Mu itangazo ryatanzwe n’Ibiro bya Minisitiri w’Intebe ku wa 4 Ukuboza 2020, Umuyobozi w’Ibiro bya Minisitiri w’Intebe, Evariste Rugigana, yavuze ko bimaze kugaragara ko mu mezi ashize, inama nto n’inini ndetse n’imyiherero bibera hanze y’aho ibigo bikorera ziyongereye cyane.

Yakomeje ati “Mu rwego rwo kunoza imikorere y’ibigo hanakoreshwa neza ibikorwa remezo bya leta bihari, inzego ziteganya gukorera inama hanze y’inyubako yazo (haba muri Kigali no hanze yayo) zigomba kubisabira uburenganzira mu Biro bya Minisitiri w’Intebe, iminsi 14 mbere y’inama.”

Mu byateganyijwe ko ibigo bya leta bizajya bigenderaho mu gusaha gukorera inama hanze y’ibiro, harimo kugaragaza ibizayigirwamo, umusaruro yitezweho n’urutonde rw’abazayitabira.

Muri ibyo kandi harimo kugaragaza neza igisobanuro cy’iyo nama, kandi hakagaragazwa niba iri muri gahunda y’ibikorwa byateganyijwe by’ikigo.

Hejuru y’ibyo, ikigo kigomba kugaragaza ingengo y’imari bizatwara n’aho izaturuka, impamvu byari ngombwa ko ibera hanze y’ibiro by’ikigo, n’uburyo bwo kubahiriza amabwiriza yo kwirinda icyorezo cya COVID-19.

Umuyobozi w'Ibiro bya Minisitiri w'Intebe, Rugigana Evariste, yamenyesheje ibigo bikeneye gukorera inama hanze y'ibiro byabyo, ko bizajya bibisabira uburenganzira