Miliyoni 900 Frw zigiye gukoreshwa mu guteza imbere ubufatanye muri kaminuza zo mu Rwanda n’i Burayi

Yanditswe na IGIHE
Kuya 14 Gashyantare 2020 saa 12:27
Yasuwe :
0 0

Umuryango w’Ubumwe bw’u Burayi mu Rwanda, watangaje ko ugiye kwakira itsinda rizaturuka muri kaminuza za Parma mu Butaliyani, Rheinische Fachhochschule University of Applied Science Cologne - RFH yo mu Budage na Kaminuza ya Liège mu Bubiligi, muri gahunda yo gutangiza ubufatanye bugamije guteza imbere amashuri makuru hagamijwe iterambere rirambye.

Uyu mushinga uzashyirwa mu bikorwa ku bufatanye na Kaminuza y’u Rwanda, INES-Ruhengeri, IPRC Polytechnic School of Musanze, UTAB na kaminuza zo mu Burayi, mu mushinga uzamara imyaka itatu.

Bimwe mu bizakorwa muri uyu mushinga harimo gufasha abarangiza muri ayo mashuri mu buryo bwo kwihangira imirimo, kuvugurura integanyanyigisho n’imyigishirize binyuze mu guhugura abarimu ba za kaminuza n’abakozi bazo mu Rwanda.
 
Harimo kandi gutangiza gahunda nshya za Master’s na PhD, no gutangiza uburyo bwo kwiga mu buryo bw’iya kure no guteza imbere ikoranabuhanga.

Hazanatangizwa gahunda izafasha mu guhanahana abarimu n’abakozi ndetse abanyeshuri bakabasha kugira ibyo bigira muri izo kaminuza zo mu Burayi.

Iyi gahunda yemejwe mu mushinga wa EU ugamije guteza imbere uburezi, Erasmus Plus (ERASMUS +) ndetse yahawe ama Euro 900,000, ni ukuvuga asaga miliyoni 900 Frw.

Inzego ubu bufatanye buzibandaho cyane zirimo Ubumenyi mu bijyanye n’ibiribwa (Food Science) n’Ikoranabuhanga no kurengera ibidukikije ( Environmental Protection, Safety and Management). Biteganyijwe ko iyi gahunda izatangizwa ku wa 16 Gashyantare 2020.
 


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .