Abanyarwanda 40% bazaba batekesha gaz mu myaka icumi iri imbere

Yanditswe na Bukuru JC
Kuya 25 Ukwakira 2020 saa 09:47
Yasuwe :
0 0

Sosiyete y’u Rwanda Ishinzwe Ingufu (REG) ivuga ko Abanyarwanda bagenda barushaho kwitabira gukoresha gaz mu guteka, ndetse ko bizagera mu 2030 abagera kuri 40% barayobotse ubu buryo bw’ingufu butangiza ibidukikije.

Gaz yatangiye gukoreshwa mu Rwanda mu myaka ya 2009, ariko bizamuka cyane mu 2012, aho byiyongereye ku kigero cya 25%. Kuva mu 2012 kugeza 2020, ubwitabire bumaze kwiyongeraho ibirenga 50%.

Umukozi muri REG/EDCL Ushinzwe Ubukangurambaga ku mikoreshereze ya Gaz, Issa Karera, yavuze ko abatuye mu bice by’imijyi bakigize umubare munini w’abakoresha gaz, akemeza ko no mu cyaro imyumvire igenda izamuka.

Ati “Abaturage bo mijyi nibo bitabira gukoresha gaz cyane, ariko no mu cyaro bagenda bitabira buhoro buhoro biciye mu bukangurambaga bukorwa na REG ku bufatanye n’izindi nzego za Leta.”

Kuva gaz yatangira gukoreshwa mu Rwanda, Karera yavuze ko yafashije cyane mu kugabanya ingano y’ibindi bicanwa byakoreshwaga nk’inkwi n’amakara.

Ati “Mu rwego rw’ingufu, gaz irafasha cyane kuko ni ubwoko bw’ingufu bwisumbuye ku nkwi n’amakara kandi busukuye. Birumvikana kandi iyo uvuye ku makara n’inkwi ugakoresha gaz, hari ingano y’inkwi n’amakara biba bigabanyutse cyangwa ibiti birengewe byari gutemwa.”

“Amakara n’inkwi byatekeshwagwa byaragabanyutse n’ubwo nta bushakashatsi bwihariye bwari bwakorwa kuri iryo gabanuka.”

Yavuze ko hari n’inzego za Leta zitabiriye gukoresha gaz zirimo Polisi y’Igihugu n’amashuli yisumbuye atandukanye, ibintu byatumye ingano y’inkwi zikoreshwa igabanuka.

Kugeza ubu hari byinshi byamaze gukorwa kugira ngo abaturage babashe kubona iyi gaz ku giciro kitari hejuru, birimo ikurwaho ry’umusoro ku nyongeragaciro (TVA), ndetse REG yagiye ihuza abaturage n’abacuruzi ba gaz, ikanabakorera ubuvugizi kugira ngo bahabwe gaz bazagenda bishyura gahoro gahoro.

Karera avuga ko hari ubushakashatsi buri gukorwa ku buryo mu minsi iri imbere abanyarwanda bazajya babasha kubona gaz yo gutekesha iturutse mu Kiyaga cya Kivu, batarindiriye kuyikura hanze nk’uko uyu munsi bimeze.

Ati “Hari kandi n’ubushakashatsi buri gukorwa ngo twibonere gaz yacu mu kiyaga cya Kivu, ariko mu gihe Rwanda rutaracukura gazi yarwo, Leta ikomeje gufatanya n’ibindi bihugu bituranyi kurebera hamwe uburyo bwose bwakoroshya ikiguzi cy’ubwikorezi. Mu 2030 abaturage barenga 40% bazaba bakoresha gaz mu gihugu hose.”

Imibare yo mu 2019 igaragaza ko abakoreshaga inkwi bari hafi 80% naho amakara bakaba 17.4%. Gusa REG yari ifite gahunda ko kugera mu 2024 abakoresha inkwi bageze kuri 42%, mu gihe amakara yo yazajya akoreshwa gusa ku byo gaz idakora.

Impamvu y’icibwa ry’ibi bicanwa bindi ni ukubera ingaruka bigira ku ihumana ry’ikirere ndetse n’ubuzima bw’ababikoresha. Imibare igaragaza ko ihumana ry’umwuka rifite ingaruka zikomeye ku buzima bw’abatuye Isi.

Mu mwaka wa 2016 honyine, abantu basaga miliyoni esheshatu n’ibihumbi ijana bapfuye bazize indwara zifitanye isano no guhumeka umwuka wanduye hirya no hino ku Isi, nk’uko bigaragazwa na Raporo ya 2018 yerekeye ihumana ry’umwuka ku Isi.

Mu Rwanda abantu 2,227 bapfuye bazize indwara zifitanye isano no guhumeka umwuka uhumanye mu 2012 wonyine, kandi imibare y’abarwayi bivuza indwara z’ubuhumekero ikomeza kuzamuka kuko yavuye ku bantu 1,682,321 muri uwo mwaka ikagera kuri 3,331,300 mu 2015.

Mu 2030 abanyarwanda 40% bazaba bakoresha gaz mu guteka
Ibigo bimwe by'amashuri byatangiye gutekesha gaz

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .