Minisitiri Mukeshimana yakebuye abatema ibiti bitarakura n’ababiragiramo amatungo

Yanditswe na Hakizimana Jean Paul
Kuya 9 Ugushyingo 2019 saa 05:33
Yasuwe :
0 0

Minisitiri w’Ubuhinzi n’Ubworozi, Dr Mukeshimana Geraldine, yakebuye bamwe mu baturage batema ibiti bitarakura n’abandi babiragiramo ihene n’ayandi matungo abasaba kubiha umwanya bakabirinda kuko imvura n’umwuka mwiza abantu bahumeka uturuka ku biti.

Ubu butumwa yabuhaye abaturage bo mu Karere ka Ngoma mu Murenge wa Rukumberi kuri uyu wa Gatandatu, ubwo yatangizaga igihembwe cyo gutera amashyamba 2019/20 gifite insanganyamatsiko igira iti “Amashyamba ni inkingi y’imibereho myiza y’abaturage.”

Uyu munsi ukaba wahujwe no kwizihiza ku nshuro ya 44 isabukuru yo gutera amashyamba.

Muri uyu murenge hatewe ibiti ibihumbi 16 ku buso bungana na hegitari 80, ibyinshi bikaba ari ibiti bivangwa n’imyaka birimo gerevariya n’ibindi ndetse n’ibindi biti byera imbuto ziribwa hagamijwe guhangana n’ikibazo cy’imirire mibi.

Minisitiri Mukeshimana yagarutse ku kamaro k’amashyamba mu mibereho ya muntu yibutsa abaturage ko imvura n’umwuka abantu bahumeka bituruka ku mashyamba.

Ati “Turabashishikariza kongera imbaraga mu gutera, gukorera no kurinda amashyamba cyangwa ibiti biba byatewe, impamvu y’iki nuko akenshi turatera ugasanga mu miganda nk’iyingiyi abaturage bitabiriye ibiti bigaterwa n’amashyamba agaterwa ariko hashira umwaka cyangwa amezi atandatu ukabona ibyakuze ni bike.”

Yakomeje agira ati “Ndagira ngo mbigarukeho neza kugira ngo ibiti bikure ndabasaba duharanire ko bitaribwa n’ihene cyangwa n’ayandi matungo tubihe umwanya wo kubirinda kugira ngo bikure bitugirire akamaro.”

Yasabye abaturage gutera ibiti bivanze n’imyaka kugira ngo bibafashe kurumbura ubutaka ndetse no kubona umusaruro uturuka ku biti bikenerwa mu buzima bwa buri munsi, yanabashishikarije gukoresha Biogaz n’imbabura za rondereza kugira ngo ibiti bicanwa bigabanuke.

Minisitiri Mukeshimana yasabye kandi abaturage gutera ibiti biribwa nibura buri rugo rukagira ibiti bitatu by’imbuto hagamijwe kurwanya imirire mibi mu bana ndetse no mu baturage bose muri rusange.

Kuri ubu mu gihugu hose hegitari zirenga 700 zihwanye na 30.4% by’ubuso bw’igihugu cyose ziteweho amashyamba nk’imwe mu ntego leta yari yarihaye kugeza mu 2020, naho mu Karere ka Ngoma ubuso buteweho ibiti bukaba bungana na hegitari ibihumbi 10 ku buso bungana na hegitari 12.7

Abaturage bavuga ko zimwe mu mpamvu zituma muri aka karere ibiti bihaterwa bidakura ni uko hakunda kugaragara izuba ryinshi na bike bizamutse bikaragirwamo amatungo n’abantu bamwe na bamwe.

Habanabakize Daniel yagize ati “Ibiti inaha turabitera ariko hari bamwe muri twe babiragiramo amatungo bigatuma bitazamuka, ikindi n’ubutaka bw’inaha usanga kubera izuba ryinshi ridapfa kubyorohera mu mikurire yabyo.”

Mukakayibanda Ferediana we yagize ati “ Hari abantu babyahuramo inka nijoro ku buryo banazishora no mu mirima yacu, kugira ngo ibiti dutera bikure rero ni uko leta idufasha mu guhana abo bantu bonesha amashyamba yacu.”

Ibarura riheruka gukorwa mu 2016 ryagaragaje ko amashyamba y’abaturage ari ku kigereranyo cya 67% y’ubuso, aya leta akaba ku kigereranyo cya 33%, ryagaragaje kandi ko amashyamba y’abaturage afashwe nabi kandi afite umusaruro muke.

Abaturage batahanye ibiti byo gutera iwabo mu rugo
Minisitiri Mukeshimana yuhira igiti yari amaze gutera
Minisitiri Mukeshimana aganira n'Umuyobozi w'Akarere ka Ngoma, Nambaje Aphrodis
Minisitiri Mukeshimana yabwiye abaturage ko bagomba kwirinda kuragira amatungo mu biti byatewe
Umuyobozi w'Akarere ka Ngoma, Nambaje avuga ko hegitari zisaga 12 ziteweho ibiti mu Karere ka Ngoma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza