Minisitiri w’Intebe yavuze ku mpinduka zakozwe na Guverinoma zikemura ibibazo muri UR

Yanditswe na Prudence Kwizera
Kuya 8 Ugushyingo 2019 saa 05:11
Yasuwe :
0 0

Minisitiri w’Intebe, Dr Ngirente Edouard, yakomoje ku mpinduka zitandukanye Guverinoma y’u Rwanda yakoze muri Kaminuza y’u Rwanda zituma ibibazo byari biyirimo bikemuka.

Yabigarutseho kuri uyu wa Gatanu ubwo yayoboraga umuhango wo gutanga impamyabumenyi ku banyeshuri basaga ibihumbi icyenda barangije amasomo mu byiciro bitandukanye muri Kaminuza y’u Rwanda.

Uwo umuhango wabereye kuri Sitade Mpuzamahanga ya Huye mu Karere ka Huye.

Yavuze ko umwaka ushize Guverinoma yafashe ingamba zo gushyigikira Kaminuza ku buryo bwihuse kandi burambye kugira ngo ikomeze kwiteza imbere no guteza imbere uburezi.

Yagarutse kuri bimwe mu byakozwe n’impinduka nziza byagize ashimangira ko bizakomeza.

Ati “Guverinoma yashyizeho uburyo bushya bwo kunganira umutungo wa Kaminuza y’u Rwanda butuma imicungire yayo ku buryo bw’amafaranga ikorwa ku buryo burambye.”

Yavuze ko ubwo buryo bwatumye imishahara n’ibindi bigenerwa abakozi ba Kaminuza y’u Rwanda byishyurirwa ku gihe.

Yakomeje avuga ko amafaranga agenerwa umunyeshuri amufasha mu mibereho ya buri munsi yongerewe ava ku bihumbi 25 Frw ashyirwa ku bihumbi 35 Frw ku kwezi kandi azongerwa akagera ku bihumbi 40 Frw.

Ati “Ayo mafaranga azongerwa agere ku bihumbi 40 nk’uko byemejwe n’Inama y’Abaminisitiri yo ku wa 14 Gashyantare 2018.”

Dr. Ngirente yavuze ko muri uyu mwaka w’amashuri urangiye abanyeshuri boherejwe mu mashami ya Kaminuza, ari hirya no hino mu mijyi yunganira Kigali mu rwego rwo kuyiteza imbere.

Ati “Ibyo byakozwe hagamijwe kwegereza abaturage bimwe mu bikorwa bya Kaminuza; ikaba ari imwe mu ntego za Kaminuza yo gukorana n’abaturage b’u Rwanda ibagezaho zimwe muri serivise ifite.”

Yabwiye abanyeshuri bahawe impamyabumenyi ko bategerejweho byinshi bishingiye ku bumenyi n’ubuhanga bakuye muri Kaminuza.

Abahawe impamyabumenyi muri Kaminuza y’u Rwanda kuri iyi nshuro ni 9 382 barimo abahungu 3 488 abakobwa 5 894.

Umuyobozi wungirije ushinzwe iterambere muri Kaminuza y’u Rwanda, Dr Charles Murigande, yatangaje ko kuri ubu Kaminuza y’u Rwanda ihagaze neza ugereranyije na mbere ya Jenoside yakorewe Abatutsi mu 1994.

Yagarutse ku mateka avuga ko kuva yatangira mu 1963 kugeza mu 1993 mbere ya Jenoside muri iyo myaka 30 yari imaze gushyira hanze abanyeshuri 1 962 gusa.

Mu myaka itandatu, kuva muri 2013 Kaminuza y’u Rwanda yaba imwe ifite amashami atandukanye kugeza ubu imaze gutanga impamyabumenyi ku bantu barenga 48 900.

Kuva mu 2013 kugeza mu 2017 Kaminuza yari imaze gutangaza ubushakashatsi bugera ku 1 257 kandi bwagiye buhindura imibereho y’abaturage irushaho kuba myiza.

Kugeza ubu Kaminuza y’u Rwanda ifite udushami (Campus) 12 turi mu turere dutandukanye ari zo Gikondo, Remera, Nyarugenge, Huye, Busogo, Rubirizi, Nyamishaba, Nyagatare, Rusizi, Kicukiro, Kavumuna Rukara.

Dr Murigande yashimangiye ko bari gushyira ingufu mu gukora ubushakashatsi bwinshi kandi bufite ireme.

Abarangije muri UR barimo abahungu 3 488 abakobwa 5 894
Abasoje amasomo muri UR bitezweho impinduka mu iterambere n'imibereho myiza y'Abanyarwanda
Abiga muri UR bazajya bahabwa buruse y'ibihumbi 40 Frw ku kwezi
Byari ibyishimo byinshi ku basoje amasomo yabo muri UR bahawe impamyabumenyi
Impinduka zakozwe muri UR zatumye byinshi mu bibazo yari ifite bikemuka
Minisitiri w’Intebe, Dr Edouard Ngirente, yakomoje ku mpinduka zakozwe na Guverinoma zikemura ibibazo muri UR
Ni ku nshuro ya gatandatu kaminuza y'u Rwanda itanze impamyabumenyi kuva muri 2013 yaba imwe
Ni umuhango witabiriwe n'abayobozi batandukanye muri Kaminuza y'u Rwanda
Umuyobozi wungirije wa Kaminuza y’u Rwanda, Prof Phillip Cotton [hagati] n'abandi bayobozi muri UR bitabiriye ibyo birori
Uwo muhango wabereye kuri Sitade Mpuzamahanga ya Huye mu Karere ka Huye

Amafoto: Muhizi Serge

Mugwiza Olivier

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza