00:00:00 IGIHE NETWORK KN KINYARWANDA EN ENGLISH FR FRANCAIS

Impamvu yo gufunga amashuri mu Mujyi wa Kigali mu minsi ya CHOGM

Yanditswe na IGIHE
Kuya 14 June 2022 saa 09:46
Yasuwe :

Minisiteri y’Uburezi (Mineduc) yatangaje ko gufunga amashuri yo mu Mujyi wa Kigali guhera tariki 20-26 Kamena 2022, ubwo u Rwanda ruzaba rwakira inama ya CHOGM, bigamije gufasha abanyeshuri n’abarimu gukora ingendo neza mu gihe inama izaba iri kuba.

Ku mugoroba wo kuri uyu wa Mbere, Mineduc yasohoye itangazo ry’uko mu gihe u Rwanda ruzaba rwakira inama y’Abakuru b’Ibihugu na za Guverinoma bo mu Muryango wa Commonwealth, CHOGM, amashuri yo mu Mujyi wa Kigali azafunga.

Abanyeshuri biga bataha mu Mujyi wa Kigali bazakomeza gusubiramo amasomo bari mu ngo z’iwabo mu gihe abiga bacumbikiwe bazaguma mu bigo byabo.

Umunyamabanga wa Leta muri Minisiteri y’Uburezi ushinzwe Amashuri Abanza n’Ayisumbuye, Twagirayezu Gaspard, yavugiye kuri Televiziyo y’Igihugu ko iki cyemezo kigamije gufasha abanyeshuri n’abarimu kutagorwa n’ingendo zo kujya no kuva ku mashuri mu gihe cya CHOGM.

Ati "Ibi akaba ari ukugira ngo dufashe abanyeshuri ndetse n’abarimu gukora ingendo batabangamiwe muri iki gihe inama izaba irimo".

Twagirayezu yavuze ko itariki yo kurangiza igihembwe cya gatatu itazahinduka, izakomeza kuba itariki ya 15 Nyakanga 2022, ahubwo ikizahinduka ari uko amatariki y’ibizamini azigizwa inyuma ho icyumweru kimwe.

Abanyeshuri cyane cyane abakurikira gahunda ya Leta tariki 20-26 Kamena 2022, bagombaga kuba bari mu bizamini by’igihembwe cya gatatu bikorwa ari ikizamini kimwe mu gihugu hose.

Mineduc ivuga ko muri ariya matariki abanyeshuri bose bo muri Kigali bazaba bari gusubiramo amasomo yabo mu rugo hanyuma abo mu ntara hanze ya Kigali bo bakazakomeza bari ku ishuri, ariko na bo basubiramo amasomo, hanyuma ibizamini bikazatangira tariki 27 bikazarangira mu matariki atandukanye y’ukwezi gutaha.

Minisiteri y’Uburezi yavuze kandi ko izi mpinduka nta mpungenge zikwiye gutera ku myigire n’imitsindire y’abana kuko n’ubundi igihe cyo kwitegura ibizamini gisanzwe giteganyijwe.

Abanyeshuri basabwe gukomeza gushyiramo imbaraga kugira ngo barangize umwaka neza, ababyeyi n’abarimu na bo bagafasha abanyeshuri gusubiramo amasomo no gukurikira ibizaba birimo kuba mu gihugu.

Umunyamabanga wa Leta muri Mineduc Twagirayezu Gaspard yemeje ko gufunga amashuri icyumweru mu Mujyi wa Kigali nta ngaruka bizagira mu mitsindire y'abana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .