00:00:00 IGIHE NETWORK KN KINYARWANDA EN ENGLISH FR FRANCAIS

Mu Rwanda hagiye kuzura uruganda rw’amata y’ifu ruzatwara miliyari 45Frw

Yanditswe na Hakizimana Jean Paul
Kuya 21 Mutarama 2023 saa 08:37
Yasuwe :

Hashize imyaka ibiri Abanyarwanda batangiye kumva umushinga w’uruganda rw’amata y’ifu uhuriweho na Leta y’u Rwanda ifatanyije n’uruganda rwa Inyange Industries, aho ruzajya rwakira litiro ibihumbi 500 z’amata buri munsi.

Ni uruganda rwatangiye kubakwa mu Ukwakira 2021 rwubatswe mu Murenge wa Nyagatare mu cyanya cyahariwe inganda cya Rutaraka, ruzuzura rutwaye miliyari 45 Frw , bikaba byitezwe ko ruzakusanya amata aturuka mu turere twa Nyagatare, Gatsibo, Kayonza na Kirehe nka tumwe mu tubarizwamo umukamo uri hejuru muri iyi Ntara.

Uyu mushinga uhuriweho n’abashoramari babiri barimo Leta y’u Rwanda ndetse n’uruganda rwa Inyange Industries Ltd rusanzwe rumenyerewe mu gutunganya ibinyobwa bidasembuye.

Urebye amata uru ruganda ruzakenera angana na litiro ibihumbi 500 ku munsi, ukanagereranya n’umusaruro wa litiro ibihumbi 133 w’amata ari kuboneka mu Burasirazuba uyu munsi, usanga hakirimo intera ndende yo kugera kuri uyu mukamo wifuzwa.

Intara y’Iburasirazuba ibarizwamo inka ibihumbi 514 zibarizwa mu nzuri ibihumbi icumi, mu gihe cy’imvura baboneka umukamo ungana na litiro ibihumbi 133 z’amata ku munsi naho mu mpeshyi hakaboneka litiro ibihumbi 44.

Abayobozi bavuga ko nibura buri mworozi ashyizemo imbaraga akorora inka zitanga umukamo, bagatera ubwatsi nkuko bikwiriye, bakaziha amazi n’ibindi nkenerwa byose nibura ngo babona umukamo ungana na litiro miliyoni ebyiri ku munsi ariko ibi biracyari mu nzozi no mu mpuro!

Kuri ubu hari gushyirwa imbaraga mu gufasha aborozi kujya kwigira ku bororera mu biraro uko babikora, Leta kandi iri kongera imbaraga mu kwegereza ibikorwaremezo aborozi kugira ngo uruganda rugiye kuzura ruzasange aborozi bariteguye neza rutazabura amata rukeneye.

IGIHE yaganiriye n’Umuyobozi Mukuru wa Inyange Industries Ltd, Biseruka James, ku mpamvu bahisemo gushora mu kubaka uruganda rw’amata y’ifu mu Burasirazuba, icyo bizafasha aborozi n’ingamba bafite mu gufasha aborozi kubona umukamo mwinshi kandi mwiza.

IGIHE: Mwatangiye kubaka uruganda rw’amata y’ifu mu 2021, imirimo igeze he?

Biseruka: Twatangiye gushyiramo imashini kuko izo twashakaga zose zarahageze, ubu abatekinisiye bari kuzishyiramo bazifunga neza, turateganya ko nko mu mpera za Werurwe gushyiramo imashini byaba birangiye, tugatangira kwakira amata no gukora.

IGIHE: Uru ruganda nirwuzura muzakenera litiro zingahe z’amata ku munsi?

Biseruka: Ruriya ruganda ruzakenera Litiro ibihumbi 650 buri munsi, harimo litiro ibihumbi 500 byo gukoramo amata y’ifu ndetse hari n’andi mata tuzakira litiro ibihumbi 150 yo gukora ibindi dusanzwe dukora kuko turashaka kwagura ubushobozi dufite kuko ku isoko twari tumaze gukenera amata menshi arenze ubushobozi dusanganywe.

Rero tuzongeraho igice cyo gutunganya ibindi binyobwa bidasembuye dusanzwe dukora kuburyo Inyange Industries ishobora no kuzakenera amata hafi litiro miliyoni imwe ku munsi.

IGIHE: Inyange iri gufasha iki aborozi ngo babashe kubona umukamo wifuzwa?

Biseruka: Twagerageje kwegera aborozi nk’ubu ufashe mu Burasirazuba tumaze gusinyana amasezerano n’aborozi 566 kugira ngo baduhe amata yabo, twafashe aborozi ba mbere bagemura amata menshi.

Impamvu rero twahisemo abo borozi bagemura amata menshi nibura kugera kuri litiro 50 ku munsi, twabahaye amasezerano, dufite ikipe yacu izabegera kugira ngo turebe n’iki bakeneye. Umworozi ku wundi tuzareba icyo buri wese akeneye kugira ngo inka ze zibashe kumuha nibura litiro 500 z’amata buri munsi.

Nitumara gufasha abo borozi b’intangarugero abandi borozi bose bazabigiraho ndetse tunakomeze dufashe n’abandi, dufite ikipe yacu izaba iri mu baturage umunsi ku munsi ifasha aborozi mu kubazamurira imyumvire y’uburyo bakora ubworozi bwunguka, bazabafasha mu gutera ubwatsi, guhitamo inka zitanga umukamo mwiza n’ibindi byinshi.

Icyo twifuza ni uko umworozi yorora mu buryo bwa kinyamwuga akabona amafaranga ku mufuka we aturuka ku mukamo w’inka ze.

IGIHE: Inyungu y’uruganda rw’amata y’ifu muri kubaka ni iyihe ku mworozi?

Biseruka: Ruriya ruganda rufite inyungu nini ndetse si nuko ruzakora mu Burasirazuba gusa kuko turashaka no gukora ibikorwa nk’ibi hafi ya Gishwati, Gicumbi no mu zindi Ntara zose.

Inyungu ya mbere rero ku mworozi, ruriya ruganda nirutangira kwakira amata nibura angana na litiro miliyoni imwe buri munsi bingana na miliyari 9 Frw ku kwezi, ni amafaranga azajya ajya mu borozi mu baturage bacu bibahindurire ubuzima.

Icya kabiri aya mata y’ifu tugiye gukora hari isoko rinini ku rwego mpuzamahanga hafi ya 90% tuzayajyana hanze y’igihugu, urumva amadovize azinjira mu gihugu, izaba ari inyungu nini cyane yaba ku gihugu, ku borozi n’abenegihugu bose muri rusange kuko hari amafaranga menshi azajya yinjira atembere mu borozi.

Ikindi bizafasha aborozi korora neza baziko bafite isoko rihoraho bitandukanye no korora bashakisha amasoko, bazaba bafite isoko rinini kandi ribafitiye umumaro.

IGIHE: Ni iki wabwira aborozi muri iki gihe bahanze amaso isoko ryanyu?

Biseruka: Ikintu nabwira umworozi ni uko ari amahirwe twabonye urebye ku Isi hose ubundi aborozi b’inka z’umukamo nibo bantu bakize cyane ugiye kureba mu bihugu nka New Zealand, Afurika y’Epfo, u Buholandi n’ahandi henshi.

Ni amahirwe rero babonye, ni ubukire kuba aborozi bacu bagiye korora bafite isoko rihoraho ni bumve ko bagiye gutera imbere, bafite ubutaka nibazamure umukamo w’inka zabo bahindure icyororo batere ubwatsi babone amata meza ubundi natwe tubahe amafaranga betere imbere.

Imishinga Leta igiye gukorera mu Burasirazuba mu guteza imbere ubworozi

Umuyobozi Mukuru wa RAB wungirije ushinzwe ubworozi, Dr Uwituze Solange avuga ko muri uyu mwaka ugiye kuza ndetse n’indi iri imbere hari imishinga mini igamije gutera imbere ubworozi Leta yazaniye aborozi bo mu Burasirazuba.

Dr Uwituze yavuze ko guhera muri uku kwezi kwa Mutarama hari miliyoni 300 Frw zizagura imashini zikata ubwatsi 10 mu mushinga wa RDDP, izo zikiyongera no ku bindi bikorwa bitandukanye biri mu turere.

Ati “ Amakoperative azajya yitanga 50% ndetse andi 50% yuganirwe n’umushinga, hariho kandi miliyoni 700 Frw zo kuzatanga damsheet zo gufata amazi, bigaragara ko aborozi 700 bo muri Kayonza, Gatsibo na Nyagatare nibihuta bazazifataho kugira ngo tubashe gufata amazi yo mu gihembwe cya B.”

Yakomeje avuga ko kandi hari miliyoni 300 Frw zo kunganira ku kugura imodoka zitwara amazi mu borozi uyu mushinga ngo ukazunganira aborozi kuri 70% noneho aborozi bakishakira 30%, yagaragaje ko uyu mushinga nawo uje ugamije gufasha aborozi gutera imbere.

Dr Uwituze kandi yakomeje avuga ko hagiye kubakwa ubwogero bw’inka 10 uyu mushinga ukazaterwa inkunga 100% nta ruhare rw’aborozi rugiyemo.

KWIIP ya kabiri ikorera mu mirenge icyenda yo mu Karere ka Kayonza ufite ingengo y’imari ya miliyari 6 Frw nayo ni undi mushinga ugiye gufasha aborozi.

Yavuze ko uzatera inkunga ibikorwa byinshi by’ubworozi mu burasirazuba asaba aborozi kuzayakoresha neza cyane cyane mu gice kijyanye no gushinganisha ubworozi bwabo kuko bazabibafashamo.

Uruganda rwa Inyange Indutries Ltd rusanzwe rumenyerewe mu gukora rukanacuruza ibinyobwa binyuranye birimo amata,amazi, imitobe,y’imbuto zitandukanye zirimo imyembe, pomme n’izindi nyinshi zitandukanye.

Uruganda rw'amata y'ifu ruzuzura rutwaye miliyari 45Frw
Umuyobozi Mukuru w'uruganda rwa Inyange Industries Ltd, Biseruka James yavuze ko uruganda rw'amata y'ifu rushobora gutangira gukora mu mpera za Werurwe 2023
Umuyobozi Mukuru wungirije wa RAB, ushinzwe ubworozi, Dr Uwituze Solange avuga ko Intara y'Iburasirazuba ifite imishinga myinshi igamije gufasha aborozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .