Minisitiri Hakuziyaremye yagaragaje igisubizo cy’imishinga y’urubyiruko ihera mu bitekerezo

Yanditswe na Akayezu Jean de Dieu
Kuya 22 Nzeri 2019 saa 07:41
Yasuwe :
0 0

Minisitiri w’Ubucuruzi n’Inganda, Hakuziyaremye Soraya, yatangaje ko gahunda yo guhuriza hamwe urubyiruko rufite imishinga itanga icyizere rugahugurwa ku buryo bwo kuyinoza no kuyishyira mu bikorwa ari kimwe mu byakemura ibibazo by’ihera mu bitekerezo.

Yabigarutseho ku wa 22 Nzeri 2019, mu muhango wo guhemba urubyiruko rwatsinze mu marushanwa ya ‘Innovation4IndustryRw Hackon’, yitabiriwe n’ab’abahanga mu guhanga udushya twakemura ibibazo biri mu nganda.

Aya marushanwa yatangijwe n’Ikigo cy’Igihugu cy’Ubushakashatsi n’Iterambere mu nganda, NIRDA, ku bufatanye n’Ishami ry’Umuryango w’Abibumbye rishinzwe Iterambere mu Rwanda, UNDP.

Abitabiriye ni urubyiruko rufite imishinga ikiri ibitekerezo n’iyatangiye gushyirwa mu bikorwa igikeneye ubufasha mu bw’ubujyanama n’inkunga y’amafaranga.

Bamaze iminsi itatu bari kumwe n’ababafasha kunononsora imishinga yabo mbere yo kuyimurikira abagize akanama nkemurampaka kuri iki Cyumweru katoranyije abahize abandi.

Bari mu matsinda 37, arimo atandatu yahawe ibihembo birimo irya mbere ryegukanye miliyoni 2 Frw n’andi yahawe miliyoni 1Frw. Aba bose bazanahabwa amahugurwa y’amezi atatu bari mu kigo cyabugenewe.

Ni mu gihe leta ikomeje gushishikariza Abanyarwanda by’umwihariko urubyiruko guhanga udushya bifashishije ikoranabuhanga gusa abenshi bakunze kugaragaza ko babura ubushobozi mu buryo bw’igishoro kugira ngo bashyire mu bikorwa ibitekerezo byabo byatanga ibisubizo ku bibazo bigaragara mu rwego rw’inganda.

Minisitiri Hakuziyaremye yavuze ko iyi ari imwe mu mpamvu hatekerezwa ku guhuza ba rwiyemezamirimo bafite ibitekerezo by’umwihariko ibitarashyirwa mu bikorwa kugira ngo ba nyirayo bahugurwe, barushanwe noneho abazatsinda bahabwe ibihembo ariko banakurikiranwe.

Yakomeje avuga ko abatsinze muri aya marushanwa bazakomeza gukurikiranwa kandi n’abatabashije gutsinda bazashakirwa amahirwe kugira ngo imishinga yabo itazahera mu bitekerezo.

Ati “Imishinga yose abantu bafite ntabwo izashyirwa mu bikorwa, ariko mu gihe twabafashije nk’ubu muri iyi minsi itatu, aya makipe yose uko ari 37 bagize amahugurwa yo kugira ngo babigishe niba ufite umushinga ukiri igitekerezo icyo wakora ngo ushyirwe mu bikorwa.”

“Ikindi kandi abatsinze bazashyirwa mu kigo cyagenewe amahugurwa [Incubation center], berekwe uko bashobora gushyira mu bikorwa imishinga yabo ndetse banahuzwe n’abaterankunga aho bizaba ngombwa.”

Abegukanye ibihembo barimo itsinda ry’Abanyeshuri bo muri IPRC Tumba bakoze imashini yitwa ‘Smart Urwina’ izajya ifasha abaturage n’abafite inganda gutara ibitoki. Uyu mushinga wabo wabaye uwa mbere uhembwa miliyoni 2 Frw.

Smart Urwina ni imashini yifashishwa mu gutara ibitoki, uwayikoresheje aba ashobora gushyira ibitoki mu mashini noneho akajya agenzura akamenya ubushyuhe cyangwa ubukonje bigezeho noneho byashya ya mashini ikabikumenyesh. Ikindi kandi ngo ibitoki bishobora kumara iminsi itanu cyangwa ine bitewe n’ubushyuhe washyizemo.

Umwe mu bagize iri tsinda, Uwase Marie Aimée, yabwiye IGIHE ko “Umushinga wacu ugamije kugira ngo umuhinzi w’ibitoki ajye atara ibitoki bye bimare igihe ashaka kandi ntihabeho kwangirika kuko uburyo gakondo buba bufite ibibazo birimo gutema no kudahira igihe.”

Yakomeje avuga ko nyuma yo guhabwa igihembo bagiye kucyifashisha mu gushaka uko bashyira mu bikorwa umushinga wabo bafashijwemo n’abafatanyabikorwa barimo NIRDA, yabemereye amahugurwa y’amezi atatu.

Abandi begukanye ibihembo barimo itsinda rifite umushinga witwa ‘Haute Baso’ wo gukora imyenda hifashishijwe ibisigazwa by’ibisheke.

Indi mishinga yahembwe irimo Reusable Life Water Recycling Ltd, Affinity Engineering, Step Forward Innovators Gas Technology na Umurinzi Company Ltd.

Umuyobozi Mukuru wa NIRDA, Kampeta Sayinzoga, yavuze ko ikigambiriwe atari amarushanwa ahubwo bifuza ko urubyiruko ruzana ibitekerezo byarwo by’umwihariko ibyibanda ku gukoresha ikoranabuhanga mu guhanga udushya tw’ibikorerwa mu Rwanda.

Yakomeje avuga ko “Abatabashije gutsinda na bo tuzakomeza kubaba hafi kuko abaje hano bose bafite imishinga myiza. Rero hari igihe n’ejo wakumva tuguhamagaye igihe hazagenda haboneka amahirwe atandukanye ajyanye n’ibitekerezo byose byagaragajwe.”

NIRDA ivuga ko kugira ngo hashyirwe mu bikorwa gahunda y’Igihugu yo kwihutisha Iterambere (NST1) igihugu kigomba kuba gifite abahanga udushya mu by’inganda binyuze mu gukoresha ikoranabuhanga.

Abayobozi bitabiriye igikorwa cyo guhemba urubyiruko rufite imishinga itanga icyizere cyo gukemura bimwe mu bibazo bikiri mu nganda
Kampeta uyobora NIRDA yavuze ko bazakomeza gukurikirana imishinga yitabiriye iri rushanwa
Minisitiri Hakuziyaremye yijeje ko leta izakomeza gushyira imbaraga mu gushakisha imishinga y'urubyiruko no kuyiteza imbere
Uwase Marie Aimée bagaragaza imikorere y'umushinga wabo wa Smart Urwina
Bagiye bakora mu matsinda, abitabiriye bari bagabanyijemo agera kuri 37
Bamwe mu bitabiriye amarushanwa batunganya neza imishinga yabo
Mbere yo kurushanwa babanje guhabwa inama n'abahanga mu by'inganda, aha Kampeta uyobora NIRDA nawe yarimo akurikirana uko biri gukorwa
Minisitiri Hakuziyaremye n'abandi bayobozi bashyikiriza sheki uhagarariye itsinda ry'abanyeshuri bo muri IPRC Tumba ryakoze imashini izwi nka Smart Urwina, itara ibitoki
Abahawe ibihembo bafashe ifoto y'urwibutso n'abayobozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza