Minisitiri Munyakazi yaburiye urubyiruko rushukishwa akazi rukisanga mu mitwe irwanya igihugu

Yanditswe na Prudence Kwizera
Kuya 6 Ugushyingo 2019 saa 10:57
Yasuwe :
0 0

Umunyamabanga wa Leta ushinzwe Amashuri Abanza n’Ayisumbuye, Dr Munyakazi Isaac, yasabye urubyiruko kwirinda ibishuko by’abarwizeza akazi hanze y’igihugu arugira inama yo gushishoza no kugisha inama.

Yabivugiye mu Karere ka Nyaruguru kuri uyu wa Gatatu ubwo yitabiraga igikorwa cyo gutanga impamyabushobozi n’ibikoresho ku rubyiruko 302 rwasoje amasomo yo kwiga imyuga itandukanye.

Ni urubyiruko rugizwe n’abacikirije amashuri hamwe n’abakobwa batewe inda imburagihe bibaviramo kuva mu ishuri n’abandi.

Bize imyuga itandukanye irimo ubudozi, gutunganya imisatsi no kuboha. Bigishijwe kandi kwihangira imirimo, kuzigama, gukorera hamwe mu matsinda no gucunga umutungo.

Nyuma yo kubashyikiriza imyamyabushobozi zabo no kubaha ibikoresho bijyanye n’imyuga bize, Dr Munyakazi yabagiriye inama yo kwirinda ibishuko.

Yagize ati “Ndagira ngo mbasabe mwirinde, mwirinde cyane icyabasubiza inyuma mu gukora ibigayitse.”

Yavuze ku bashukwa babwirwa ko bagiye guhabwa akazi hanze y’igihugu bakisanga mu mitwe ikirwanya abasaba kubyitondera.

Ati “Urubyiruko rwacu rurashukika aho hari n’ababashuka ngo bagiye kubaha imirimo hanze (…) abadushukira urubyiruko bararutwara bakarujyana mu bikorwa bibi birimo n’ibyo kuza guhungabanya umutekano w’igihugu cyacu.”

Yababwiye ko igihugu kibakunda ari nayo mpamvu kibashyiriraho gahunda zibateza imbere zirimo no kwiga imyuga abasaba guharanira kwiteza imbere no kuba ighugu aho kukirwanya.

Minisitiri Munyakazi yibukije abacikirije amashuri ko bitari amahitamo yabo kuko babitewe n’ibibazo birimo no guterwa inda ariko bakwiye kwirinda kongera kugwa mu bishuko bibicira ubuzima.

Yabasabye kubyaza umusaruro amahirwe babonye yo kugira umwuga bamenya kandi bakawukora neza kugira ngo bizabere barumuna babo urugero rwiza.

Bamwe mu rubyiruko bize imyuga babwiye IGIHE ko ibyo bamenye biteguye kubibyaza umusaruro.

Irankunda Philemon wo mu Murenge wa Nyabimata ati “Ubu nzi kudoda imyenda yose kandi nkabikora neza; baduhaye imashini, umukasi, ibitambaro n’ameza yo gukoreraho. Ubu ngiye gukora mbibyaze umusaruro.”

Ukwizabishaka Jeanne w’imyaka 25 y’amavuko watewe inda ageze mu mwaka wa mbere w’amashuri yisumbuye akareka kwiga, yavuze ko yafashe icyemezo cyo gukoresha amaboko ye akirinda ibishuko.

Ati “Nize kudoda imyenda y’ubwoko bwose, n’iyi kanzu nambaye ni njye wayidodeye. Nsigaye nizigama mu matsinda ubu maze kugira ubwizigame bw’amafaranga arenga ibihumbi 50.”

Umuyobozi w’Umushinga Huguka Dukore Akazi Kanoze, Kamanzi Steven, yavuze ko bamaze kwigisha urubyiruko rurenga ibihumbi 32 mu turere 25.

Ati “Ubumenyi tubaha tububaha dushingiye ku isoko ry’umurimo; turabanza tukiga tukareba ibikenewe mu karere kabo tukaba ari byo duheraho tubigisha.”

Buri umwe mu basoje amasomo y’imyuga yahawe ibikoresho bijyanye n’icyo yize birimo imashini idoda, ibitunganya imisatsi n’ibindi.

Umushinga wo kwigisha urubyiruko imyuga watangiye mu 2016 ukaba uzarangira mu 2021 hamaze kwigishwa abagera ku bihumbi 40 mu turere 25 tw’igihugu.

Bamuritse bimwe mu bikorwa bakora birimo n'imyenda badoze
Bamwe mu rubyiruko bo mu Karere ka Nyaruguru basoje amasomo y'imyuga
Basabwe kubyaza umusaruro ibyo bigishijwe n'ibikoresho bahawe
Buri umwe mu basoje amasomo y’imyuga yahawe ibikoresho bijyanye n’icyo yize
Umunyamabanga wa Leta ushinzwe Amashuri abanza n’Ayisumbuye, Dr Munyakazi Isaac, yasabye urubyiruko kwirinda ibishuko by’abarwizeza akazi
Umuyobozi w’Umushinga Huguka Dukore Akazi Kanoze, Kamanzi Steven, aha ubutumwa abitabiriye iki gikorwa
Umuyobozi w'Akarere ka Nyaruguru, Habitegeko François, ari mu bayobozi bitabiriye iki gikorwa
Urubyiruko rwiyemeje kutera intambwe ijya mbere mu iterambere rishingiye ku bikorwa
Urubyiruko rwahawe impamyabushobozi zigaragaza ibyo rwize
Bahawe n'ibikoresho bizabafasha gushyira mu bikorwa ibyo bize

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza