Minisante yashyikirijwe ibikorwaremezo byo kurwanya Covid-19 bifite agaciro ka Miliyari 1Frw

Yanditswe na Uwimana Abraham
Kuya 27 Ugushyingo 2020 saa 08:05
Yasuwe :
0 0

Minisiteri y’Ubuzima yashyikirijwe ibikorwaremezo bitandukanye byifashishwa mu guhangana na Covid-19, bifite agaciro ka 1.000.000 $ ( Miliyari 1 Frw) byubatswe ku nkunga y’u Buyapani binyuze mu Ishami ry’Umuryango w’Abibumbye ryita ku Buzima (OMS).

Ibi bikorwaremezo birimo aho gukarabira hanini hubatswe ku mipaka ihuza u Rwanda na Repubulika Iharanira Demokarasi ya Congo, hakaba kandi inzu zashyizwemo camera zifashishwa mu gupima umuriro (Thermal Imaging Cameras), ziri ku mipaka 6 y’u Rwanda.

Muri iyi mipaka yashyizweho ibi bikorwa remezo harimo uwa poids Lourds na la Corniche iherereye mu Karere ka Rubavu, uwa Rusizi ya mbere n’iya kabiri yo muri Rusizi, uwa Rusumo uherereye mu Karere ka Kirehe, ndetse n’uwa Cyanika uri muri Burera. Iyi mipaka ikaba yaratoranyijwe hagendewe ku kuba ari yo inyurwaho n’abantu benshi.

Ibindi byakozwe ni ugusana ahakirirwa abakekwaho kuba baranduye icyorezo, hubatswe igihe havugwaga icyorezo cya Ebola cyari muri RDC, ariko kuri ubu haravuguruwe hateganyirijwe kwifashishwa mu kwita ku bakekwaho Coronavirus, ibi bikorwa bikaba byarashyizwe mu bitaro bya Gihundwe, ibya Nemba ndetse n’ibitaro bya Bushenge.

Mu muhango wo gushyikiriza Minisiteri y’Ubuzima ibi bikorwaremezo, wabaye kuri uyu wa 26 Ugushyingo 2020, Minisitiri w’Ubuzima, Dr Ngamije Daniel yavuze ko bishimira ibi bikorweremezo byashyizwe cyane cyane ku mipaka, avuga ko byaje bikenewe cyane.

Ati “Abantu bagombaga kwambuka tubasuzumye niba nta muriro bafite, kubasuzumisha kariya gakoresho mwese muzi, buri wese umutungaho akomeza, ntabwo twari kubona umubare w’abantu twari gushyira ku mupaka ngo babashe gusuzuma abo bantu bose binjira cyangwa se basohoka, kandi ngo bikorwe ku buryo ubuhahirane hagati y’imijyi yombi bukomeza neza.”

Yongeyeho ati “Kugira ngo rero ngo tubone ibyo bikoresho remezo aho hantu, byatumye icyo gihe habaho koroshya no kwihutisha urujya n’uruza hagati y’abaturage b’iyo mijyi yombi.”

Ambasaderi w’u Buyapani mu Rwanda, Masahiro Imai, yashimye imbaraga u Rwanda rwashyize mu guhanga na Covid-19, yitangaho urugero ko ari umwe muri ba ambasaderi bakuze kurusha abandi bakorera mu Rwanda, bityo ko ari mu bakwibasirwa cyane nayo, ariko ngo agenda atekanye bitewe n’imbaraga u Rwanda rwashyize mu guhangana n’icyorezo.

Yakomeje avuga kandi ko u Buyapani buzakomeza gushyigikira u Rwanda by’umwihariko mu rwego rw’ubuzima.

Ati “U Buyapani buzakomeza gutanga uruhare rwabwo mu gushyigikira serivisi z’ubuzima mu Rwanda, tuzakomeza gufatanya mu guhashya Covid-19, hahugurwa bakozi bo mu nzego z’ubuzima, ndetse no kubaka uburyo buhamye mu guhangana na Coronavirus.”

Minisiteri y’Ubuzima ivuga ko ibi bikorwa bije gushyigikira gahunda zisanzwe zashyizweho mu rwego rwo guhangana n’icyorezo cya Covid-19, zigamije gufasha kwirinda ko haboneka icyuho icyo ari cyo cyose icyorezo cyakwinjirimo.

Minisitiri w'Ubuzima, hamwe n'Umuyobozi wa OMS mu Rwanda, ndetse na Ambasaderi w'u Buyapani mu Rwanda mu muhango wo gushyikiriza Minisiteri, ibi bikorwaremezo
Ibi bikorwaremezo bigamije kugira uruhare mu guhanga n'icyorezo cya Covid-19 ndetse n'ibindi byose byakwaduka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .