Minisitiri Ngamije yasobanuye impamvu imibare y’abana bafite ibyago byo gupfa batarageza ku mwaka itagabanyutse

Yanditswe na Rabbi Malo Umucunguzi
Kuya 3 Ukuboza 2020 saa 08:00
Yasuwe :
0 0

Ikigo cy’Ibarurishamibare cyamuritse Ubushakashatsi bwa gatandatu ku bwiyongere n’ubuzima bw’abaturage mu Rwanda, RDHS, bugaragaza intambwe yatewe mu mibereho n’ubuzima ugereranyije n’imyaka itanu ishize, igaragaramo ibyiciro birebana n’impfu z’ababyeyi n’iz’abana.

Bigaragara ko abana bafite ibyago byo gupfa bataramara ukwezi bavutse ari 19 ku bana 1000 bavutse ari bazima, ikigero kitahindutse cyane ugereranije n’impfu z’abana 20 ku bana 1000 bavutse ari bazima, zabarwaga mu bushakashatsi bwo mu 2015.

Ku bana bafite ibyago byo gupfa batarageza ku mwaka bavutse bo biyongereyeho gato bagera kuri 33 ku bana 1000 bavutse ari bazima, bavuye ku kigereranyo cy’abana 32 ku 1000, babarwaga mu 2015. Ni ukuvuga ko hiyongereyeho umwana umwe.

Minisitiri w’Ubuzima, Dr Daniel Ngamije, yavuze ko imibare y’uyu mwaka idatandukanye cyane n’iyo mu myaka itanu ishize, nubwo yari ikwiye kuba yamanutse.

Ati “Twakwifuje ko yaba yagabanyutse, ariko kugabanya izi mpfu bisaba imbaraga nyinshi kandi mu nzego zitandukanye. Harimo kongera imbaraga mu buryo abantu babasha kuvura indwara zose z’abana bari munsi y’imyaka itanu hafi y’aho batuye, zaba malaria, impiswi, umusonga, ni indwara zica cyane aba bana bato mbere y’uko banagira umwaka.”

Yavuze ko ari inzego zigomba kongerwamo imbaraga nyinshi. Ikindi ni ukongerera ubushobozi serivisi z’ahakirirwa aba bana haba ku bitaro cyangwa ku bigo nderabuzima, kuko hakenewe abaganga bahuguwe n’ibikoresho by’ishami ryita ku ndembe, Intensive Care Unit.

Yakomeje ati “Turimo kubikoraho, tugerageza kongera umubare w’ibitaro n’ibikoresho, kugira ngo tubashe kuzamura ireme rya serivisi zihabwa abana bato cyane.”

Icya gatatu ngo ni ukongera uburyo ababyeyi batwite bitabwaho, kuko hari igihe usanga ibibazo umwana azize byaratangiye nyina amutwite, bitewe n’impamvu zitandukanye.

Ati “Hari indwara nyinshi, imirire mibi, abana bakavuka mu buryo bubi ku buryo baba bafite intege nke cyane. Turashaka kurushaho kurinda ababyeyi binyuze mu kubakurikirana, kubaha serivisi zihabwa abitegura kubyara, ubujyanama, muzi gahunda y’iminsi 1000 yo kwita ku mubyeyi kuva atwite na nyuma yo kubyara, ku buryo ababyeyi babyara abana bameze neza, byose byafasha mu kugabanya igipimo cy’abana bapfa.”

Impfu z’ababyeyi nazo ni ikibazo

Raporo yagaragaje ko ikigereranyo cy’ababyeyi bapfa bazize impamvu zo kubyara ku bana 100 000 bavutse ari bazima ari 203, umubare wagabanyutse biringaniye kuko muri raporo yo mu 2015 habarwaga impfu 210 z’ababyeyi ku bana 100.000.

RDHS yerekanye ko hafi abagore 98% mu Rwanda bipimishije inda ku muntu ubihugukiwe nibura rimwe ku nda iheruka, ariko 47% bonyine nibo bipimishije inda inshuro enye cyangwa zirenze, mu gihe ari zo nshuro zitangwaho inama.

Ni ibintu Minisitiri Ngamije yavuze ko biri mu bitera ibyago byo kuba umubare w’abapfa utagabanyuka uko bikwiye, ku buryo bikwiye guhinduka.

Ati “Igihe umubyeyi atwite aje kwa muganga, arasuzumwa, ibibazo ashobora kuba afite by’ubuzima bakabimumenyesha, bigatuma bakurikirana inda ye kuva ku mezi atatu mu gihembwe cya mbere akihagera, kugeza mu gihembwe cya nyuma, bakamuha gahunda y’ukuntu bazayikurikirana, ndetse bakazanasoza barapimye indwara zitandukanye ashobora kurwara, zamutera ikibazo cyo kubyara nabi cyangwa akabyara bimugoye.”

“Bakumvikana aho agomba kubyarira, niba usuzumye ukabona ko atagomba kubyarira ku kigo nderabuzima, agomba kubyarira mu bitaro, ni ibintu agomba kumenya nibura ukwezi kumwe mbere y’uko itariki yo kubyara igera.”

“Urumva rero igihe atubahiriza gahunda yo kwisuzumisha uko bikwiriye, ni wa mubyeyo ufatwa n’inda adafite ayo makuru yose ko atagomba kujya kubyarira ku kigo nderabuzima, agatungurwa, ibikurikira ni ingaruka nk’izingizi, ugasanga arapfuye, kuko atagize amahirwe yo kugira ngo agere kwa muganga, bamusuzume, bamubwire ibibazo ishobora kugira, bamugire inama y’ayo yagakwiriye kubyarira.”

Minisitiri Ngamije yavuze ko bagiye gushyira ingufu mu kongera umubare w’ababyeyi bisuzumisha nibura inshuro enye, bikazasaba guhindura imyumvire kuko usanga hari abantu batinya kuvuga ko batwite, bakazajya kwa muganga inda imaze gukura.

Ibindi ngo ni ibibazo by’ababyeyi batajya kwisuzumisha kubera ko usanga baraherwanwe n’imirimo yo mu rugo.

Minisitiri Ngamije ati “Ni yo mpamvu abagabo tubasaba kugira ngo bajye bafasha abagore babo, babasimbure mu kazi kamwe na kamwe, umubyeyi bamuhe amahirwe yo kujya kwisuzumisha, atari we ubazwa imirimo yose yo mu rugo.”

Mu bindi byagaragajwe mu bijyanye n’ubuzima, ni uko abarara mu nzitiramubu basanzwe ari 66%, mu gihe mu myaka itanu ishize byari 81%.

Minisitiri Ngamije yavuze ko ubushakashatsi bwakozwe no mu bihe bya guma mu rugo, mu gihe yabangamiye ikwirakwizwa ry’inzitiramibu, ariko ngo nyuma zaratanzwe zirenga miliyoni 3.5.

Minisitiri Ngamije yagaragaje ko hari intambwe ikomeye yatewe mu rwego rw'ubuzima
Umuyobozi Mukuru w'Ikigo cy'Ibarurishamibare, Yusuf Murangwa, yavuze ko abana bafite ibyago byo gupfa batarageza ku mwaka bavutse biyongereyeho gato bagera kuri 33 ku 1000
Minisitiri w'Intebe Dr Edouard Ngirente yijeje uruhare rwa Leta mu kwita ku buzima
Abayobozi bafata ifoto y'urwibutso nyuma yo kumurika RDHS ya gatandatu

Amafoto: Primature


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .