Minisitiri w’Intebe yagaragarijwe ko mu kwimura abaturage ku nyungu rusange hicwa amategeko

Yanditswe na HABIMANA James
Kuya 4 Ukuboza 2018 saa 08:44
Yasuwe :
0 0

Minisitiri w’Intebe Dr Édouard Ngirente yabwiwe ko harimo kwicwa amategeko nkana mu kwimura abaturage ku nyungu rusange, kuko ngo bitumvikana uburyo hubakwa umuhanda ukarinda urangira abaturage batarishyurwa ingurane.

Iki kibazo cyagarutsweho kuri uyu wa 04 Ukuboza 2018 ubwo Minisitiri w’Intebe Dr Édouard Ngirente yagezaga ku Nteko Ishinga Amategeko, imitwe yombi, ibikorwa bya Guverinoma mu rwego rwo kubaka no gufata neza imihanda.

Dr Ngirente yavuze ko hari byinshi bimaze gukorwa mu kubaka imihanda, kuko kugeza ubu uburebure bwayo mu Rwanda ari kilometero 38.803,4. Imihanda ya leta ni kilometero 2.749, irimo ya kaburimbo ni kilometero 1.379, iy’igitaka ni kilometero 1.370.

Ikibazo cyo kwimura abaturage ku mpamvu z’inyugu rusange cyongeye gufata umwanya mu nteko ishinga amategeko, hibazwa impamvu hari itegeko ryo kwimura abaturage ariko rikaba ridakurikizwa.

Senateri Bizimana Evariste yavuze ko leta y’u Rwanda ikwiye guhagurukira ikibazo kigakemuka, kwica amategeko bigahagarara.

Itegeko risobanura ko kwimura abantu ku nyungu rusange bikorwa na leta, ibigo bya Leta n’inzego z’ibanze zifite ubuzima gatozi bwo gukura umuntu mu mutungo we ku mpamvu z’inyungu rusange, ariko habanje gutangwa indishyi ikwiye.

Gusa umunsi ku munsi abaturage ntibasiba kuvuga ko leta itarabishyura kandi ibikorwa byaramaze kubakwa, ahenshi ubuyobozi bukiregura ko bwasanze hari ibibazo nka konti z’abaturage zitari zimeze neza n’ibindi.

Kuri senateri Bizimana, we asanga uko kwica amategeko nkana gukwiye guhagarara, abaturage bakajya bishyurirwa igihe.

Ati “Icyo badusobanurira ni uko bavuga ngo mu gihe babariraga abaturage ngo basanze hari indangamuntu zituzuye cyangwa ngo basanze badafite konti, ariko ikibazo ibyo biza nyuma ari uko umuhanda wuzuye.”

“Iki kibazo leta yagombye kugishyiramo imbaraga kuko mu gihe hakorwa inyigo y’umuhanda uzubakwa, bagatanga isoko, bakagera aho umuhanda utangirwa gukorwa, icyo gihe itegeko tuba twaryishe.”

Minisitiri w’Intebe Dr Édouard Ngirente avuga ko ikibazo cyo kwimura abantu gikunda guteza impaka, kuko abantu batakivugaho rumwe.

Yavuze ko ubusanzwe iyo hagiye kubakwa umuhanda habanza kwimurwa abaturage bari aho inyigo yagaragaje ko uzanyura kandi bigakorwa mbere yo kuwubaka, ariko ngo hari aho usanga abantu bavuga ko nyuma yo kubaka umuhanda, hari ibintu byabo byangijwe.

Ati “Usanga bamwe mu baturage bavuga bati nubwo umuhanda utaje ngo ungonge ariko mu gihe mwarimo kubaka, inzu yanjye yarasadutse, imashini yatigishije ubutaka inzu yanjye yenda kwitura hasi, ibyo rero byo bitera impaka ndende kuko bisaba ko hajyaho itsinda ry’abantu bajya kureba neza nimba mbere y’uko uwo muhanda uhanyura, iyo nzu yari nzima ikaba yarangiritse nyuma.”

“Mu bantu dusura, 50% twemera ko dushobora kubaha amafaranga kuko twasanze ingaruka zaratewe n’umuhanda wubatswe, ariko hari n’abandi 50% dusanga ibintu bafite bitarangijwe n’umuhanda, ni ibintu bisaba kugenzura.”

Gusa avuga ko no kwimura abaturage mbere ngo atari shyashya kuko ngo hakirimo ikibazo, ariko leta iri gushyiramo imbaraga ngo iki kibazo gikemuke.

Minisitiri w'Intebe Dr Edouard Ngirente ubwo yagezaga ku nteko Ishinga amategeko, imitwe yombi, ibikorwa bya Guverinoma mu rwego rwo kubaka no gufata neza imihanda
Abadepite n'abasenateri bagaragaje impungenge ku migendekere yo kwimura abaturage ku nyungu rusange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza