MKU irateganya kubaka ikigo gihugura abayigamo n’abayirangijemo kwihangira umurimo

Yanditswe na Twarabanye Venuste
Kuya 19 Ukwakira 2019 saa 12:59
Yasuwe :
0 0

Umuyobozi wungirije wa Mount Kenya University, Prof. Stanley Waudo yatangaje ko bafite gahunda yo kubaka ikigo kizajya gihugura abanyeshuri bayigamo n’abayirangijemo ku kwihangira imirimo.

Uyu muyobozi yavuze ko MKU iteganya kubona Miliyoni Frw 80 zo gutangira uwo mushinga, ubwo iyi Kaminuza yatangizaga ku mugaragaro ibiganiro bigamije gushishikariza abakobwa kumva ko bashoboye bagendeye ku buhamya n’inama z’ababashije kugera ku nzozi zabo babikesha gutinyuka bagatera intambwe ya mbere.

Ibyo biganiro bizajya biba buri mwaka bigamije kurema icyizere n’imbaraga muri urwo rubyiruko, usanga rufite ibitekerezo ariko kubitangira bikaba ikibazo kubera kwitinya, cyangwa ntibamenye igihe cyo gufatirana amahirwe umuntu abona.

Uko bazajya baganirizwa bikazajya birushaho kubumvisha ko kugira ngo umuntu atere imbere bitari ngombwa ko aba aturuka mu muryango ukize cyangwa afite umusunika.

Kalisa Winnie, usanzwe ari umunyamideli ni umwe mu baganirije urwo rubyiruko. Yemera ko iyo umuntu atangiye urugendo akabona umuganiriza amenya icyo azirinda n’icyo azubakiraho.

Ati “Navuga nti mu buzima buri wese aba afite ibintu yahuye nabyo byatumye atsinda cyangwa atsindwa, ariko ikintu cy’ingenzi umuntu akenera, igihe utangiye urugendo rwawe ufite icyo ushaka gukora, uba ukeneye umuntu ukubwira ngo nabaye hariya, nakoze biriya, uku niko byangendekeye, niba ari amakosa uyirinde niba hari amasomo ukuramo agufasha kugera aho wifuza, uyakurikize.”

Inkuru y’ubuzima bwa Kalisa, yasangije urwo rubyiruko ishingiye ku muntu wabashije kubyaza umusaruro ibyo yarimo kugira ngo abashe kuba umuntu muzima uticara ngo avuge ngo mfite ibibazo ibi n’ibi ahubwo ubasha kumenya ko afite ibibazo yarangiza agashaka uburyo abivamo.

Mutuyimana Joseline wiga muri Mount Kenya University, ni umwe mu bitabiriye ibyo biganiro. Yavuze ko ibiganiro nk’ibyo ari inyunganizi ituma barushaho kwiyumvamo ubushobozi.

Ati “Iki kiganiro ni nk’inyunganzi ibi byose ni ibidufasha mu kumva ko abakobwa dushoboye, ntitwumve yuko nta kintu twakora, ukumva ibintu bya bisinesi ukumva ufite ubwoba, ukumva ko ari ibintu by’abagabo cyangwa abasore kuko natwe abakobwa turashoboye ushobora gukora nk’ibyo abahungu bakora kandi ukunguka.”

Umuyobozi wungirije wa MKU, Prof. Stanley Waudo yavuze ko ari ibiganiro batangiye bizajya biba buri mwaka.

Ati “Iki gikorwa ni igisa n’igisanzwe kibera muri Kenya aho Mount Kenya ifite ishuri rihugura abantu kwihangaira umurimo [enterprise academy] aho bakurikirana abanyeshuri basoje amasomo n’abakiga. Abanyeshuri barangije muri Mount Kenya, baba basanzwe bafite ibitekereso byo guhanga imirimo, bafashwa gushinga imishinga iciriritse. Kugira ngo igihe barangije be kugenda basaba akazi ahubwo bakihangire”.

Mu minsi iri imbere Mount Kenya University Rwanda irateganya kubaka ikigo nk’icyo iyo kaminuza ifite muri Kenya.

Ati “Binyuze ku muyobozi mukuru dushaka kuzana icyo gitekerezo akaba yaratwemereye ko azaduha miliyoni Frw 80 vuba aha, yo kubaka ikigo gihugura abanyeshuri bacu n’abarangije kwihangira umurimo.

Yavuze ko ibiganiro nk’ibyo babitangiye ariko bikazajya biba buri mwaka. Byibanze ku bagore ariko icyo kigo nigitangira hakazitabwa ku bakobwa n’abahungu.

Ibi biganiro byitabiriwe n’abagera kuri 300 barimo abanyeshuri ba Mount Kenya University bagera kuri 200 n’abandi baturutse hanze ya Kaminuza.

Amafoto: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza