MTN na Polisi mu bukangurambaga bwo gushishikariza Abanyarwanda kubahiriza amategeko y’umuhanda

Yanditswe na IGIHE
Kuya 10 Ugushyingo 2019 saa 12:24
Yasuwe :
0 0

Polisi y’u Rwanda n’ikigo cy’itumanaho cya MTN Rwanda, batangije ubufatanye mu bukangurambaga bwa Gerayo Amahoro, bashishikariza abashoferi n’abakoresha umuhanda kwirinda gukoresha telefone igihe batwaye, ndetse abagenzi bakangurirwa kwirinda kwambuka umuhanda barangaye.

Ni ubufatanye buzamara uku kwezi kose. Iyi gahunda yatangijwe ku wa Gatanu hirya no hino ahategerwa imodoka, izibanda ku kurwanya impanuka zo mu muhanda by’umwihariko iziterwa n’uburangare buturuka ku gukoresha telefoni.

Umuvugizi wa Polisi y’u Rwanda CP Kabera yasabye abakoresha umuhanda bose ari abanyamaguru ndetse n’abatwara ibinyabiziga, ko umutekano wo mu muhanda bawugira umuco.

Ati "Abanyamaguru mujye mugendera mu gice cy’ibumoso bw’umuhanda, nimujya kwambuka mujye mubanza kureba ibumoso n’iburyo ko nta kinyabiziga kije. Igihe muri ahari ya mirongo ibaha uburenganzira bwo kwambuka, mujye mwambuka mwihuta kandi mutarangariye ku matelefoni, mwambuke mwitonze, mutiruka. Abashoferi namwe mugomba kujya mwubaha uburenganzira bw’abanyamaguru.”

CP Kabera yakomeje avuga ko abashoferi batwara barangariye kuri telefoni baba bafite ibyago byo gukora impanuka bikubye inshuro enye ugereranyije n’impanuka zaturuka ku zindi mpamvu.

Avuga ko yizeye ko muri iki gihe cy’ukwezi kose Polisi igiye gukorana na MTN-Rwanda hari byinshi bizahinduka.

Ati “Abaturage turabasaba kujya munaduha amakuru ku kintu cyose mubonye gishobora guteza impanuka cyane cyane ku myitwarire y’abashoferi.”

Kazungu Fidèle wari uhagarariye MTN Rwanda akaba anashinzwe kurwanya ibiza muri iki kigo, yagaragarije abashoferi ko biteye agahinda kubona umushoferi afata icyemezo cyo kwitaba umuntu umwe kuri telefoni agahitana abantu bose atwaye.

Ati ”Turabasaba kwirinda gukoresha telefoni mu buryo ubwo aribwo bwose igihe mutwaye ibinyabiziga. Mubyirinde kandi mubikore nk’ibintu bibarimo, bibe umuco aho kubikorera gutinya amategeko.”

Mu ntara y’Iburengerazuba iki gikorwa cyabereye muri Gare ya Karongi.

Guverineri w’Intara y’Iburengerazuba, Munyantwari Alphonse, yavuze ko iyi gahunda ireba abakoresha umuhanda bose by’umwihariko, asaba abatwara amagare n’abanyamaguru kuyitabira kuko bo baba batazi amategeko y’umuhanda.

Mu ntara y’Amajyaruguru naho, ubu bukangurambaga bwabereye muri Gare ya Musanze, aho abayobozi batandukanye batanze ubutumwa bukangurira abakoresha umuhanda kwirinda gukoresha telefoni mu gihe barimo kugenda.

Imibare ya polisi y’u Rwanda igaragaza ko mu mwaka ushize wa 2018 habaye impanuka zibarirwa mu bihumbi bitanu, ibihumbi bibiri muri zo zaturutse kuri bamwe mu bashoferi bagendaga bakoresha telefoni.

Umuyobozi mu Rwego Ngenzuramikorere, RURA, Anthony Kulamba atanga ubutumwa ku bagenzi n'abashoferi
Guverineri w'Intara y'Iburengerazuba Munyantwari Alphonse mu gutangiza iki gikorwa muri iyo ntara
Ubwo hatangizwaga ubu bukangurambaga ku rwego rw'igihugu muri Gare yo mu mujyi wa Kigali, ahazwi nka Dowtown
I Musanze abaturage bari bitwaje ibyapa bya Gerayo Amahoro
Umuvugizi wa Polisi CP Kabera hamwe n'umukozi wa MTN Rwanda bashyira ibyapa ku modoka
CP Kabera yashishikarije abagenzi kwambuka umuhanda babanje gushishoza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza