00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Ngabitsinze yakebuye abashobora kwitwaza ibiciro bya lisansi bagahanika iby’ibicuruzwa

Yanditswe na IGIHE
Kuya 8 August 2022 saa 01:38
Yasuwe :

Minisitiri w’Ubucuruzi n’Inganda, Dr Jean-Chrysostome Ngabitsinze, yihanangirije abacuruzi bashobora kwitwaza ko ibiciro by’ibikomoka kuri Peteroli byazamutse, nabo bakazamura iby’ibicuruzwa bitandukanye.

Ibi Minisitiri Ngabitsinze yabigarutseho ku Cyumweru tariki 7 Kanama 2022 ubwo hatangazwaga ibiciro bishya by’ibikomoka kuri peteroli.

Muri ibi biciro bishya bizamara amezi abiri litiro ya mazutu yaguraga 1503 Frw yazamutseho 104 Frw, mu gihe litiro ya lisansi yaguraga 1460 Frw yazamutseho 149 Frw.

Kugira ngo ibiciro by’ibikomoka kuri peteroli bitarushaho kujya hejuru Leta y’u Rwanda igenda yigomwa imisoro ndetse igashyiramo na nkunganire kugira ngo abantu bakomeze kubona ibicuruzwa bitandukanye bitari ku giciro gihanitse.

Aha niho Minisitiri Ngabitsinze yahereye avuga ko nta mucuruzi ukwiriye guhanika ibiciro yitwaje ko ibya lisansi na mazutu byazamutse.

Yakomeje avuga ko aya mafaranga ya nkunganire Leta y’u Rwanda itanga aba agamije gufasha kugira ngo ibiciro by’ibicuruzwa bitazamuka ku masoko.

Ati “Iyo ibiciro bihindutse cyane cyane iby’ibikomoka kuri peteroli ahenshi ubusanzwe byagakwiye guhindura ibiciro ku masoko y’ibintu bitandukanye ariko amafaranga Leta iba yashyizemo aba ari ukugira ngo ibiciro bidahungabana cyangwa se ngo bizamuke mu buryo bukabije.”

“Ntabwo bigomba kuzamuka bitewe n’ibi maze gusobanura gusa imitwe y’abantu cyangwa se iy’abacuruzi muri rusange impinduka ibaye nto iteza izindi ariko nka Leta kubera ko tuba dushinzwe gukurikirana uko ibintu bimeze, tureba abacuruzi tukareba n’abaguzi ahari ikibazo tukagikemura mu buryo bwihuse[...] nta muguzi ugomba guhendwa kuko tuba twabibaze.”

Yavuze ko umucuruzi wagira ikibazo cy’uko ari gucuruza ahomba bitewe n’igiciro cya lisansi yegera Leta bakaganira bakareba uko ikibazo gikemuka.

Minisitiri Ngabitsinze yijeje ko mu minsi iri imbere Minicom iratangira gukora igenzura ku masoko igamije kureba ko nta bacuruzi bari guhanika ibiciro mu buryo butumvikana.

Ibindi biciro bitagomba guhinduka ni ibijyanye n’ubwikorezi rusange.

Minisitiri w’Ibikorwaremezo, Dr. Nsabimana Ernest, yavuze ko abakoresha imodoka rusange mu ngendo, nta kibazo kiri bubeho kijyanye n’ibiciro.

Ati "Usibye n’aya miliyari 10 Frw Leta iba yigomwe, n’ubundi hari andi mafaranga ishyira mu rwego rwo gutwara abantu mu buryo bwa rusange. Kugeza ubu ngira ngo imaze gutanga miliyari 35 Frw, haba mu kubunganira mu byerekeranye na mazutu cyangwa lisansi, inguzanyo bagenda bafata muri banki, ndetse no gufasha umugenzi muri rusange kugira ngo igiciro kitazamuka."

Mu mezi abiri ashize nabwo, muri nkunganire mu biciro by’ibikomoka kuri peteroli, Leta yashyizemo miliyari hafi 13 Frw.

Minisitiri Ngabitsinze yakebuye abashobora kwitwaza ibiciro bya lisansi bagahanika iby’ibicuruzwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .