Aya manota yatangarijwe ku Cyicaro cy’ Ikigo cy’Igihugu Gishinzwe Uburezi bw’Ibanze, REB giherereye i Remera kuri uyu wa 27 Kanama 2024.

Minisitiri w’Uburezi, Gaspard Twagirayezu, yagaragaje ko mu mashuri abanza, abakoze ibizamini ari 202.021 barimo abakobwa 111. 249 n’abahungu 90.772.

Abakobwa batsinze ku kigero cya 97%, mu gihe abahungu batsinze ku kigero cya 96.6%.

Amasomo batsinze cyane ni siyansi n’Ikinyarwanda, mu gihe Minisitiri Twagirayezu yagaragaje ko hakenewe kongerwa imbaraga mu Mibare ndetse n’Icyongereza.

Mu mashuri abanza abari biyandikishije bose bari 203.098, barimo abakobwa 111.835 bangana na 55,1% n’abahungu 91.263 bangana na 44,9%.

Abakoze ibizamini ni 202.021 barimo abakobwa 111.249 bangana na 55,1% n’abahungu 90.772 bangana na 44,9%.

Abakosowe ni 201.955 barimo 111.209 b’abakobwa bangana na 55,1% n’abahungu 90,746 bangana na 44,9%.

Abatsinze ni 195.463 barimo abakobwa 107.834 n’abahungu 87.629, mu gihe abatsinzwe ari 6492 barimo abakobwa 3375 n’abahungu 3227.

Muri rusange 96,8% baratsinze aho abakobwa batsinze ku kigero cya 97% n’abahungu 96,6%, na ho abatsinzwe bangana na 3,2% barimo abakobwa 3,0% n’abahungu 3,4%.

Mu cyiciro rusange cy’amashuri yisumbuye abahungu batsinze ku kigero cya 95.8%, mu gihe abakobwa batsinze ku kigero cya 92%.

Ni ibizamini byakozwe n’abanyeshuri 143227, barimo abakobwa 79.933 n’abahungu 63.294.

Mu cyiciro rusange cy’amashuri yisumbuye abatsinze ni 93,8%, aho abahungu batsinze ku kigero cya 95.8%, mu gihe abakobwa batsinze ku kigero cya 92%.

Mu cyiciro rusange abatsinzwe ni 8912, abakobwa bakaba 6241 bangana na 70% by’abatsinzwe, abahungu bo ni 2671 bangana na 30%.

Minisitiri w’Uburezi, Twagirayezu Gaspard yavuze ko muri rusange abenyeshuri bakoze neza, agaragaza ko amasomo nk’Ubugenge, Ubutabire, n’Ibinyabuzima aribyo bikeneye gushyirwamo imbaraga kuko batabitsinze ku rugero rushimishije.

Ati “Iyo dukora ibizamini ntabwo tureba abanyeshuri gusa n’amashuri gusa niyo mpamvu tuba dukora iyi mibare kugira ngo turebe neza uko abanyeshuri bacu bakoze ngo tunarebe ahashyirwa imbaraga.”

Mu batsinze bava mu mwaka wa gatatu w’amashuri yisumbuye uko ari 137052 muri bo aboherejwe mu mashuri y’ubumenyi busanzwe bagize 52.8%, aboherejwe mu mashuri ya tekinike imyuga n’ubumenyi ngiro ni 40.5%, mu gihe aboherejwe mu mashuri nderabarezi TTC ari 4.7%, aboherejwe mu ibaruramari bagize 1.8% naho abazajya kwiga amasomo arebana no kwita kuri gahunda z’amashuri y’incuke ni o.2%.

Ababaye aba mbere bahembwe

Igiraneza Lucky Fabrice wize muri Pioneer School yo mu Karere ka Bugesera niwe wabaye uwa mbere mu bizamini bisoza amashuri abanza. Yakurikiwe na Igeno Alliance Pacifique wo muri Irerero Academy yo mu Karere ka Kamonyi, mu gihe Kirezi Remezo Benitha wize muri Ecole Autonome de Butare yo mu Karere ka Huye yabaye uwa gatatu.

Uwabaye uwa kane mu gihugu ni Senga Nshuti Davy wize muri Kigali Parents School mu Karere ka Gasabo, akurikirwa na Kazubwenge Mahirwe Vanessa wize Ecole Primaire Espoir de l’Avenir mu Karere ka Bugesera.

Mu cyiciro rusange hahembwe Telimbere Ineza Alia Ange Stevine wo muri Lycée Notre Dame de Citeaux mu Karere ka Nyarugenge, akurikirwa na Tuyisenge Denys Prince wize muri Hope Haven yo mu Karere ka Gasabo.

Bakurikiwe na Twarimitswe Aaron wize muri Efotec Kanombe yo mu Karere ka Kicukiro, nawe wakurikiwe na Abeza Happiness Mary Reply wize muri Fawe Girls yo mu Karere ka Gasabo. Niyonzima Jean de Dieu wo muri Education Institute for Blind Kibeho unafite ubumuga bwo kutabona yabaye uwa gatanu.

Abo banyeshuri bose bahembwe mudasobwa ndetse bishyurirwa na Umwarimu SACCO umwaka wose, bahabwa n’ibikoresho by’ishuri by’umwaka wose.

Abanyeshuri bazatangira ku wa 09 Nzeri 2024 basoze umwaka mu 27 Kamena 2025.

Ushaka kureba amanota ye ajya ku rubuga rwa NESA, mu gihe ukoresha telefone nto yandika kode ye akohereza kuri 8888. Umunyeshuri uri kureba amanota ahita abona n’aho yoherejwe kwiga.