Mineduc yamaganye ingengabihe y’ifungurwa ry’amashuri ikomeje gukwirakwizwa

Yanditswe na IGIHE
Kuya 26 Nzeri 2020 saa 09:57
Yasuwe :
0 0

Minisiteri y’Uburezi, MINEDUC, yamaganye ingengabihe ikomeje gukwirakwizwa nk’igaragaza ifungurwa ry’amashuri, ivuga ko iyemewe izatangazwa mu minsi iri imbere.

Mu gihe hakomeje gutekerezwa ku ifungurwa ry’amashuri, hari ingengabihe yakomeje gukwirakwizwa ku mbuga nkoranyambaga, ivuga ko amashuri makuru na za kaminuza bizatangira mu Ukwakira 2020, naho andi mashuri akazatangira mu byiciro, nk’ayo mu myaka ya 4,5 mu mashuri abanza, no mu myaka ya 1,2,4,5 mu mashuri yisumbuye akazatangira amasomo mu Ugushyingo hagati, agasoza mu mu Ukwakira 2021.

Ni mu gihe indi myaka yo mu myaka izakora ibizamini bya leta, ni ukuvuga mu wa 6 w’amashuri abanza, mu wa 3 w’amashuri yisumbuye bazatangira amasomo hagati mu Ugushyingo bagasoza hagati muri Gicurasi.

Mu butumwa yanyujije kuri Twitter, Mineduc yagize iti "Hari amakuru akomeje guca ku mbuga nkoranyambaga, avuga ku ngengabihe y’ifungura ry’amashuri. Ntabwo ayo makuru ari ukuri. Mube mwihanganye gahunda y’ifungura ry’amashuri muzayimenyeshwa mu minsi ya vuba nk’uko byemejwe n’Inama y’Abaminisitiri yo kuwa 25.9.2020.”

Inama y’abaminisitiri yateranye kuri uyu wa Gatanu, yemeje ko ingamba zisanzweho zo kurwanya COVID-19 zizakomeza gukurikizwa, ariko hiyongeraho izindi nshya zirimo no gufungura amashuri.

Yagize iti “Amashuri azafungura mu gihe cya vuba hakurikijwe ibyiciro byayo. Gahunda y’uko azatangira izatangazwa na Minisiteri y’Uburezi hashingiwe ku isesengura rizakorwa.’’

Minisitiri w’Uburezi, Dr Uwamariya Valentine, yatangaje ko amashuri azatangira mu Ukwakira uyu mwaka, ariko ko bizakorwa mu byiciro, aho ku ikubitiro amashuri makuru na za Kaminuza ariyo azaherwaho.

Minisitiri w’Uburezi, Dr Uwamariya Valentine, yabwiye RBA ko mu ukwezi gutaha aribwo amashuri azafungurwa ariko bizajyana n’iyubahirizwa ry’ingamba zo kwirinda ikwirakwira ry’icyorezo cya Coronavirus.

Ati “Amashuri yo arabizi tumaze igihe kinini twitegura dufatanyije. Hari ibyo amashuri yahawe agenderaho mu kwitegura, ubu ikigiye gukurikira ni uko Minisiteri y’Uburezi izagenzura ko ibyo twumvikanye byashyizwe mu bikorwa.”

Yavuze ko nk’uko n’ibindi bikorwa biri mu byiciro, amashuri nayo ni uko, bityo no mu gufungura bikazagenda bikorwa hagendewe ku cyiciro runaka.

Ati “Iyo tuvuze amashuri, ntabwo yose mu byiciro azafungurira rimwe. Tuzagenda dufungura mu byiciro. Uko bizagenda kose, Minisiteri y’Uburezi izajya iganira na ba nyiri amashuri, imenyeshe, itange amatangazo [iti] amashuri aya n’aya yemerewe gutangira, ariko muri gahunda dufite tuzahera ku mashuri yo hejuru ni ukuvuga za kaminuza n’amashuri makuru hanyuma tugende tumanuka no mu bindi byiciro.”

Amashuri agendera kuri porogaramu mpuzamahanga azatangira agendeye kuri gahunda z’ibihugu akesha imyigishirize ariko yose asabwe kubahiriza amabwiriza agamije kwirinda icyorezo cya Coronavirus.

Ati “Iyo ari vuba tuba twatangiye urugendo, ku buryo guhera hagati mu kwa cumi [Ukwakira], amashuri amwe azaba yakomorewe atangire gufungura.”

Minisitiri w’Uburezi yakomeje avuga ko bimwe mu bizagenderwaho mu gufungura amashuri harimo ko agomba kuba afite ibikoresho bifasha abanyeshuri gusukura intoki mu kwirinda ikwirakwira rya Coronavirus, guhana intera n’ibindi. Ikindi abanyeshuri bose baziga bambaye udupfukamunwa.

Ati “Buriya byanze bikunze, ababyeyi mu byo bitegura, mu bikoresho basanzwe bategura by’amashuri, n’udupfukamunwa turimo. Ubwo abana bagomba kuzajya ku ishuri bambaye udupfukamunwa. Hakaba n’amashuri yandi yagiye atugaragariza ko afite uburyo bwo gupima abana mbere y’uko bajya ku mashuri, abo nabo bazabitugaragariza.”

“Ariko icyo dushimangira ni ukugaragaza uko bazubahiriza ya ntera hagati mu ishuri ndetse n’ibikoresho bijyanye n’isuku, aho bakarabira, aho bafatira amafunguro n’ibindi nk’ibyo.”

Minisitiri w’Uburezi, Dr Uwamariya Valentine, yatangaje ko amashuri azatangira mu Ukwakira uyu mwaka ariko ko bizakorwa mu byiciro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .