Minisitiri Mukeshimana yatangije ubwishingizi bw’amatungo n’ibihingwa buzafasha guhangana n’ihindagurika ry’ibihe

Yanditswe na Prudence Kwizera
Kuya 23 Mata 2019 saa 04:48
Yasuwe :
0 0

Minisitiri w’Ubuhinzi n’ubworozi, Dr Mukeshimana Gerardine, yatangije ku mugaragaro gahunda y’ubwishingizi bw’amatungo n’ibihingwa, asaba abahinzi n’aborozi kuyitabira kuko izabafasha kuziba icyuho baterwa n’ihindagurika ry’ibihe.

Yayitangirije mu Murenge wa Mukingo, Akarere ka Nyanza kuri uyu wa kabiri avuga ko ari igikorwa gikomeye kiri mu cyerekezo cy’igihugu cyo kwihutisha iterambere ry’abanyarwanda.

Iyo gahunda ya Leta y’ubwishingizi yiswe ‘Tekana Urishingiwe Muhinzi-Mworozi’ ishyirwa mu bikorwa na Minisiteri y’Ubuhinzi n’Ubworozi (Minagri) ifatanyije n’abafatanyabikorwa batandukanye barimo ikigo cy’ubwishingizi Radiant, Ikigo Access to Finance Rwanda, Prime Insurance Company na Sonarwa.

Kuri ubwo bwishingizi Leta itangira umuturage uruhare rwa 40% nka nkunganire na we akitangira 60%.

Minisitiri Mukeshimana yagize ati “Icyo igamije cyane cyane ni ugufasha abahinzi-borozi guhangana n’imihindagurikire y’ibihe; nk’uko mwagiye mubibona twagiye tugira ibihe bitari byiza tukabura umusaruro tukabura amatungo; ikigamijwe ni ukugira ngo abahinzi n’abarozi babashe guhangana n’ibyo bibazo.”

Yakomeje avuga ko izafasha mu kuzamura umusaruro w’ubuhinzi n’ubworozi.

Ati “Twabonye nk’uriya mubyeyi wagize ubwishingizi bw’itungo rifite agaciro k’ibihumbi 300 FRW akishyura hafi 8 500 FRW ku giti cye harifuzwa ko azamura umukamo akabona amafaranga yatanze ndetse n’arenzeho.”

Yavuze ko bifuza ko ubwo bwishingizi bwafasha kuzamura umusaruro no mu buhinzi kugira ngo abahinzi na bo batere imbere.

Minisitiri Mukeshimana yasabye abazinjira muri gahunda y’ubwo bwishingizi kubukoresha no mu gusaba inguzanyo mu bigo by’imari.

Ati “Murabona nk’umuntu ufite ubwishingizi bw’inka ifite agaciro k’ibihumbi 300 ntabwo banki yatinya kumuha inguzanyo y’ibihumbi 100 cyangwa 150.”

Ku ikubiro gahunda y’ubwishingizi bw’amatungo yatangiye gukorera mu turere twa Nyanza, Gicumbi, Musanze, Ruhango, Nyagatare na Burera.

Naho iy’ubwishingizi bw’ibihingwa izatangira gushyirwa mu bikorwa mu gihembwe cy’ihinga A cya 2020 mu turere twa Gasabo, Nyagatare, Bugesera, Gisagara, Kirehe, Gicumbi, Huye, Rulindo Ngoma, na Rwamagana.

Ku bwishingizi bw’amatungo bwahise butangira gushyirwa mu bikorwa, ikigo cy’ubwishingizi kizajya cyishyura inka zishwe n’impanuka, indwara cyangwa ibyorezo.

Ikiguzi cy’ubwishingizi kingana na 4.5% by’agaciro k’inka mu gihe nkunganire ya Leta ingana na 40% ku kiguzi cy’ubwishingizi.

Nk’uko byasobanuwe ubwo bwishingizi bureba inka z’inzungu n’iz’ibyimanyi, zifite kuva ku minsi 90 zivutse (inyana) kugeza ku myaka umunani (imbyeyi) hatarimo ibimasa.

Inka yose yishingiwe igomba kubarurwa hakoreshejwe ikirango cy’ikoranabuhanga cya RFID.

Umuhinzi-mworozi witwa Pierre Claver Karasira yavuze ko ubwo bwishingizi buje babukeneye cyane kuko hari ubwo bagiraga ibyago bagapfusha amatungo bakagwa mu gihombo.

Ati “Njyewe ubwanjye umwaka ushize napfushije inyana eshanu n’amajigija abiri ku bw’impanuka kuko zari zifite imiti. Iyi gahunda y’ubwishingizi ije kudufasha ubu twasubijwe. Tukimara kuyumva twarishimye twiteguye kuyitabira.”

Umuyobozi w’Akarere ka Nyanza, Ntazinda Erasme, yavuze ko muri ako karere horowe inka zisaga ibihumbi 54 harimo izirenga ibihumbi 23 biteganyijwe ko zizafata ubwo bwishingizi.

Yavuze ko kuva muri Werurwe 2019 batangiye ubukangurambaga mu borozi ku buryo abagera kuri 58 bamaze gufata ubwishingizi bw’amatungo ya bo.

Yagize ati “Tubijeje ko iyi gahunda nziza tuzayibyaza umusaruro mwiza tukagira impinduka zigaragara mu buhinzi n’ubworozi.”

Ubuhinzi n’ubworozi ni bimwe mu bikorwa abikorera badakunze gushoramo imari ariko kuba batangiye ku byinjiramo bitanga icyizere ko bizorohereza n’abahinzi-borozi kubona inguzanyo mu bigo by’imari n’amabanki.

Umuyobozi w’ishyirahamwe ry’abishingizi bigenga mu Rwanda, ASR, Kanamugire Gaudence, yavuze ko bazakomeza gufatanya na Leta kugira ngo ubwishingizi bw’amatungo n’ibihingwa bugere mu turere twose.

Abafatanyabikorwa batandukanye muri gahunda y’ubwishingzi bw’amatungo n’ibihingwa
Aborozi bamwe bo mu Karere ka Nyanza bahise batangira gahunda y'ubwishingizi bw'amatungo
Icyumba cyamurikiwemo uko iyo gahunda y’ubwishingzi bw’amatungo n’ibihingwa izaba iteye
Inka igiye guhabwa ubwishingizi iterwa iherena ku gutwi kw'ibumoso
Minisitiri w'Ubuhinzi n'Ubworozi, Mukeshimana Gerardine yavuze ko iyi gahunda igamije cyane cyane gufasha abahinzi-borozi guhangana n’imihindagurikire y’ibihe
Mu gutangiza gahunda y’ubwishingizi bw’amatungo n’ibihingwa itorero ryasusurukije abari bayitabiriye
Umukozi w'ikigo cy'ubwishingizi Radiant asobanura uko ubwishingizi bw'amatungo buteye n'uko umworozi azabyungukiramo
Umuyobozi w’Akarere ka Nyanza, Ntazinda Erasme
Umuyobozi w’ishyirahamwe ry’abishingizi bigenga mu Rwanda, ASR, Kanamugire Gaudence
Umwe mu bajyanama mu bworozi mu Karere ka Nyanza asobanura uko bafasha aborozi kuvura amatungo
Uwo mukecuru yahise atangira gahunda y'ubwishingizi bw'amatungo ye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza