00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Musabyimana yacyebuye abayobozi batuma ibibazo by’abaturage biba inganzamarumbo

Yanditswe na Nsanzimana Erneste
Kuya 29 Ukuboza 2022 saa 10:03
Yasuwe :

Minisitiri w’Ubutegetsi bw’Igihugu, Jean Claude Musabyimana, yanenze abayobozi bareberera ibibazo by’abaturage, hanyuma babona bimaze kuba inganzamarumbo bagakumira abaturage ngo batabigeza kuri Perezida wa Repubulika igihe aba yabasuye.

Yabitangaje kuri uyu wa 28 Ukuboza 2022 mu nama yamuhuje n’abayobozi bo mu Ntara y’Iburengerazuba. Mu bitabiriye iyi nama harimo abashinzwe umutekano, abayobozi b’amadini n’amatorero, abayobozi b’uturere, Abanyamabanga Nshingabikorwa b’Imirenge n’utugari n’abahagarariye ibyiciro byihariye.

Iyi nama nyunguranabitekerezo yahuje abayobozi bo mu turere twa Karongi Nyamasheke na Rusizi ibaye nyuma y’iherutse guhuza abo mu turere twa Rutsiro, Nyabihu, Rubavu na Ngororero.

Musabyimana ugiye kumara amezi abiri agizwe Minisitiri w’Ubutegetsi bw’Igihugu yavuze ko hari abayobozi bakira ibibazo by’abaturage ntibabikemure, babona bimaze imyaka myinshi bagakumira abaturage ngo batabigeza kuri Perezia wa Repubulika.

Ati "Ibibazo byabaye inganzamarumbo ntabwo bikwiriye kubaho. Niba binahari uyu munsi, mwese tuve hano dukora gahunda yo gukemura ibibazo by’abaturage. Nzabasura n’aho mukorera ariko ndifuza mbere y’uko mujya kunyereka bya bindi bishashagirana, mujye mubanza munyereke aho mugeze mukemura ibibazo by’abaturage, nicyo kintu cya mbere nshaka ko tuzajya tuganiraho".

Mu bibazo bikunze kubazwa Umukuru w’Igihugu iyo yasuye abaturage hakunze kugarukamo ibibazo by’abaturage bambuwe na ba rwiyemezamirimo.

Minisitiri Musabyimana avuga ko hari abayobozi babeshya abaturage ngo ingengo y’imari yarabuze, nyamara wababaza urutonde rw’abagomba kwishyurwa n’umubare w’amafaranga bagomba kwishyurwa ugasanga ntabyo bazi.

Ati "Ibibazo byo bizahoraho, igihe cyose hakiri abantu ibibazo bizagumaho, ariko ibibazo by’inganzamarumbo ntabwo tubishaka. Mu bibazo bibazwa Perezida nta na kimwe gikwiye kunanirana mu nzego z’ibanze. Ikibazo uko cyaba gikomeye kose cyakemukira ku karere kuko Meya afite ubushobozi bwo guhamagara inzego bireba zigakemura ikibazo".

Umunyamabanga Nshingwabikorwa w’Umurenge wa Murambi mu karere ka Karongi, Uwimana Phanuel, yavuze ko bagiye gufatanya n’izindi nzego bafatanyije kuyobora umurenge bagashiraho uburyo bwo gukemurira hamwe ibibazo.

Ati "Icyo tugiye gukora ni ugufatanya n’izi nzego zose, tuzajya tugenda turi ikipe twicare duce ingando dukemure ibibazo byaho byose. Buri wese akabigira ibye tukabikorera inyandiko kuko burya n’abaturage hari igihe umukemurira ikibazo ntabyishimire ariko kandi wanagikemuye neza, agasigara avuga ngo undi muyobozi uzaza nzakimugezaho, wa muyobozi uzaza ugasanga agikemuye nk’ uko nawe wari waragikemuye".

Abanyamabanga Nshingwabikorwa b’utugari bijejwe gukemurirwa ikibazo cy’umubare muto w’abakozi, umushahara utajyanye n’igihe no kutagira moto nyuma y’uko bagaragarije Minisitiri Musabyimana ko biri mu bituma abaturage batabona serivise zo ku kagari uko bikwiye.

Guverineri w’Iburengerazuba Habitegeko François yagaragaje ko ibijyanye no kwegereza abaturage ibikorwaremezo by’amazi n’amashanyarazi muri iyi ntara biri ku rwego rushimishije kuko muri iyi ntara abafite amazi ari 86,5% barimo 5% bayafite mu ngo. Abafite amashanyarazi bageze kuri 74,7%.

Guverineri Habitegeko yagaragaje ko ku bijyanye n’imitangire ya serivise abaturage benshi bo muri iyi ntara banenga serivise z’ubuhinzi n’ubworozi, asaba abayobozi gushyira imbaraga guha abaturage serivise nziza by’umwihariko izijyanye n’ubuhinzi n’ubworozi.

Minisitiri Musabyimana yavuze ko abayobozi batuma ibibazo by’abaturage biba inganzamarumbo bakwiye kwisubiraho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .