00:00:00 IGIHE NETWORK KN KINYARWANDA EN ENGLISH FR FRANCAIS

Moïse Katumbi yagaragaje uko Tshisekedi yamutengushye, yanga kwerura ngo ashinje u Rwanda

Yanditswe na Rabbi Malo Umucunguzi
Kuya 29 Ukuboza 2022 saa 11:09
Yasuwe :

Nyuma yo kwitandukanya n’ihuriro Union sacrée rya Perezida Félix Tshisekedi, umunyapolitiki Moïse Katumbi yeruye ko yatengushywe n’ubutegetsi bwe, ku buryo ngo iyo aza kuyobora neza, we aba yarafashe ikiruhuko muri politiki.

Katumbi yasobanuye byinshi mu kiganiro yagiranye na Jeune Afrique. Ni ikiganiro cyasohotse mu gihe muri RDC hari umwuka ushyushye, ndetse batatu mu baminisitiri batanu ishyaka rye Ensemble pour la République ryari rifite muri guverioma, bamaze kwegura.

Uyu mugabo w’imyaka 58 wabaye Guverineri wa Katanga mu 2007-2015, yavuze ko afite ubushobozi bwo kugarura amahoro muri RDC.

Yatanze urugero ko ubwo yabaga Guverineri, muri Katanga ngo habaga icyiswe "le triangle de la mort," abantu bahoraga bicwa. Ngo nyuma y’amezi atandatu, igisubizo cyari kimaze kuboneka.

Yakomeje ati "Ibanga ryonyine ni ukongerera imyitozo abasirikare bacu, kubw’ibyo, nzagabanya ibigenda mu gutunga leta, nongere ibigenerwa igisirikare."

Yabajijwe ku mwuka uri mu gihugu, aho urubyiruko rurimo kwinjizwa mu gisirikare ku bwinshi kubera umutekano muke, harimo n’ibitero bya M23.

Yahakanye ibijyanye no kuba yajya mu mishyikirano na M23 ngo haboneke amahoro.

Yagize ati "Nta mishyikirano. Aba bantu ni amabandi, nubwo buri ntambara yakunze gusozwa n’imishyikirano."

Katumbi kandi yabajijwe ku buryo abanyapolitiki benshi bo muri RDC bakunze gushinja u Rwanda gutera inkunga umutwe wa M23.

Yanze gutunga urutoki u Rwanda, ahubwo aba nk’uceremba, anakomoza kuri Uganda.

Yagize ati "Ntabwo nzi impamvu hakiri impaka. M23 ifite aho yavuye ubwo yinjiraga muri RDC mu Ugushyingo 2021. Tugomba guhagarika gufata abanye-Congo uko tubonye. Ntidukwiye kwemera igitero cyaba kivuye mu Rwanda, Uganda cyangwa ikindi gihugu icyo aricyo cyose."

Ubwo umutwe wa M23 wuburaga ibikorwa mu mwaka ushize, abarwanyi bawo bari baturutse muri Uganda barimo Gen Sultan Makenga, Bertrand Bisimwa n’abandi, nyuma yo guhungirayo mu 2013.

Ni mu gihe abahungiye mu Rwanda barimo Jean Marie Runiga wari ubayoboye, kugeza ubu bakiri mu nkambi.

Nubwo u Rwanda rwakomeje gushinjwa gutera inkunga M23, Perezida Kagame aheruka kuvuga ko aba barwanyi bashyirwa mu nkambi, imbunda zabo zashyikirijwe Repubulika Iharanira Demokarasi ya Congo.

Intambara y’Ingabo za Leta M23 ikomeje guteza umwuka mubi mu karere, ku buryo ubu u Rwanda na RDC birebana ay’ingwe, ndetse na Uganda ikomeza kugenda ishyirwa mu majwi.

U Rwanda rwakomeje kugaragaza ko M23 ari ikibazo cy’abanye-Congo, ko ari nabo bagikemura bataruzanyemo.

Nyamara ubushotoranyi ku ruhande rwa RDC bwarakomeje, aho kuri uyu wa Gatatu, indege y’intambara ya RDC yongeye kwinjira mu kirere cy’u Rwanda.

Ni ibikorwa by’ubushotoranyi u Rwanda rwamaganiye kure.

Yashinje Tshisekedi kumutenguha

Katumbi yavuze ko ubwo yinjiraga mu ihuriro Union sacrée kugira ngo Tshisekedi agire ubwiganze mu nteko ishinga amategeko, yamuhaye umurongo mugari w’ibikorwa yifuza ko byazitabwaho mu bihe by’ubutegetsi bwe.

Ati "Ariko imyanzuro yanjye ntiyigeze ikurikizwa mu gihe cy’imyaka ibiri. Yatangaje gahunda zifite intege nke gusa."

Yakomeje ati "Ntabwo nshaka ubutegetsi kubera gutegeka gusa. Iyo Félix Tshisekedi ayobora neza, mba narafashe ikiruhuko muri politiki mu gihe kinini gishize."

Umubano na Joseph Kabila

Moise Katumbi yanabajijwe ku mubano we na Joseph Kabila wahoze ari perezida wa RDC. Mu gihe kimwe, ngo yigeze kumwita "Yuda".

Katumbi yavuze ko bashwanye mu 2015, ntibongera guhura kugeza muri Gicurasi ubwo habaga ibiganiro byahuje abaturage bakomoka muri Katanga.

Katumbi avuga ko yagiye muri ibyo biganiro atazi ko Kabila abyitabira, ndetse ngo yari yambaye ishati. Ati "Iyo mbimenya mbere nari kwambara ikoti mu cyubahiro."

Yakomeje ati "Joseph Kabila yarambwiye ati ‘Guverineri, twibagirwe ibyahise dutekereze ku hazaza h’igihugu cyacu. Ahahise ni ahahise. Habayeho ibinyoma byinshi’. Naramusubije nti ‘Bwana perezida, kuba duhanye ikiganza ni ukugira ngo Congo ibashe kujya mbere."

Katumbi yavuze ko kuba yakorana Kabila, nta mpungenge biteye nubwo hari abashobora kumwita ikirumirahabiri.

Ibyo abishingira ku kuba hari abantu barwanyije Kabila mu myaka myinshi, ariko "bagirana amasezerano mu 2018, ngo bagere ku butegetsi."

Yakomeje ati "Uwo si njye, ni Félix Tshisekedi n’abantu be."

Muri icyo kiganiro kandi, Katumbi yabajijwe ku mushinga w’itegeko wigeze kuzamurwa nubwo wahagaze, ushobora kugena ko kugira ngo umuntu abe perezida agomba kuba afite se na nyina b’abanye-Congo.

Ni mu gihe Moïse Katumbi avuka kuri nyina w’umunye-Congo na se ukomoka mu Bugereki, Nissim Soriano.

Ni itegeko Katumbi avuga ko ryuzuye ivangura, ku buryo ritazigera na rimwe ryemerwa.

Ati "Nzi mama wanjye, yashyinguwe hano i Lubumbashi. Nzi inkomoko yanjye. Iyo nza kuba mpa agaciro impuha zose, mba mfite ubwenegihugu busaga mirongo itanu."

Yavuze ko nta wamubuza kwiyamamaza, kuko hari abandi benshi bafite amaraso y’abazungu ( métisses) bahataniye imyanya ikomeye, nka Adam Bombole wahataniye kuba perezida mu 2011, cyangwa Léon Kengo wa Dongo wabaye Minisitiri w’Intebe [ 1982 - 1986, 1988 - 1990 na 1994 - 1997] na Perezida wa Sena mu 2007 - 2011 no mu 2012 - 2019.

Babaye batamushaka kubera uruhu rwe, ngo na Barack Obama ntaba yarayoboye Leta zunze ubumwe za Amerika cyangwa na Nicolas Sarkozy ngo ayobore u Bufaransa.

Icyakora, Katumbi avuga ko hari amavugurura akwiye gukorwa mu matora, kuko atumva ukuntu umukandida atangazwa ko abaye perezida kandi yagize amajwi 15% cyangwa 16%, ngo ni uko gusa yarushije abandi.

Ati "Birakwiye ko uwatsinze aba yagize amajwi asaga 50% y’abatoye."

Kugeza ubu abandi bakandida bavugwa bashobora guhangana na Tshisekedi barimo Augustin Matata Ponyo, Martin Fayulu, Adolphe Muzito, Jean-Marc Kabund-a-Kabund.

Katumbi yashinje Tshisekedi kumutenguha
Katumbi na Kabila baheruka guhura muri Gicurasi, mu biganiro by'abakomoka muri Katanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .