Mpayimana yikomye agasuzuguro k’abayobozi birukanwa ku mirimo bagahinduka ‘ibipinga’

Yanditswe na Rabbi Malo Umucunguzi
Kuya 2 Ugushyingo 2019 saa 08:15
Yasuwe :
0 0

Umunyapolitiki wigenga Mpayimana Philippe yikomye abanyapolitiki bifitemo agasuzuguro, ugasanga igihe bavanywe ku mirimo yabo bahita bahinduka abarwanya u Rwanda kandi akenshi aba ari imyanzuro iterwa n’amakosa bakoze.

Ni ubutumwa Mpayimana yashyize ahagaragara kuri uyu wa Gatanu yifashishije urukuta rwa Facebook. Yari amaze iminsi aburarikiye abamukurikira, avuga ko ku wa 01 Ugushyingo 2019 azabagezaho ijambo rirambuye ku migambi n’imikorere ye nk’umunyapolitiki wigenga.

Uyu mugabo yavuze ko ubu hari abamurwanya benshi bamuhora ko avuga “umukuru w’igihugu cy’u Rwanda neza, ngo ku buryo ashobora kuba yarampaye akayabo.”

Yavuze ko ajya kwiyamamariza ku mwanya wa perezida mu 2017 atigeze atumizwa na FPR, ahubwo yari amaze gushima amagambo Perezida Paul Kagame yavugiye muri Unity Club ku wa 5 Ugushyingo 2015, ashishikariza Abanyarwanda kutarambiriza ku banyaburayi, kwiha agaciro no kutemerera abashobora kwitwaza bamwe bagamije kugirira nabi abandi.

Icyo gihe ngo yasobanuye impamvu bijya biba ngombwa ko umuntu afatwa n’uburakari agahaguruka akerekana koko urukundo afitiye igihugu. Yanze abavanwa mu mirimo bagahita batangira kurwanya ubuyobozi bw’igihugu.

Yagize ati “Kubera agasuzuguro, abantu benshi bavanywe ku mirimo yabo bahita bahinduka ibipinga bagafata iy’ishyamba cyangwa iy’amahanga. Kumva bari i Burayi bikabongerera amapeti. Nubwo baba yenda bamwe barahuye n’akarengane, tugize ubwubahane mu Rwanda hari bamwe bazajya basubira ku mirimo yabo, ubutegetsi bugasimburana n’ubundi, intwaro zigahosha."

Yavuze ko kugeza ubu abenshi mu barwanya u Rwanda ari ababanye na Perezida Kagame muri Uganda cyangwa mu muryango FPR, cyangwa abigeze imyanya muri Leta ayoboye.

Yakomeje ati “Kumenya umuntu si byo bituma umusuzugura. Abazi ko igihugu cyacu ari gito mu buso bashaka kugisuzugura, nyamara uwasomye mu byifuzo by’ubuyobozi buriho (icyo bita viziyo) muzasanga u Rwanda ari igihugu wagereranya n’ibihangange nka Amerika cyangwa Isiraheli n’ibindi. Njyewe sinshobora gusuzugura umuntu wiyubaha, n’umuntu uteza imbere u Rwanda.”

Mpayimana yavuze ko abamurwanya barwanya demokarasi, kugeza ubwo hari n’abakoresha amagambo ateye isoni kuri Facebook bamwibasira, arimo ayo yise amagambo ya gishumba.

Yakomeje ati “Ntabwo bazanca intege. Uko biri kose urubuga nkoranyambaga Facebook ruri muri zimwe mu nzira zihurirwaho n’abanyarwanda benshi bitanasabye ubushobozi bwinshi, bagahura n’abandi, bagakuraho amakuru. Nagira inama abahoryo n’abashumba kwisubiraho,”

Mpayimana yanagarutse ku bamuziza ko ashyigikiye gahunda ya Ndi Umunyarwanda, ashimangira ko na we abashaka kugabanya Abanyarwanda mo amoko atatu abarwanya.

Ati “Dufite byinshi biduhuza kandi dufite byinshi dutandukaniyeho bamwe n’abandi, aribyo bitugira abo turibo. Nakoze ubusesenguzi buhagije butuma namagana abitwaza inyito hutu ngo bongere cyangwa bakomeze gushyushya imitwe y’abanyarwanda. Icyo byakoze muri 59 no muri 94 utarakibonye azakomeze yishinge abazungu baturebera mu ndorerwamo y’ibirahuri bibiri gusa.”

Bamwe mu barwanya leta y’u Rwanda banyuze mu myanya ikomeye uyu munsi barimo nka Kayumba Nyamwasa wabaye Umugaba Mukuru w’Ingabo z’u Rwanda, ahunga akurikiranweho ibyaha bitandukanye ndetse aza no kubihamywa n’inkiko, Faustin Twagiramungu wabaye Minisitiri w’Intebe, David Himbara wabaye umuyobozi mukuru muri perezidansi n’abandi benshi, bavuye mu Rwanda kubera amakosa n’ibyaha babaga baregwa.

Ubwo yasozaga ihuriro ngarukamwaka rya 12 ry’Umuryango Unity Club Intwararumuri, Perezida Kagame yavuze ko hari abashaka guhuza urugamba rwagejeje ku kubohora u Rwanda n’intambara iyo ariyo yose umuntu yashoza ku Rwanda, akibwira ko azayitsinda.

Ati "Ntureba nk’aba bandi bariho ubungubu barwanya igihugu cyacu, ndetse rimwe bo bakanavuga ko ubwo iriya ntambara yabaye kuriya cya gihe yo muri 90, bakavuga ngo ese bariya bo si ko batangiye, urabona bataragize batya… ntabwo ari rimwe guteranya na rimwe ni kabiri, oya, ntabwo ariko bimera."

Yavuze ko ufashe abarwanya leta y’u Rwanda ukabashyira hamwe wasanga nta n’umwe ufite ukuri ashingiraho, kubera ko abenshi aho kugendera ku kuri, bayobywa na politiki y’amahanga ashaka kudindiza u Rwanda.

Ubundi ngo uba ukwiye kujya muri opozisiyo ugaragaza ibyo wambuwe, wabujijwe cyangwa bidakorerwa abanyarwanda kandi byakabaye bikorwa, ariko ngo ibyo "bafite baheraho bavuga ibyo bintu byose ni bikeya, cyangwa se nta n’ibihari."

Mpayimana akomeje kugaragaza ibitekerezo bye kuri politiki, ndetse aheruka kuvuga ko nyuma y’imyaka 29 urugamba rwo kwibohora rutangiye, umutwe wa FDLR ndetse n’ishyaka ritemewe rya FDU Inkingi riyoborwa na Ingabire Victoire Umuhoza, bikwiye guseswa kuko ibitekerezo bagenderaho byatsinzwe.

Mpayimana yanenze abantu barwanya igihugu aho gutanga umusanzu mu kugiteza imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .