Minagri yanenze ubushakashatsi bwa TI Rwanda ku ruhare rw’umuhinzi mu kugena ibiciro by’umusaruro

Yanditswe na Emma-Marie Umurerwa
Kuya 24 Werurwe 2019 saa 09:32
Yasuwe :
0 0

Transparency International Rwanda yashyize ku mugaragaro ubushakashatsi bugaragaza ko abahinzi batagira uruhare mu kugena ibiciro by’umusaruro, Minisiteri y’Ubuhinzi (Minagri) ivuga ko hari uruhande bwirengagije.

Ubushashatsi ku buhinzi n’ubworozi bwakorewe mu turere 12, ku bagore 56% n’abagabo 43% bahinga mu buryo bw’umwuga umuceli, ibirayi ndetse n’ibigori ku buso buri hagati ya hegitari imwe na hegitari 10.

Bwagaragaje ko batagira uruhare mu kugena ibiciro by’umusaruro, bigatuma bamwe bahinga by’amaburakindi.

Ushinzwe Porogaramu muri Transparency International Rwanda, Rwego Albert Kavatiri, wayoboye ubu bushakashatsi, yavuze ko ikibazo cyo kugena ibiciro cyagaragajwe n’abahinzi b’ibirayi, ibigori ndetse n’umuceli.

Yagize ati “Batora ababahagarariye ngo bajye gushyiraho ibiciro bafatanyije n’inzego zitandukanye nka Minagri na Minicom, wajya kureba ugasanga nta ruhare babigizemo ahubwo ibiciro bigashyirwaho n’abantu batari abahinzi.”

Yatanze urugero ko nkk’abahinzi b’umuceli bo mu Karere ka Huye, Gisagara, ndetse na Kirehe hafi 90% batishimiye igiciro bahabwa ku musaruro.

Yakomeje ati “Nko ku gihingwa cy’umuceli twasanze ugura umusaruro w’abahinzi aba ari rwiyemezamirimo umwe mu Karere, ku buryo usanga ashyiraho ibiciro yishakiye.”

Ubu bushakashatsi bwagaragaje kandi ko iyo umworozi w’inka ayijyanye ku isoko, hari umusoro asabwa iyo itaguzwe akayitahana, mu gihe agarutse kuyigurisha nabwo agasabwa gusora.

Ibi bikaba bifatwa nk’akarengane aho uyu muryango usaba ko umuturage akwiye kujya asoreshwa igihe inka ye yaguzwe.

Umunyamabanga Nshingwabikorwa wa TI Rwanda, Apollinaire Mupiganyi, yagaragaje ko muri buri Murenge haba veterineri ugirana imikoranire n’undi wigenga ku buryo basarura indonke mu baturage.

Ati “Usanga akorana na ba ba veterineri bigenga, noneho umuturage yamuhamagara akamubwira ati ngirayo kubera ko azi ko ari bubone indonke muri serivisi umuturage akeneye.”

Minagri yateye utwatsi bimwe mu byavuye muri ubu bushakashatsi

Ushinzwe ibidukikije n’ihindagurika ry’ikirere wari uhagarariye Minagri, Bisangwa Innocent, ubwo hamurikwaga ubu bushakashatsi, yavuze ko bwarebye uruhande rumwe.

Ati“ Inyigo yagaragaje uruhande rumwe muri ubu bushakashatsi. Igiciro ntabwo gishyirwaho na Minagri cyangwa Minicom, gishyirwaho n’abantu bavuye mu nzego zitandukanye kandi abahinzi baba bahagarariwe. Ntabwo twemera ibyavuye muri ubu bushakatsi.”

Yakomeje ati “Niba ari ukuvuga ku bijyanye n’imitangire ya serivisi, inzego z’ibanze zari kubanza zikagira icyo zibivugaho. Hari ibibazo byagiye bigaragara bizwi ko byashyizwemo imbaraga kugira ngo bikemuke, hari n’ibindi byagiye bigaragara bizwi ko bisaba guhozaho kugira ngo bikemuke. Inyigo ntiyari yuzuye, hari n’ahantu batubwiye ngo koperative yirukana umuntu utarageze ku musaruro runaka, ariko nta mibare bagaragaje y’abirukanwe.”

Transparency International Rwanda ivuga ko urwego rw’ubuhinzi rukwiye kwitabwaho by’umwihariko, kuko rufatiye runini ubukungu bw’igihugu n’imibereho y’abanyarwanda.

Abantu batandukanye bitabiriye imirukwa ry'ubushakashatsi ku buhinzi n'ubworozi
Rwego Albert Kavatiri wayoboye ubu bushakashatsi ari kumwe n'Umunyamabanga Nshingwabikorwa wa TI Rwanda, Apollinaire Mupiganyi
Umuhinzi w'ibirayi mu Karere ka Musanze, Hakizimana Thomas, atanga ibitekerezo mu imurikwa ry'ubu bushakashatsi
Bisangwa Innocent, ushinzwe ibidukikije n’ihindagurika ry’ikirere muri Minagri, yanenze uburyo ubu bushakashatsi bwakozwe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza