Minisiteri y’Ubutabera yongereye manda komite z’abunzi zari zararangije igihe cyazo

Yanditswe na Uwimana Abraham
Kuya 24 Ugushyingo 2020 saa 02:07
Yasuwe :
0 0

Minisiteri y’Ubutabera yatangaje ko komite z’abunzi zari zararangije manda ku wa 31 Nyakanga 2020, zemerewe gukomeza imirimo yazo kugeza igihe andi matora azabera.

Itangazo ryashyizweho umukono na Minisitiri w’Ubutabera, Busingye Johnston, kuri uyu wa 24 Ugushyingo 2020, rivuga ko hashingiwe ku itegeko ryo ku wa 19 Ugushyingo 2020, Minisiteri yongereye igihe komite z’abunzi zari zararangije manda.

Iri tangazo rikomeza rigira riti “Kubera iyo mpamvu, Minisiteri y’Ubutabera, iramenyesha abafite ibibazo biri mu bubasha bw’abunzi, kugana komite z’abunzi kugira ngo zibafashe kubikemura nk’uko byari bisanzwe.”

Ubwo yari mu karere ka Huye ku wa 20 Ugushyingo 2020, Minisitiri w’Ubutabera akaba n’Intumwa Nkuru ya Leta, Busingye Johnston, yavuze ko abunzi baherutse gusoza manda yabo bagiye kongererwa igihe cyo gukomeza akazi kuko icyorezo cya COVID-19 cyakomye mu nkokora ibikorwa byo gutora abandi bashya.

Ati “Manda yabo yarangiye mu mpera z’ukwezi kwa karindwi, hanyuma dutekereje tubona nitujya kwegeranya abaturage mu gihugu hose ngo bajye mu matora byateza ibibazo cyane kubera uburyo iki cyorezo cya COVID-19 cyandura. Twarabibonye tugira impungenge tubiganiraho n’inzego zindi zidukuriye, tuza gutekereza ko ibyiza ari uko twajya mu Nteko Ishinga Amategeko tugasaba ko amategeko avugururwa aba bunzi bari mu kazi manda yabo bakayikomeza.”

Yavuze ko mu myaka 15 abunzi bamaze mu Rwanda bakemuye ibibazo by’amakimbirane ku kigereranyo cyo hejuru ashimangira ko muri rusange baranzwe n’indangagaciro y’ubunyangamugayo, ubupfura, ubwitange no kubika ibanga ry’akazi.

Ubushakashatsi bwakozwe n’Urwego rw’Igihugu rw’Imiyoborere, RGB, bugaragaza ko abunzi bakemuye ibibazo mu mahoro, birinda abantu kugana inkiko ku kigero kingana na 85%.

Ubwo bushakashatsi bugaragaza ko imikorere y’abunzi ishimwa n’abaturage ku kigero kirenga 70%, ubunyangamugayo bwabo bugashimwa ku kigero cya 77%, icyizere bafitiwe cyo kikaba kiri ku kigero kingana na 78%.

Imibare yerekana ko mu Rwanda abunzi 17.941 ari bo bari baherutse gusoza manda yabo batorewe mu 2015.

Ubushakashatsi bwa RGB bugaragaza ko abunzi bakemuye ibibazo mu mahoro, birinda abantu kugana inkiko ku kigero kingana na 85%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .