Mu basaga 1000 bahuye n’abanduye COVID-19 mu Rwanda, 900 bamaze gukurikiranwa

Yanditswe na IGIHE
Kuya 26 Werurwe 2020 saa 07:59
Yasuwe :
0 0

Minisitiri w’Ubuzima, Dr Ngamije Daniel, yatangaje ko abantu 41 bamaze kugaragaraho COVID-19 iterwa na Coronavirus mu Rwanda bahuye n’abandi basaga igihumbi, icyakora abarenga 900 bamaze gukurikiranwa.

Minisitiri Ngamije yavuze ko bazakomeza gushyira ingufu mu gukurikirana abakekwaho kuba barahuye n’abarwayi ba Coronavirus.

Mu butumwa yanyujije kuri Radio Rwanda, Minisitiri Ngamije yijeje ko aho abarwayi barwariye ntawe urembye kandi bari kwitabwaho. Yavuze ko buri murwayi afite icyumba cye cyiza kandi agaburirwa neza.

Yasabye abantu kudacika intege bumva ko byacitse mu gihe hari ababonetseho Coronavirus. Ati "Ni ibisanzwe mu gukurikirana indwara nk’iyi."

Minisitiri w’Ubuzima, Dr Ngamije Daniel, aheruka gutangaza ko umurwayi wa mbere n’umufasha we bagaragaweho na COVID-19 bashobora gutaha vuba.

Yagize ati “Turizera ko mu mpera z’iki cyumweru turimo, umurwayi wa mbere n’umufasha we kuko bari hamwe tugomba kubarekura cyane ko nta kibazo bafite, ubu bameze neza ariko dutegereje gusa ko iminsi bagenewe igera tukabasuzuma tukamenya ko nta bwandu bagifite mu mubiri, tukabarekura bagataha kuko bameze neza.”

Ibimenyetso bya Coronavirus birimo kugira umuriro, ibicurane, umunaniro n’inkorora ijyana no kubabara mu mihogo, guhumeka nabi bishobora no kugera aho itera umusonga no kubuza impyiko gukora bishobora gutera urupfu. Iyi ndwara ishobora kwandura binyuze mu gukora ku muntu uyirwaye, cyane cyane mu kuramukanya abantu bahana ibiganza.

Abaturarwanda basabwe gukomeza kwitwararika, bakurikiza amabwiriza y’inzego z’ubuzima hibandwa cyane cyane ku gukaraba intoki, kwirinda kujya ahantu hateraniye abantu benshi n’ingendo zitari ngombwa.

U Rwanda rwafashe ingamba zirimo gufunga amashuri, insengero n’ibikorwa bihuza abantu benshi, abakozi bo mu nzego za leta n’iz’abikorera basabwa gukorera mu ngo ndetse abaturage bategekwa kudakora ingendo zidakenewe mu gukumira ikwirakwira rya Coronavirus.

Gukaraba intoki neza ni bumwe mu buryo bwiza bwo kwirinda Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza