00:00:00 IGIHE NETWORK KN KINYARWANDA EN ENGLISH FR FRANCAIS

Minisante yasobanuye impamvu yo kudahindura amasaha y’akazi ku baganga

Yanditswe na Ntabareshya Jean de Dieu
Kuya 9 Mutarama 2023 saa 09:12
Yasuwe :

Minisiteri y’Ubuzima mu Rwanda yatangaje ko impamvu amasaha mashya y’akazi atareba abakora mu rwego rw’ubuvuzi, bishingiye ku kuba ari imwe muri serivisi z’ingenzi cyane zikenerwa mu masaha yose y’umunsi.

Abakora mu nzego z’ubuzima bacitse ururondogoro nyuma y’itangazo rya Minisiteri y’Ubuzima ryashyizwe ahagaragara ku Cyumweru tariki 1 Mutarama mu 2023, rivuga ko batarebwa na gahunda nshya y’amasaha y’akazi ahubwo bazakomeza kubahiriza iyari isanzwe.

Ni nyuma y’uko Inama y’Abaminisitiri yateranye ku wa 11 Ugushyingo 2022 yemeje ko amasaha y’akazi mu Rwanda agomba kuba umunani, kakazajya gatangira Saa Tatu za mu gitondo kagasozwa Saa Kumi n’Imwe z’umugoroba guhera muri Mutarama 2023.

Abakora mu nzego z’ubuzima bagaragaje ko batanyuzwe n’icyemezo cya MINISANTE, bavuga ko bigendanye n’akazi bakora bari bakwiye guhabwa amahirwe yo kwita ku muryango no kungukira ku miterere y’amasaha mashya y’umurimo mu Rwanda.

Minisitiri w’Ubuzima mu Rwanda Dr Sabin Nsanzimana mu kiganiro cyihariye na IGIHE, yavuze ko gufata icyemezo cyo gutangaza ko aya masaha atareba abakora muri serivisi z’ubuzima biterwa n’umwihariko w’ibyo bakora.

Ati “Ubuvuzi ni imwe muri serivisi z’ingenzi cyane kuko serivisi zabwo zirakomeza amasaha 24/7. Zifite umwihariko ureba serivisi z’ingenzi, Minisiteri ishinzwe umurimo nayo yarabisobanuye, hari n’izindi serivisi zikora mu buryo bwihariye.”

Hari bamwe mu bari bagaragaje ko batishimiye iki cyemezo bagaragaza ko bashobora gukora mu buryo bwo gusimburana ariko na bo bakagerwaho n’amasaha mashya; Minisitiri Dr Nsanzimana yavuze ko amasaha ari mu biri gukorerwa isuzuma.

Ati “Turifuza ko umuganga amererwa neza kandi agakora yishimye n’abo avura bakanyurwa. Iby’amasaha ni agace gato muri byinshi turi gusuzuma dufatanije.”

Yavuze ko nyuma yo kubona ko iki cyemezo kitanyuze abakora muri serivisi z’ubuvuzi Minisiteri y’Ubuzima hari icyo iri gukora kuri izo mpungenge zagaragajwe n’abaganga aho batangiye gukorana n’abahagarariye abakora kwa muganga.

Ati “Nibyo. Twarabitangiye dufatanije n’ abahagarariye abakora kwa muganga, ndetse turi kubasura aho bakorera bakaduha ibitekerezo, ibyifuzo n’ibisubizo byadufasha.”

Ubundi bisobanurwa ko amasaha mashya y’akazi ashyirwaho byari mu rwego rwo guhereza umwanya uhagije abagize umuryango no kwita ku bana bawugize, ibintu Minisitiri w’Ubuzima Dr Sabin Nsanzimana agaragaza ko nabo baharanira ko muganga agira umuryango mwiza.

Ati “Turifuza ko muganga nawe agira umuryango mwiza akanaruhuka, akavura neza. Amavugurura ari gukorwa mu rwego rw’ubuzima aratanga icyerekezo cyo kunoza imikorere n’imibereho y’ukora umwuga w’ubuvuzi.”

Yakomeje agaragaza ko nubwo bimeze bityo ariko urwego rw’ubuvuzi muri ibi bihe rufite umubare munini w’abarwayi.

Ati “Gusa uyu munsi ntitwirengagiza ko dufite umubare munini w’abarwayi batugana utagendanye n’uw’abaganga bashinzwe kubavura.”

“Ibi nabyo turabikoraho binyuze muri za porogaramu zo kwigisha abaganga n’abandi bakora imirimo ijyanye n’urwego rw’ubuzima, tukaba kandi tunashyiraho gahunda zo gukarishya ubumenyi ku basanzwe muri iyo mirimo. Impinduka zisaba igihe ariko hari ikiri gukorwa.”

Minisitiri Nsanzimana yavuze ko kuba abaganga, abaforomo n’ababyaza bakunze kugaragaraza ko bakora akazi gakomeye kandi bari mu bafite umushahara muto, hari ibiraje ishinga minisiteri ayobora birimo guteza imbere ubuvuzi ku buryo ubukora abikora yishimiye umurimo akora n’uvurwa akanyurwa na serivisi yahawe.

Umunyamabanga Uhoraho muri Minisiteri y’Abakozi ba Leta n’Umurimo, Musonera Gaspard, yavuze ko aho bishoboka abakozi bakoroherezwa nabo kugira ngo icyari kigamijwe aya masaha agenwa kigerweho.

Abaganga bamaze iminsi bavuga ko nabo bakwiriye kwemererwa gukora hagendewe ku masaha mashya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .