00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Mbabazi yibukije urubyiruko ko atari indorerezi mu kubaka u Rwanda

Yanditswe na Idukunda Kayihura Emma Sabine
Kuya 7 Mutarama 2023 saa 12:31
Yasuwe :

Minisitiri w’Urubyiruko n’Umuco, Rosemary Mbabazi, yibukije urubyiruko rw’u Rwanda ko atari indorerezi mu gihugu cyarwo, ahubwo ko ari abafatanyabikorwa b’ingenzi mu kubaka u Rwanda.

Ni ubutumwa yatangiye mu muhango wo gutangiza Isangano ry’Urubyiruko rwo mu Mujyi wa Kigali (Kigali Youth Festival), wabaye kuri uyu wa 6 Mutarama 2023, ribera kuri Stade ya IPRC Kigali, iki gikorwa kikazasozwa kuwa 31 Mutarama 2023.

Kigali Youth Festival yitabiriwe n’urubyiruko rwibumbiye mu makoperative harimo abamotari, Urubyiruko rw’Abakorerabushake (Youth Volunteers), abakarani, abanyonzi, abafotora, abatunganya imisatsi, abahoze ari abazunguzayi, abadoda inkweto ndetse n’abandi.

Insanganyamatsiko yayo igira iti ‘‘Tujye ku Rugerero twubate u Rwanda twifuza.’’

Uyu muhango witabiriwe n’abayobozi bo mu nzego zitandukanye barimo Minisitiri w’Urubyiruko n’Umuco, Rosemary Mbabazi, wari umushyitsi mukuru, Umuyobozi Mukuru w’Urwego rw’Igihugu Ngishwanama rw’Inararibonye, Tito Rutaremara, Abayobozi Nshingwabikorwa b’Uturere tugize Umujyi wa Kigali, ndetse n’abandi batandukanye.

Minisitiri Rosemary Mbabazi yabwiye uru rubyiruko ko igihugu kibatekerezaho kuko abakiyobora nabo bahoze ari urubyiruko, bityo ko kizi ibibazo byabo, ariko abasaba kutaba indorerezi ahubwo bakagira umurava mu kubaka u Rwanda kuko ari na bo bazaruyobora mu myaka iri imbere.

Ati ‘‘Ntabwo muri indorerezi mu gihugu cyanyu, muri abafatanyabikorwa b’ingenzi cyane kuko ntabwo muri u Rwanda rw’uyu munsi gusa, muri n’urw’ejo.’’

Minisitiri Mbabazi yanabwiye uru rubyiruko ko iyo ushaka iterambere utita ku ho uvuka cyangwa aho ukomoka, ahubwo ko ufata amahirwe ufite ukayakoresha mu kwiyubaka no kubaka igihugu cyawe.

Muri uyu muhango, Tito Rutaremara yaganirije uru rubyiruko arusangiza amateka y’u Rwanda , uko abaturage barwo bari babanye mbere y’ubukoloni, uko babayeho mu bukoloni bwanabazanyemo amacakubiri yagejeje u Rwanda kuri Jenoside yakorewe Abatutsi, aho u Rwanda rugeze rwiyubaka ndetse n’intumbero rufite.

Amaze kubabwira uko Ingabo zari iza RPA zabohoye igihugu zikanashaka uko zicyubaka ubu kikaba gitangarirwa n’amahanga kubera iterambere gifite, yabibukije ko bagomba gukora cyane kuko abakoze ibyo nabo bari urubyiruko.

Ati ‘‘Ibi bitekerezo mbabwira byazanwe n’urubyiruko, urubyiruko nkamwe. Abo bantu ba RPF mwumva, rwari urubyiruko. Bariya mureba ba Jenerali, bari muri za 20 (mu myaka 20), Perezida wacu yari afite 31, na Fred.’’

Rutaremara yibukije uru rubyiruko umwanya rufite muri Politike y’u Rwanda, ababwira ko urwo rubyiruko rwazaniye u Rwanda iterambere rwishakishije kuko ntaho rwari rwarakuye amahirwe, ariko ko ubu uruhari ruyafite kuko rufite Leta ibazi, Leta yavuye mu rubyiruko, izi akamaro k’urubyiruko icyo ari cyo.

Igikorwa cya Kigali Youth Festival cyateguwe n’Umujyi wa Kigali ku bufatanye na Minisiteri y’Urubyiruko n’Umuco, Urwego rushinzwe Intwari z’Igihugu, Imidari n’Impeta by’Ishimwe (CHENO), Inama y’Igihugu y’Urubyiruko, Inzego z’Umutekano n’izindi nzego.

Kizamara iminsi 25 gikorwemo ibikorwa bitandukanye bigamije gushyira hamwe urubyiruko mu kurufasha mu mikino, imyidagaduro n’ibindi bizaba byateguwe.

Hazaberamo kandi siporo rusange igenewe urubyiruko n’abandi barushyigikiye, amarushanwa mu mikino izahuza abanyeshuri biga mu mashuri yisumbuye na za kaminuza n’ibindi byiciro, kuzamurika ibikorwa by’urubyiruko byabateza imbere, umuganda rusange uzakorwa n’urubyiruko, kubakira abatishoboye ndetse n’ibindi.

Urubyiruko rwitabiriye Kigali Youth Festival rwibukijwe ko ari abafatanyabikorwa b'ingenzi mu iterambere ry'u Rwanda
Uyu muhango watangijwe n'umukino wahuje ikipe y'abamotari (bambaye umuhondo) na Youth Volunteers, urangira abamotari batsinzwe ibitego 5 ku busa
Tito Rutaremara yibukije urubyiruko ko ababohoye u Rwanda banganaga nabo arusaba kubigana
Riderman uri mu bahanzi basusurukije abitabiriye Kigali Youth Festival, yifashishije indirimbo ye 'Igicaniro' abwira urubyiruko ko buri wese afite itara adakwiriye kureka ngo rizime
Itsinda rya Symphony Band ryasusurukije abitabiriye Kigali Youth Festival
Minisitiri Mbabazi yibukije urubyiruko ko atari indorerezi mu kubaka u Rwanda

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .