Minisitiri Mbabazi yasabye abarangije amasomo muri Gahunda ya ‘Igire’ gushyira umutima ku byo bakora

Yanditswe na Ndayikunda Josué
Kuya 22 Ugushyingo 2019 saa 08:44
Yasuwe :
0 0

Minisitiri w’Urubyiruko n’Umuco, Mbabazi Rosemary, yasabye abanyeshuri barangije amasomo y’igihe gito muri Gahunda ya Banki y’Ubucuruzi ya KCB ya ‘Igire’, gushyira imbaraga ku byo bakora.

Yabigarutseho ku wa Kane, tariki ya 21 Ugushyingo 2019, mu muhango wo gutanga Impamyabumenyi ku banyeshuri 200 barangije amasomo y’amezi atandatu mu byiciro bitandukanye mu mashuri makuru y’imyuga n’ubumenyi ngiro.

Muri uyu muhango kandi hahembwe imishinga 10 yahize iyindi mu marushanwa yari yakozwe mu bihe bitandukanye, aho buri umwe wahawe miliyoni 3Frw.

Urubyiruko rwasoje amasomo y’igihe gito rwaturutse mu mashuri makuru y’imyuga n’ubumenyi ngiro arimo IPRC ya Kigali, Ngoma, Huye na Gishari.

Ni ku nshuro ya kabiri abanyeshuri barangije amasomo y’igihe gito muri gahunda ya KCB ya ‘Igire’ bahabwa impamyabumenyi.

Mu gihe bamara bigishwa bahabwa ubumenyi bujyanye no gukoresha ikoranabuhanga, ubukanishi, gusudira, guteka no gukora amakaro ku bufatanye na DOT Rwanda.

Minisitiri Mbabazi Rosemary yasabye urubyiruko rusoje amasomo gushyira umutima ku byo rukora, anarwibutsa ko u Rwanda ari urwabo ntawe barusiganira.

Yagize ati “Icya mbere na mbere ni ugukotana ni byo mugiye gukora, turasaba ko mushyira umutima ku byo mukora atari uko mwahembwe ahubwo n’abatabonye ibihembo mufite ibikorwa bifatika mushobora gushyira mu bikorwa. Igihugu ni icyanyu nta we mugisiganira, n’ibyo mukora ni ibyanyu ntawe mubisiganya.’’

Yanasabye abasoje amasomo gushyira imbaraga mu byo bagiye gukora no kwerekana akarusho ngo batazatenguha abashyize imbaraga mu kubafasha gushyiramo amafaranga n’igihugu cyagize uruhare mu gushaka abafatanyabikorwa.

Umuyobozi wa KCB mu Rwanda, George Odhiambo, yavuze ko hari ibindi bikorwa bashoboraga gushyiramo amafaranga ariko bahisemo gufasha urubyiruko kuko bazi ko narwo ruzaremera abandi imirimo.

Ati “Turabizi ko hari ahandi hantu twashora amafaranga nko mu kubungabunga ibidukikije, gutera ibiti cyangwa ikinamico abantu bakishima, ariko intego yacu ni ugukomeza urubyiruko kuko iyo urushyigikiye uba ushyigikiye sosiyete yose. Aba banyeshuri bungutse ubumenyi, bazakorera amafaranga na bo batange akazi ku bandi.”

Uwamahoro Amida uri mu bahawe miliyoni 3 Frw nyuma y’uko umushinga afatanyije na bagenzi be w’ubukorikori uri mu yatsinze, avuga ko amafaranga bahawe azabafasha kubona aho bakorera habo bwite.

Yagize ati “Ibibazo byari byinshi kuko nta mafaranga twari dufite, twakoraga inkweto tukajya gushaka abantu bafite imashini kugira ngo badufashe turebe ko yarangira. Ubu aya mafaranga agiye kudufasha kujya dukora inkweto ikava mu ruganda rwacu yuzuye neza no kubona aho dukorera hacu bwite.”

Mu banyeshuri 200 basoje amasomo yabo harimo abakobwa batatu bakurikiranye amasomo y’ubukanishi n’undi umwe wize ibijyanye no gusudira.

Aba bakobwa bakora ibijyanye n'ubukorikori bahamya ko amafaranga bahawe azabafasha byinshi
Aba nabo bifataga amafoto y'urwibutso
Aba ni bamwe mu batsindiye miliyoni 3 Frw nyuma yaho imishinga yabo ihigitse indi
Ababyeyi nabo banyuzagamo bagafata amafoto
Ababyeyi nabo bari baje kwifatanya n'abana babo muri ibi birori
Abanyeshuri bagera kuri 200 nibo basoje amasomo y'igihe gito
Abasoje amasomo bagiye bahabwa impamyabumenyi
Akanyamuneza kari kose ku basoje amasomo
Bamwe ntibahishaga ibyishimo bya bagenzi babo nyuma yo kumva ko imishinga yabo iri mu yatsinze
Byari ibyishimo nyuma y'ibirori
Byukusenge Marie Giselle umukobwa umwe rukumbi mu basoje amasomo wize gusudira
DSC 0164
George Odhiambo ahamya ko ubumenyi abasoje amasomo bungutse buzabafasha guhanga imirimo iha n'abandi akazi
Ubwo abasoje amasomo n'abayobozi bafataga ifoto y'urwibutso
Ibyishimo byari byabasaze
Imbamutima zari nyinshi nyuma yo gutsinda
Imiryango inshuti n'abavandimwe b'abanyeshuri basoje amasomo bari babukereye
Imishinga yahize iyindi yahawe miliyoni 3 buri umwe
Minisitiri Mbabazi yasabye abasoje amasomo gushyira umutima kubyo bazakora bagakotana
Ibirori byabereye mu nzu mberabyombi ya Maison de jeune Kimisagara
Bose bavuze imyato KCB yazanye gahunda ya Igire
Uyu we acyumva ko umushinga we uri mu yatsinze ntiyabyiyumvishaga
Aba banyeshuri bafashanyaga kwambara neza kugira ngo baseruke bacyeye
Aba ni bamwe mu bakobwa batatu mu basoje amasomo babashije kwiga ibijyanye n'ubukanishi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .