00:00:00 IGIHE NETWORK KN KINYARWANDA EN ENGLISH FR FRANCAIS

Miliyari 8 Frw zimaze gushorwa mu kubaka ibyumba by’ikoranabuhanga

Yanditswe na Ntabareshya Jean de Dieu
Kuya 28 January 2022 saa 08:55
Yasuwe :

Guverinoma y’u Buyapani ibinyujije mu Kigo Mpuzamahanga cy’Abayapani (JICA), imaze gutanga umusanzu wa miliyoni 8 z’amadorali ya Amerika, asaga miliyari 8 Frw mu bikorwa bigamije kugeza ikoranabuhanga kuri bose.

Ibi byagarutsweho ubwo hatahwaga ku mugaragaro icyumba cy’ikoranabuhanga cyubatswe mu Karere ka Musanze mu Ntara y’Amajyaruguru nk’icyitezweho kongera imishinga migari no gukemura ibibazo by’ubushomeri binyuze mu kwihangira imirimo.

Kuva JICA yagirana amasezerano na Guverinoma y’u Rwanda binyuze muri Minisiteri y’Ikonarabuhanga na Inovasiyo, imaze kubaka ibyumba by’ikoranabuhanga mu bice bitandukanye by’Igihugu birimo Rusizi, Huye, Rwamagana na Musanze.

Ubwo hatahwaga ku mugarargaro icyumba cy’ikoranabuhanga cya “Musanze Innovation hub”, Umuyobozi w’Akarere ka Musanze Ramuli Janvier yavuze ko ari icyumba cyitezweho impinduka nziza muri aka Karere mu bijyanye no kwihangira imirimo mu ikoranabuhanga.

Ati “Uru ni urubuga ruzahuza urubyiruko rw’Akarere mu kwihangira imirimo, kwagura ikoranabuhanga, kuzamura impano zabo. Twizeye ko imbaraga zashyizwemo zizatanga umusaruro ku rubyiruko rwacu.”

Guverineri w’Intara y’Amajyaruguru, Nyirarugerero Dancille, yavuze ko iki gikorwa kivuze byinshi kuri iyi ntara isanzwe ari igicumbi cy’ubukerarugendo kuko igiye kwaguka mu buryo bw’ikoranabuhanga.

Yasabye urubyiruko rutuye iyi ntara kurushaho kubyaza umusaruro amahirwe babonye cyane ko nta kiguzi bazajya basabwa mu guhabwa amahugurwa mu by’ikoranabuhanga no kurikoresha muri icyo cyumba.

Ambasaderi w’u Buyapani mu Rwanda, Masahiro Imai, yavuze hari byinshi igihugu ahagarariye gihuriyeho n’u Rwanda birimo nko kuba ari ibihugu bidakungahaye ku mutungo kamere bityo ko bikwiye gushyira imbaraga mu kubakira ubushobozi umuturage.

Yavuze ko ikoranabuhanga ari imwe mu nzira u Buyapani bwatangiye gushyigikira guhera mu 2010 hagamijwe guhanga imirimo mishya n’iterambere rirambye.

Ati “Nk’uko mubizi abaturage ni wo mutungo w’ibanze w’iterambere. Turi kugerageza gufasha u Rwanda mu rugendo rwo kugera ku cyerekezo 2050, kandi ikoranabuhanga ni ryo ryihariye kuko hakenewe kubaka ubukungu bushingiye ku bumenyi. Birumvika ko icyerekezo 2050 kizagerwaho hifashishijwe urwego rw’ikoranabuhanga.”

Mu masezerano JICA yagiranye na Minisiteri y’Ikoranabuhanga harimo gutanga amahugurwa ku rubyiruko mu byerekeye ikoranabuhanga, gutanga ibikoresho bigezweho kandi bikenewe hanyuma ibisigaye bigakorwa n’ubuyobozi bw’Akarere icyo cyumba kiba cyubatsemo.

Umuyobozi wa JICA mu Rwanda, Shin Maruo, yabwiye IGIHE ko mu rwego rwo kugera ku mpinduka zikenewe bisaba imbaraga zidasanzwe ku nzego zitandukanye zirimo ubuyobozi bw’uturere nk’ubwegurirwa inshingano zo gukurikirana ibigo nk’ibi.

Urubyiruko rwiteguye kukibyaza umusaruro

Icyumba cyo muri aka Karere giherereye mu Murenge wa Muhoza, urubyiruko ruzajya ruhahurira ruhange ibihangano bitandukanye bijyanye n’udushya mu ikoranabuhanga.

Mu byo bashobora gukora harimo ibishushanyo bigezweho kandi bibumbatiye ubukerarugendo, kwandika ku byapa mu buryo buteye imbere, gukora ububaji bwisumbuyeho n’ibindi.

Mupenzi Desailly umaze ibyumweru bibiri ahugurirwa kuba umufashamyumvire muri iki kigo ku bijyanye no gukoresha ibikoresho birimo kimwe na bagenzi be, yavuze ko abona bigiye kuzana izindi mpinduka.

Ati “Hano turi mu Karere k’ubukerarugendo kandi ibi byari byarabuze. Iyo ugiye ku bireba usanga ari ibintu abantu babikora utamenya uko babikoze, twebwe hano tubona iki ari ikigo cyiza gishobora kubyara amafaranga aruta n’ayo dutekereza. Ikindi ibi bikoresho dukora ntabwo bihenze cyane.”

Yasabye abatuye Akarere ka Musanze n’Intara y’Amajyaruguru muri rusange kumenya ko ibyo bakuraga i Kigali n’iwabo bihari ndetse asaba n’ubuyobozi bw’Akarere kurushaho kubashyigikira.

Umuyobozi ushinzwe ishoramari no kwiga ku masoko muri RISA, Diana Gahima yavuze ko kugeza ibi byumba by’ikoranabuhanga mu mijyi yunganira Kigali biri mu rwego rwo gufasha impano zapfukiranwaga mu bice by’icyaro kwigaragaza.

Urubyiruko rwo mu Karere ka Musanze rwagaragajwe ko ruzungukira byinshi kuri iki kigo
Ubwo Amabasaderi w'u Buyapani Masahiro Imai na Guverineri w'Intara y'Amajyaruguru, Nyirarugerero Dancille yafunguraga ku mugaragaro iki kigo
Uhereye iburyo, Ambasaderi Masahiro Imai, Meya wa Musanze, Ramuli Janvier, n'Umuyobozi mukuru wa JICA mu Rwanda Maruo Shin
Muri iki kigo harimo ibikoresho byitezweho guhindura umwuga w'ububaji mu buryo bugezweho
Ni igikorwa cyitabiriwe n'abayobozi bo mu nzego zinyuranye zikorera mu Rwanda
Umuyobozi muri RISA ikurikirana ibijyanye n'ibi bigo, Diana Mutoni Gahima yavuze ko biri gushyirwa mu mijyi yunganira Kigali mu rwego rwo kugeza ikoranabuhanga kuri bose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .