00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Gatabazi yahumurije aborozi bangirizwa n’inyamaswa ziva muri Pariki ya Gishwati -Mukura

Yanditswe na Nsanzimana Erneste
Kuya 21 January 2022 saa 08:39
Yasuwe :

Minisitiri w’Ubutegetsi bw’Igihugu, Gatabazi Jean Marie Vianney, yahumurije abarozi bororera mu nkengero za Parike ya Gishwati-Mukura bamaze igihe bicirwa amatungo n’inyamaswa zituruka muri iyi pariki.

Izi nyamaswa zica imitavu, zikanakomeretsa bamwe mu borozi. Gatabazi yavuze ko hari inama zatanzwe kandi ubuyobozi bugiye kujya bwihutisha igikorwa cyo kwishyura abangirijwe n’izo nyamaswa anabashishikariza gushaka ubwishingizi bw’amatungo yabo.

Ati “Turifuza ko abaturage baba inshuti na parike ndetse n’inyamaswa ziyirimo zikaba inshuti n’abaturage ku buryo ku kibazo cy’inyamaswa ziva muri Parike zikajya kurya amatungo y’abaturage hari ibyo ubuyobozi bwa parike bwatugaragarije ndetse batweretse n’ingamba bafite zo kubirinda.”

Gatabazi asobanura ko abaturage bafite amatungo yariwe n’inyamaswa, bajya batangira raporo ku gihe, abafite imitavu bakayubakira ibiraro kuko inyamaswa zitazapfa kuyisanga mu biraro, abashumba nabo bagakora uburinzi bw’ijoro.

Umworozi wo mu Murenge wa Kigeyo witwa Gasasira Majoro Philippe, yagaragaje igihombo baterwa n’inyamaswa zirya amatungo yabo.

Ati “Hari inyamaswa yadutse ituruka muri parike ikajya igenda yica imitavu mu bihe bitandukanye, ikajya iza rimwe na rimwe cyangwa ikamara iminsi itaza, ikica imitavu iyihereye inyuma mu matako igakuraho inyama, ikanakuramo ibyo mu nda. Ni ikibazo gikomeye, aborozi turababaye cyane kuko ni cyo gishoro cy’umworozi.”

Aborozi bavuga ko nubwo hari ikigega cya Leta cyishyura ibyangijwe n’inyamaswa zo muri pariki, batinda kwishyurwa kandi inka zabo zigahabwa agaciro gake, kuko bazibarira agaciro nk’inyarwanda kandi ari ingweba.

Kuva muri Kanama 2020, RDB imaze kwakira ibibazo by’inka 99 zariwe n’inyamaswa, ihene icyenda, intama 10 n’ibindi bibazo 49 by’imyaka y’abaturage yonwe n’inyamaswa. Umuntu umwe ni we wakomerekejwe n’inyamaswa muri ibyo bihe.

Inyamaswa zirya amatungo y’abaturage zirimo Impyisi, Imbwa, Ingunzu, Imondo n’Urutoni.

Abaturage baturiye Pariki ya Gishwati bahangayikishijwe n'inyamaswa zibonera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .