Hatanzwe igihe cyo gukemura ikibazo cy’abarokotse Jenoside b’i Huye badafashwa nk’abandi

Yanditswe na Iradukunda Serge
Kuya 9 Kamena 2020 saa 01:43
Yasuwe :
0 0

Raporo y’ibikorwa by’Urwego rw’Umuvunyi by’umwaka wa 2018-2019 na gahunda y’ibikorwa by’umwaka wa 2019-2020, yagaragaje ko hari abaturage bacitse ku icumu rya Jenoside yakorewe Abatutsi mu 1994, batagenerwa ubufasha nk’ubwo abandi bahabwa kandi babukeneye.

Komisiyo ya politiki, uburinganire n’ubwuzuzanye bw’abagabo n’abagore mu iterambere ry’Igihugu mu nteko ishinga amategeko, yasuzumye iyi raporo y’Urwego rw’Umuvunyi ndetse ibiyirimo byemezwa n’Inteko Rusange y’Umutwe w’Abadepite kuri uyu wa 9 Kamena 2020.

Urwego rw’Umuvunyi rwagaragaje ikibazo cy’abaturage 105 babaruwe mu 2014 bacitse ku icumu rya Jenoside yakorewe Abatutsi mu mwaka wa 1994 bakomoka mu karere ka Nyaruguru ariko ubu bakaba batuye mu karere ka Huye.

Ni ikibazo kimaze igihe kirekire kuko abaturage bagaragarije Urwego rw’Umuvunyi ko hashize imyaka 25 nta bufasha na bumwe busanzwe bugenerwa abacitse ku icumu rya jenoside yakorewe Abatutsi mu 1994 bahabwa, bitewe n’uko Akarere ka Huye babamo n’aka Nyaruguru bakomokamo nta na kamwe kabitaho kuko ntaho babaruye.

Uku kutagira ubufasha bahabwa biri mu bituma aba baturage babaho ubuzima bubi kuko mu 2013 ubwo IGIHE yasuraga umwe muri aba baturage witwa Mukandekezi Domina yasanze atuye mu nzu yenda kumugwaho yakodesherezwaga n’abagiraneza, bakayishyura 5000 Frw ku kwezi.

Mu bihe bitandukanye ku bufatanye bw’uturere twombi hagiye haba inama zigamije kubumvisha ko bakwiye gutaha bagasubira Nyaruguru akaba ariho bafashirizwa bamwe baza kubyumva barataha, abandi barinangira.

Icyo gihe Mukandekezi yavugaga ko adashobora gusubira i Nyaruguru gutura aho yarokokeye ngo ahabwe ubufasha, kuko atari kubasha gusubira ahantu bamumariye umuryango.

Uburemere bw’iki kibazo n’igihe kirekire kimaze kitarakemurwa n’ibyo byatumye umuyobozi w’iyi Komisiyo yo mu nteko ishinga amategeko atangaza ko hafashwe “umwanzuro wo gukemura ikibazo cy’abaturage bacitse ku icumu rya jenoside yakorewe abatutsi mu 1994 batishoboye batuye mu karere ka Huye ariko bakomoka mu karere ka Nyaruguru bafite ibibazo bimaze imyaka 25 bidakemurwa bigakorwa mu gihe kitarenze amezi atandatu.”

Umuyobozi w’Akarere ka Huye Sebutege Ange yabwiye IGIHE ko ku bufatanye n’uturere twombi ubu aba baturage bamaze kwemezwa koko n’abacitse ku icumu ko ndetse umwaka utaha w’ingengo y’imari bazatangira gufashirizwa muri Huye kuko ari uburenganzira bwabo.

Yagize ati “Kwemezwa umuntu yemerezwa aho yarokokeye ariko ubufasha nk’uko twabyumvikanyeho n’akarere ka Nyaruguru na FARG umuntu yabubonera n’ubundi aho atuye kandi icyo cyo cyamaze no kwemeranywaho”.

Yakomeje agira ati “Ibyo kubakirwa byamaze kwemeranywaho ku buryo no mu mwaka utaha w’ingengo y’imari harimo abazatangira gufashirizwa muri Huye, uwamaze kwemezwa ubufasha azajya abubonera aho atuye”.

Kimwe mu cyatumye iki kibazo gikomeza kudindira ni uko bari bataramezwa nk’abacitse ku icumu koko kuko byagombaga gukorerwa aho bakomoka.

Abagize inteko ishinga amategeko basabye ko ko harebwa n’abandi bacitse ku icumu bahuje ibibazo n’aba bo mu karere ka Huye bagakemurirwa ibibazo, ndetse ko bikwiye no kurenga gukemura ibibazo bikagera no mu gukurikirana abagiye bakerereza ikemurwa ryabyo.

Imwe mu yindi myanzuro ikubiye muri iyi raporo komisiyo ya politiki Uburinganire n’Ubwuzuzanye bw’Abagabo n’Abagore mu Iterambere ry’Igihugu mu nteko harimo gukora ibarura ry’imidugudu yubatswe mu masambu y’abaturage kandi batarahawe ingurane kugira ngo bishyikirizwe inzego bireba bayihabwe.

Hari kandi gukurikirana ikemurwa ry’ikibazo cy’abaturage bo mu karere ka Huye mu murenge wa Mbazi baguze inzu na Leta nyuma bikaza kwemezwa ko izo nzu ari mu gishanga.

Abadepite basabye MINALOC kuba yakemuye iki kibazo bitarenze amezi atandatu
Aha ni mu 2014 ubwo aba baturage bari mu biganiro byabahuje n'ubuyobozi bw'akarere ka Huye n'aka Nyaruguru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .