Minisitiri Sezibera yasabye abantu kudaha agaciro abakwirakwiza ibihuha ku gusura u Rwanda

Yanditswe na HABIMANA James
Kuya 27 Mata 2019 saa 12:48
Yasuwe :
0 0

Mu minsi ishize ibihugu birimo u Bufaransa na Canada byaburiye abaturage babyo kwitwararika igihe basuye u Rwanda, bibabwira ko bagomba kwitondera gusura ibice bimwe na bimwe birimo pariki y’Ibirunga, iya Nyungwe n’ibice byegereye imwe mu mipaka.

Ku rubuga rwa Minisiteri y’Ububanyi n’amahanga, u Bufaransa bwanditseho ko “Bitewe n’ibibazo bishobora kubaho, si byiza kujya muri Pariki y’Igihugu y’Ibirunga.”

Gusa leta y’u Rwanda yamaganye ibyo ibi bihugu bikomeje kugaragaza ku Rwanda kuko ari ibihuha bidafite ishingiro, cyane ko u Rwanda ari nyabagendwa.

Mininisitiri w’Ububanyi n’Amahanga w’u Rwanda Dr Richard Sezibera, yagize ati “Ntimuhe agaciro amakuru y’ibihuha akwirakwizwa ku mbuga za internet z’igihugu gituranyi ku bijyanye n’umuburo w’ingendo, ntabwo bari mu kuri. Urugero nka Canada ntacyo yigeze ihindura ku muburo yatanze mu byumweru bishize, ni nako bimeze ku Bufaransa no ku Bwongereza.”

Ubutumwa bwa Minisitiri Dr Sezibera bwakurikiwe n’ibitekerezo bya bamwe barimo na Guverineri w’Intara y’Iburasizuba, Mufuluke Fred wagize ati “Mu gihe ndimo kwandika ibi, ubu ngiye kujyana muri Pariki n’inshuti zo muri Singapore, aya makuru atera ubwoba aracanze ariko ashobora gucanga abasanzwe baracanzwe.”

Uwitwa Nganji kuri twitter we ati “Njye nasanze imbuga ziterura amakuru zikayatereka ahandi, zishobora guterura amakuru y’ibirimo kubera mu Burundi zikabishyira ku Rwanda kubera ko ari ibihugu bituranye, murebe amakaru y’imyiragambyo yo muri Uganda no mu Burundi usanga ameze nk’ayo mu Rwanda, ibi ni ubuswa.”

Mu kiganiro IGIHE iherutse kugirana n’Umunyamabanga wa Leta ushinzwe Umuryango wa Afurika y’Iburasirazuba (EAC) Nduhungirehe Olivier, yavuze ko ibyo ibi bihugu bitangaza atari byo kandi u Rwanda rugiye kuganira nabyo bikabihindura.

Ati “Ntabwo ari byo, ibyo bandika ntabwo bihuje n’ibiri mu Rwanda, murabizi umutekano hariya mu Birunga no muri Nyungwe urahari, ibyo bavuga ntabwo bihuye n’ukuri ariko tuzabiganira na bo turebe ko babihindura”.

Ku kuba ibihugu biburira abaturage babyo ku mutekano uri mu Rwanda bikomeje kwiyongera, Nduhungirehe, avuga ko bifitanye isano n’icengezamatwara ry’imitwe yitwaje intwaro ivuga ko irwanya u Rwanda.

Ati “Ntabwo tubizi tuzabaganiriza tubabaze ariko nyine hagomba kuba harimo na biriye by’icengezamatwara ry’iriya mitwe yitwaje intwaro ivuga ibintu bidahuye n’ukuri.”

Umuyobozi Mukuru wungirije w’Ikigo cy’Igihugu cy’Iterambere, RDB, ari nacyo kireberera ubukerarugendo, Emmanuel Hategeka, yabwiye IGIHE ko ibyo u Bufaransa bwakoze ari ugutwara u Rwanda mu gatebo kamwe n’ibihugu birukikije kandi umutekano warwo wizewe.

Ati “Nta kibazo na kimwe kiri mu birunga cyaba cyabiteye, ikibazo cyabaye ku ruhande rwa Congo uretse ko n’umutekano waho n’ubundi usanzwe utameze neza, hanyuma n’ibiheruka kubera muri Uganda aho bafashe ba mukerarugendo, ariko ku ruhande rwacu ntacyo.”

“Ni ibintu bafata akarere mu buryo bumwe noneho bakaburira abantu muri rusange, ariko ku ruhande rwacu nta kibazo dufite, abakerarugendo baragenda neza, abantu barasura nta kibazo. Icyo tuza gukora ni uguhumuriza abakerarugendo baza mu gihugu, ko kigendwa, ko umutekano w’abakerarugendo baza mu gihugu cyacu wizewe, basura pariki zose.”

U Rwanda rwasobanuye kenshi ko umupaka uruhuza na Uganda utigeze ufungwa kuko imigenderanire yakomeje, ahubwo rwaburiye abanyarwanda kutajya muri Uganda kubera ibibazo by’umutekano bahurirayo nabyo. Rumaze igihe rwihutisha imirimo yo kubaka umupaka uhuriweho, imaze kurenga 93%.

Minisitiri w'Ububanyi n'Amahanga Dr Richard Sezibera avuga ko ntawe ukwiye guha umwanya ibihuha by'ababeshya ko mu Rwanda nta mutekano uhari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza