange ya FPR Inkotanyi, ubwo yasabaga umushakashatsi witwa Dr Niyikiza Clet kumumenyera impamvu igikeri uko wakijugunya kose kigwa kikureba.

Ku isi yose ubu habarurwa amoko y’ibikeri arenga 8000.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .