00:00:00 IGIHE NETWORK KN KINYARWANDA EN ENGLISH FR FRANCAIS

Minagri yemeje ko Abanyarwanda bihagije mu biribwa nubwo hari uturere twarumbije

Yanditswe na Cyprien Niyomwungeri
Kuya 8 February 2017 saa 12:34
Yasuwe :

Minisiteri y’ubuhinzi n’ubworozi, Minagri, iratangaza ko umusaruro w’igihembwe cya mbere cy’ihinga cya 2017, werekana ko ku rwego rw’Igihugu Abanyarwanda bihagije mu biribwa, nubwo hari uturere tumwe na tumwe two mu Ntara y’Iburasirazuba n’Amajyepfo twazahaye.

Isesengura Minisiteri y’ubuhinzi n’ubworozi yakoreye hirya no hino mu gihugu ikarigeza ku Nama y’Abaminisitiri idasanzwe yateranye kuwa 3 Gashyantare 2017, ryagaragaje ko hari uturere dukomeje kugaragaramo izuba ryinshi cyangwa imvura ikabije bigatuma imyaka bahinze yangirika.

Mu kiganiro n’abanyamakuru ku ngingo zimwe na zimwe ziba zaganiriweho mu nama y’Abaminisitiri, Minisitiri w’Ubuhinzi n’Ubworozi Gerardine Mukeshimana yatangaje ko mu Ntara y’Iburasirazuba n’iy’Amajyepfo hakunze kugaragara izuba ryinshi ryatumye mu gihembwe cy’ihinga A cya 2017 umusaruro ugabanuka, cyane cyane uw’ibigori.

Yagize ati “Mu Burasirazuba mu turere nka Nyagatare, Rwamagana na Gatsibo tuzagira umusaruro ugabanutse ariko atari cyane wenda nka 90% y’uwari uteganyijwe, ariko wajya mu Karere ka Kayonza, Kirehe na Ngoma hakaba hari imirenge izagira umusaruro ugabanutse ku kigero gishobora no kurenga 50%.”

Yakomeje avuga ko mu Majyepfo hafi ya hose hagiye hagaragara ihindagurika ry’ibihe, ariko ahazahaye cyane ari mu gice cy’Amayaga mu Karere ka Ruhango na Nyanza cyane cyane mu mirenge ya Kinazi, Ntyazo, Kibirizi, hagiye haba izuba ricana rikamara igihe kinini.

Mukeshimana yavuze ko mu Burengerazuba nta kibazo kinini gihari usibye utugari dukeya turi mu Murenge wa Bugarama muri Rusizi no mu Majyaruguru nta kibazo kinini cyane gihari usibye mu mirenge imwe n’imwe ya Gakenke na Rulindo.

Ku rwego rw’Igihugu hari ukwihaza mu biribwa

i, Minisitiri w’Ubuhinzi n’Ubworozi Gerardine Mukeshimana

Minisitiri Mukeshimana yashimangiye ko nubwo hari intara zahuye n’ibibazo, ku rwego rw’igihugu umusaruro uhagaze nabi, ikibazo ari ugusaranganya ibihari.

Yagize ati “Ku rwego rw’igihugu ukwihaza mu biribwa kurahari, ahubwo ikizasigara kitugoye nk’Abanyarwanda ni ukugira ngo tubikwirakwize bigere no kubatabifite.”

Yasobanuye ko ukwihaza mu biribwa ku rwego rw’igihugu bivuga ko hari ibiribwa bihagije aho byaba biri hose, noneho hagasigara ikibazo cyo kubikwirakwiza bigera ku bandi.

Kwihaza ku biribwa ku muntu cyangwa umuryango bisobanura ko hari ufite ibiribwa mu rugo iwe cyangwa hari ubushobozi bwo kubigura.

Minisitiri Mukeshimana avuga ko hazakomeza gukorwa ibigabanya ibibazo by’umusaruro muke nko gukomeza gufasha abaturage bahuye n’izuba mu kubona ibibatunga, ubukangurambaga bwo gukangurira abahinzi kuvomerera imyaka yabo no kubakangurira guhunika ‘kubika ibibatunga mbere y’uko bagurisha’.

Abaturage nibavuga rumwe na Minagri

Iyo ugeze ku masoko atandukanye mu mujyi wa Kigali, ingaruka z’umusaruro zirigaragaza kuko ibiciro by’biribwa byihagazeho.

Bamwe mu baturage baganiriye na IGIHE mu isoko rya Kimisagara, bavuga ko muri iyi minsi ibishyimbo, ibigori, ibijumba, ibitoki n’ibindi bikomoka ku buhinzi bigura umugabo bigasiba undi. Ibi bigatuma bemeza ko nta kwihaza mu biribwa guhari kuko n’ibihari batabasha kubigura.

Uwitwa Jean de Dieu Munyemana yagize ati "Niba ikiro cy’igitoki kigura 380 Frw, ibishyimbo 450 Frw, ibigori byo byarabuze, urumva twihagije mu biribwa gute kandi n’ibihari tutabasha kubihaha."

Ibi binashimangirwa na Mukandanga Suzana, wemeza ko ibiribwa nta bihari kuko bihari byahenduka abaturage bagahaha. Avuga ko intoryi zonyine arizo zigerageza guhenduka kandi ntawazirya zonyine.

Uduce twagiye duhura n’amapfa hirya no hino mu gihugu Leta yagiye itanga ibiryo byo kugoboka imiryango itifashije.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .