00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Munyangaju yahaye umukoro ikipe y’u Rwanda igiye kwitabira imikino ya Commonwealth

Yanditswe na Karirima A. Ngarambe
Kuya 29 July 2022 saa 08:37
Yasuwe :

Abanyarwanda baserukiye u Rwanda mu mikino ihuza Ibihugu bikoresha Ururimi rw’Icyongereza, Commonwealth, bahize guhesha ishema igihugu mu mikino iteganyijwe kubera mu Bwongereza.

Kuva ku itariki ya 28 Nyakanga kugeza ku ya 8 Kanama, hateganyijwe imikino ya Commonwealth izabera i Birmingham, mu Bwongereza. Iri rushanwa riba buri myaka ine kuva 1930, rihitamo abakinnyi bitwaye neza baturutse mu bihugu 56 bigize Commonwealth.

Bahura mu mikino itandukanye irenga 20, ndetse n’indi mikino irindwi ya Para-siporo [imikino y’abafite ubumuga]. U Rwanda rwitabiriye iyi mikino ya Commonwealth bwa mbere mu 2010. Kuva icyo gihe, hari ibisubizo bitanga icyizere, ariko ntibarakurayo umudari.

Abakinnyi 16 nibo baserukiye u Rwanda, bemererwa kwitabira aya marushanwa mu byiciro bine birimo gusiganwa ku maguru, koga, gusiganwa ku magare na volleyball yo ku mucanga.

Abakinnyi u Rwanda rwohereje i Birmingham higanjemo abakiri bato, aho umuto muri bo afite imyaka 16. Claire Uwitonze niwe muto akaba ari mu bakinnyi batatu bari mu ikipe yiruka, irimo kandi Celine Iranzi na Emeline Manizabayo.

Minisitiri wa Siporo, Munyangaju Aurore Mimosa yibukije aba bakinnyi ko guhagararira igihugu cyabo bakwiriye kubifata nk’ishema.

Ati “Ku bijyanye no guhagararira igihugu cyawe, ntibireba imyaka. Igikenewe ni ukwihangana, gukoresha imbaraga n’ikinyabupfura kugira ngo dushobore guhagararira igihugu cyacu kandi neza.”

Yongeyeho ati "Ni iby’agaciro kuba u Rwanda ruhagarariwe muri iyi mikino n’urubyiruko nka mwe, rwishimira kandi rwiteguye guhagararira igihugu cyabo ku rwego rwo hejuru."

Amakipe yo gusiganwa ku magare mu bagabo no mu bagore nayo yagaragaye mu mwambaro mwiza w’ubururu n’umuhondo ndetse bavuga ko biteguye guhagararira u Rwanda i Birmingham.

Byiza Renus Uhiriwe yagize ati “Twiteguye gutsinda.”

Isiaka Iradukunda yavuze ko ari ishema rikomeye guhagararira u Rwanda mu mikino, kandi ashimira abaturage ba Birmingham kuba barabakiriye neza ndetse bakanubaha ikipe y’u Rwanda.

Abakinnyi b’Abanyarwanda bavuga ko bazashimishwa no kubona Abanyarwanda batuye mu Bwongereza, ndetse no mu nkengero zaho baza kubashyigikira kuko nabo biteguye kubahesha ishema.

Ku wa Gatandatu tariki ya 30 Nyakanga nibwo u Rwanda ruzatangira gukina, ubwo Venutse Gatsinzi na Ntagengwa Olivier bazakina n’ikipe ya Afurika y’Epfo muri Volleyball yo ku mucanga mu bagabo.

Muri Kamena nibwo i Kigali hateraniye intumwa zirenga 4000 ziturutse hirya no hino mur bihugu bigize Commonwealth, mu nama ya CHOGM 2022.

Nyuma yaho imbaraga zose zerekejwe muri Birmingham, mu Bwongereza.

Minisitiri Mimosa yasabye iyi kipe kuzitwara neza
Ikipe y'u Rwanda izahagararira igihugu mu mikino ya Commonwealth

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .