Minisitiri w’Intebe Dr Ngirente yagiranye ibiganiro na Perezida Erdoğan wa Turikiya

Yanditswe na Mathias Hitimana
Kuya 10 Ukwakira 2018 saa 08:37
Yasuwe :
0 0

Perezida wa Turikiya, Recep Tayyip Erdoğan, yakiriye Minisitiri w’Intebe, Dr Ngirente Edouard, witabiriye Inama ya kabiri ihuza Afurika na Turikiya.

Minisitiri w’Intebe, Dr Ngirente yari ahagarariye Perezida Kagame muri iyi nama y’iminsi ibiri ihuza Turikiya na Afurika iri kubera Istanbul muri Turikiya.

Ntihahise hasohoka ibijyanye n’ibiganiro bya Minisitiri w’Intebe w’u Rwanda na Perezida Erdoğan. Byari byitabiriwe kandi na Ambasaderi w’u Rwanda muri Turikiya, Williams Nkurunziza.

U Rwanda na Turikiya bifitanye umubano ukomeye kandi buri cyose gifite Ambasderi ugihagarariye mu kindi.

Turikiya yafunguye Ambasade yayo i Kigali muri Gicurasi 2016 ubwo Minisitiri w’Ububanyi n’Amahanga w’iki gihugu, Mevlüt Çavuşoğlu, yari mu ruzinduko rw’akazi mu Rwanda.

Mu kiganiro cyihariye na IGIHE mu 2017, Ambasaderi wa Turikiya mu Rwanda, Mehmet Raif Karaca, yavuze ko bafata “u Rwanda nk’igihugu cy’abavandimwe tudafitanye ikibazo na kimwe na Guverinoma”.

Yanashimangiye ko babona u Rwanda nk’igihugu gitekanya muri Afurika, cyihuta cyane mu iterambere bitandukanye n’ibimenyerewe kuri uyu mugabane.

Turikiya isanganywe ubufatanye n’umugabane wa Afurika, mu 2017 yasinyanye n’u Rwanda amasezerano y’ubufatanye mu by’ubuhinzi.

Ayo masezerano akubiyemo ubufatanye mu nzego 13 zirimo iterambere ry’uruhererekane nyongeragaciro rw’ibikomoka ku buhinzi n’ubworozi, inganda ziciriritse zitunganya umusaruro n’ikoranabuhanga mu kuwuhunika.

Abashoramari b’Abanya –Turikiya bari gukorera mu Rwanda imishinga ikomeye irimo uw’ikigo Hakan Madencilik Ve Elektrik Uretim San. Tic. A.S kiri kubaka uruganda rw’ingufu z’amashanyarazi akomoka muri nyiramugengeri mu Karere ka Gisagara mu gishanga cy’Akanyaru.

Abanya- Turikiya batanze ubufasha mu kurangiza iyubakwa rya Kigali Convention Centre.

Ubuhahirane bw’ibihugu byombi ntibugoye kuko ikompanyi y’indege ya Turkish Airlines imaze igihe ikorera mu Rwanda.

Perezida wa Turikiya, Recep Tayyip Erdoğan, yakiriye Minisitiri w’Intebe, Dr Ngirente Edouard, witabiriye Inama ya kabiri ihuza Afurika na Turikiya
Ibiganiro by'aba bayobozi bombi byitabiriwe na Ambasaderi w'u Rwanda muri Turikiya, Williams Nkurunziza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza