00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Dr. Bizimana yashimye igitabo kivuga kuri Jenoside i Murambi akangura abagifite urwango

Yanditswe na Cyprien Niyomwungeri
Kuya 16 July 2022 saa 01:53
Yasuwe :

Minisitiri w’Ubumwe bw’Abanyarwanda n’inshingano mboneragihugu, Dr. Bizimana Jean Damascène, yashimye igitabo ‘Murambi, le Livre des Ossements’, cya Boubakar Boris Diop, yibutsa ko akwiye kumurikira abagifite imvugo z’urwango zihembera Jenoside.

Umwanditsi wo muri Sénégal, Boubacar Boris Diop, ku mugoroba wo kuri uyu wa Gatanu yamuritse igitabo kivuguruye yise ’Murambi, le livre des ossements’, kivuga kuri Jenoside yakorewe Abatutsi i Murambi mu Karere ka Nyamagabe.

Tariki 21 Mata 1994, ni umunsi utazibagirana i Murambi kuko ni bwo hiciwe Abatutsi barenga ibihumbi 50 bari bavuye Mudasomwa, Kinyamakara, Musebeya, Muko no mu yandi ma komini.

Aha i Murambi ni ho hanabaye inkambi y’ingabo z’Abafaransa muri Zone Turquoise, aho bavugaga ko baje gucungira umutekano abatutsi bicwaga ariko si ko byagenze kuko Abatutsi bake bari bararokotse bagiye i Murambi ariko bagashimutwa, bakicwa n’interahamwe kandi Abafaransa ntacyo babikoragaho.

Bamwe mu Bafaransa basambanyije abakobwa n’abagore b’abatutsi ku ngufu, banakora ibindi byaha bitandukanye.

Bwa mbere iki gitabo cyasohotse mu 2000, kigaruka ku nkuru y’umugabo Cornelius Uwimana, uvuka i Murambi wabaga mu buhungiro muri Djibouti akaza gutahuka nyuma ya Jenoside agasanga umuryango we wose warishwe.

Akigera mu Rwanda yagerageje gusobanuza urupfu rw’umuryango we no kwandika ku byabaye i Murambi. Cornelius yaje gusobanukirwa ko ibyabaye bikomoka ku kubura ‘ubumuntu’, yiyemeza kuba umuhamya w’amahano ya Jenoside yabaye.

Boris Diop yavuze ko yatewe umuhate wo kwandika kuri Jenoside yakorewe Abatutsi no guhora yibaza uburyo abantu bashishikazwa no kumenya iby’ahandi ariko ibyo ku mugabane wabo ntibabihe agaciro.

Yavuze ko kwandika iki gitabo byari bikomeye cyane bitewe n’ibikirimo kandi azakomeza guharanira ko ukuri kw’amateka asharira u Rwanda rwanyuzemo kumenyekana kuko hari abakomeje umugambi wo guhakana.

Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène, yashimiye abanditsi bose badahwema guharanira ko ukuri kuri Jenoside yakorewe Abatutsi mu 1994, kujya ahabona.

Yavuze ko igitabo cya Boris Diop ari kimwe mu byagize uruhare rwo gutuma Isi yose imenya byinshi kuri jenoside yakorewe abatutsi kandi gikomeje gutanga umucyo kuri ayo mateka, amushimira uburyo akomeje kubera ijwi u Rwanda ku ruhando mpuzamahanga.

Boris Diop yahaye Minisiteri y’Ubumwe bw’Abanyarwanda n’Inshingano Mboneragihugu impano y’ibitabo 500. Minisitiri Dr Bizimana yamwijeje ko iyi Minisiteri izakora ibishoboka byose bigasomwa, bigakwirakwizwa kandi bigasobanurirwa urubyiruko.

Ati “Igitabo cyawe kiratuma urubyiruko rusobanukirwa ko u Rwanda rwacu rwavuye kure, kandi rurimo kugana kure mu nzira yo kongera kwiyubaka”.

Dr Bizimana yavuze ko ibitabo nk’icya Boris Diop ari intwaro yo guhangana n’abakomeje guhakana no gupfobya Jenoside, no kubwira amahanga ngo yitonde kugira ngo ibyabaye mu Rwanda bitagira ahandi biba.

Hari abatarakuye isomo ku byabaye mu Rwanda

Minisitiri Dr Bizimana yerekanye ko ibyabaye mu Rwanda hari ibihugu bitasigiye isomo aho n’uyu munsi usanga hari amagambo n’ibikorwa by’urwango biganisha kuri Jenoside bihari. Yatanze urugero rw’ibirimo gukorerwa abatutsi muri RDC amahanga arebera.

Ati “Tuzirikana abantu nka Boubacar Diop baduherekeza mu nzira yo kubwira Isi ngo ‘mwitonde’ kuko jenoside ishobora kongera kuba ahari ho hose ku Isi mu gihe ingengabitekerezo y’urwango yaba ikomeje gushyigikirwa”.

Yakomeje avuga ko ababiba urwango bakwiye guhanwa kugira ngo bibere isomo abandi ryuko ‘ikiremwamuntu gikeneye kubaho kidakeneye Jenoside’.

Dr Bizimana yavuze ko Jenoside yakorewe Abatutsi mu yari Gikongoro atari impanuka ahubwo ari umugambi wateguwe igihe kirekire ashingiye ku bwicanyi bwibasiye Abatutsi mu 1963 nyuma y’inama yahuje Perefe Nkeramugaba n’abandi bategetsi iyobowe n’uwari Minisitiri w’Ubutegetsi bw’Igihugu, Rwasibo Jean Baptiste.

Hari kandi ingero nyinshi z’abagiye bakora raporo bagaragaza ko hari umugambi mubisha wo kurimbura abatutsi, bashingiye ku bikorwa byo kubica, kubatwikira n’ibindi bakorerwaga.

Mukagasana Yolande washinze umuryango ukora ubushakashatsi kuri Jenoside yakorewe Abatutsi ukanarwanya abayipfobya n’abayihakana (Yolande Foundation), yavuze ko Boris Diop kimwe n’abandi banditsi kuri Jenoside bahuye n’inzitizi ariko yagumanye n’u Rwanda n’abanyarwanda.

Yitanzeho urugero rw’igihe yandikaga igitabo cya gatatu agasaba Boris Diop gushyiramo inyandiko ariko uwagikosoye ayibonyemo asaba ko ivamo kuko yavugaga kuri Perezida François Mitterand, bitagenda gutyo igitabo ntigisohoke.

Ati “Ntabwo byoroshye kuvuga Jenoside…Iyo tuvuga Jenoside duha n’abandi ubumuntu, erega n’abajenosideri tubaha ubumuntu, tubavana ibuzimu tukabazana ibuntu, bakamenya ko bakoze ibidakorwa, tukabafasha kongera kuba abantu. Ntihakagire ucecekesha uvuga jenoside”.

Mukagasana yasabye ko hakorwa ibishoboka byose igitabo cya Boris Diop kigashyirwa no mu Kinyarwanda n’izindi ndimi nk’Igiswahili kugira ngo kigishe ibihugu byo muri Afurika n’ahandi bikomeje kwerekana ko ntacyo byigiye kuri jenoside yakorewe abatutsi.

Igitabo ‘Murambi, le Livre des Ossements’ kimaze gushyirwa mu ndimi 17 zirimo 9 zo muri Afurika.

Boubacar Diop wanditse igitabo Murambi, le Livre des Ossements kivuga kuri Jenoside yakorewe Abatutsi i Murambi
Boubacar Diop yahaye Minisiteri y'ubumwe n'inshingano mboneragihugu ibitabo 500
Boubacar Diop avuga ko yagiye ahura n'inzitizi ariko zitamuciye intege zo kumenyekanisha amateka mabi u Rwanda rwanyuzemo
Boubacar Diop arimo gusinya mu bitabo byaguriwe muri uyu muhango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .