Minisitiri Busingye yashishikarije Abanyarwanda kuyoboka abunzi aho kugana inkiko

Yanditswe na Ishimwe Israel
Kuya 21 Ugushyingo 2019 saa 06:06
Yasuwe :
0 0

Minisitiri w’Ubutabera akaba n’Intumwa Nkuru ya Leta, Johnston Busingye, yavuze ko u Rwanda rushyize imbere uburyo bw’ubuhuzabwunzi aho Abanyarwanda bakwiye kwishakamo imbaraga zikemura ibibazo bafitanye kuko aribyo bitanga umwanya wo gukora ibifitiye Abanyarwanda akamaro.

Yabigarutseho kuri uyu wa 21 Ugushyingo 2019 mu kiganiro n’itangazamakuru gitegura ibikorwa by’icyumweru cy’Abunzi.

Iki Cyumweru kizatangira ku wa 25 kugeza ku wa 30 Ugushyingo 2019, kizizihizwa mu nsanganyamatsiko igira iti “Dushyigikire uburyo bwo gukemura amakimbirane mu mahoro, twubake u Rwanda twifuza.”

Minisitiri Johnston Busingye yavuze ko ibibazo byinshi bikemukira mu bunzi bitaragera mu nkiko kandi ariwo muco ukwiye gushyigikirwa.

Ati “Abunzi bafite akamaro, ubuhuzabwunzi bwa Kinyarwanda bwagiye abantu bakibushaka, aho bwagarukiye bwari bukenewe. Ni byiza ko abantu bayoboka ubuhuzabwunzi. Ibibazo bitangwa ibirenga 70% birangirira mu bunzi, ku rwego rw’utugari n’imirenge.’’

Minisitiri Busingye yavuze ko hari uburyo bwinshi bwo gukemura amakimbirane, burimo ubunyuze mu mahoro cyangwa hakitabazwa inkiko.

Yakomeje avuga ko ‘‘Ubwa gatatu ni uburenga ku mategeko burimo kwihanira, kurwana, hari n’abajya mu bapfumu kwihimura. Icyo dushyize imbere, ni uko Umunyarwanda akwiye kugerageza kwishakamo ingufu, ubushobozi n’ubwenge bwo gukemura ikibazo yagiranye na mugenzi we kuko bitanga umwanya wo gukora ibifitiye Abanyarwanda akamaro.’’

Yasobanuye ko ikibazo cyageze mu rukiko gisaba umwanya kuko usibye kumenya igihe urubanza ruzabera bigoye kumenya uko bizakorwa.

‘‘Imanza si umushinga ufitiye akamaro igihugu. Sindabona imanza zishyirwa mu bizamura ubukungu bw’igihugu. Turashaka ko umuco wacu wa wundi wigiza nkana yaboneka, ibintu bigasobanuka, abantu bagakora ibintu byubaka. Biradusaba gukangurira Abanyarwanda kwishakamo imbaraga n’ubutwari bwo gukemura ibibazo mu mahoro kuko nibyo bibaha amahirwe menshi. Abanyarwanda bakwiye kugira ubutwari, ukuri, ubushishozi bwo gukemura amakimbirane.’’

Mu cyumweru cyahariwe ibikorwa by’Abunzi, hazakorwa ubukangurambaga bwo kwirinda amakimbirane no gushishikariza abantu kuyoboka ubuhuzabwunzi.

Muri buri murenge abakozi ba MAJ bazahasura baganire n’abaturage bafitanye ibibazo bihabwe umurongo wo kubikemura vuba.

Biteganyijwe kandi ko muri buri karere, hazabera ikinamico zitanga ubutumwa bujyanye no gukemura ibibazo mu mahoro.

Muri uyu mwaka, mu Rwanda abunzi bakiriye ibibazo by’abaturage 48 000 bakemura 47 000 bingana na 97%. Mu Rwanda habarizwa abunzi bagera ku bihumbi 18, baburanisha imanza ziri munsi y’agaciro ka miliyoni 3 Frw.

Umwaka ushize wa 2017/2018 urwego rw’abunzi mu gihugu hose rwaciye imanza ibihumbi 49 528 bingana na 97,3% .

Komite y’Abunzi ni urwego rushinzwe kunga ababuranyi igihe cyose mbere y’uko bagera mu rukiko ruburanisha mu rwego rwa mbere ibirego.

Icyumweru cyahariwe ibikorwa by’Abunzi cyateguwe ku bufatanye bwa Minisiteri y’Ubutabera n’iy’Ubutegetsi bw’Igihugu kizatangirizwa mu Karere ka Kayonza, ku wa 26 Ugushyingo 2019.

Minisitiri Busingye yashishikarije Abanyarwanda kuyoboka abunzi aho kugana inkiko
Minisitiri Busingye yaganiriye n'itangazamakuru ari kumwe n'Umuyobozi Mukuru Ushinzwe Imikorere n'Imiyoborere y'Inzego z'Ibanze muri Minaloc, Gakire Bob

Amafoto: Nsengumukiza Félix


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza