Miliyari 5.4 Frw zashowe mu kurwanya indwara ziterwa n’umwanda

Yanditswe na Twarabanye Venuste
Kuya 19 Gashyantare 2020 saa 09:51
Yasuwe :
0 0

Minisiteri y’Ubuzima yatangaje ko igiye gukoresha miliyari eshanu na miliyoni 400 z’amafaranga y’u Rwanda muri gahunda zo kurwanya indwara ziterwa n’umwanda yitezweho ko gahunda yo gukaraba intoki izaba yagezweho 100% mu 2024 ivuye kuri 4.4% yariho mu 2015.

Ni kenshi inzego z’ubuzima zitanga inama zo kwirinda indwara ziterwa n’isuku nke zirimo gukaraba intoki igihe umuntu avuye mu bwiherero, agiye gufata amafunguro, igihe umubyeyi amaze gukorera umwana isuku cyangwa agiye kumwonsa n’izindi ariko udasanga zidakurikizwa buri gihe.

Kugira ubwiherero bupfundikirwa, bukinze kandi busakaye nabyo bigaragazwa nk’ingingi ikomeye mu kwitwararika isuku mu rugo ariko hakiyongeraho n’ahantu habugenewe ho gukaraba intoki igihe amaze kubukoresha ariko nabyo ntibyubahirizwa.

Habineza Emmanuel utuye mu Karere ka Nyarugenge yabwiye RBA ko ahenshi usanga bafite ubwiherero ariko aho gukarabira hazwi nka kandagira ukarabe wayisanga hake.

Yagize ati “Imisarani irahari ariko za kandagira ukarabe nk’ubu ugiye nko mu ngo 10 wahabona nk’imwe.”

Ubushakashatsi bw’Ishami ry’Umuryango w’Abibumbye ryita ku Buzima, OMS, bwo mu 2017 kimwe n’ubw’Ikigo cy’Igihugu cy’Ibarurishamibare ku mibereho y’abaturage (DHS) bwa 2014/15 bwerekana ko mu Rwanda ingo 12% arizo zifite aho gukarabira naho 4.4% by’ingo zose mu gihugu nizo zari zifite ibikoresho byose n’isabune byifashishwa mu gukaraba intoki.

Minisiteri y’Ubuzima yatangiye gahunda y’imyaka itanu izarangira mu 2024 igamije kwigisha Abanyarwanda umuco wo gukaraba intoki no kongera ibikoresho by’isuku ahahurira abantu benshi.

Miliyari eshanu na miliyoni 400 Frw niyo azakenerwa mu gihe cy’imyaka itanu ku buryo bitarenze mu 2024 politiki yo gukaraba intoki izaba yagezweho ijana ku ijana bivuye kuri 4.4% mu 2015. Ibi bizabaganya indwara ziterwa n’isuku nke ku kigero cya 40%.

Umuyobozi ushinzwe iby’Ubuzima bushingiye ku Bidukikije muri Minisiteri y’Ubuzima, Mukamunana Alphonsine, yavuze ko kwirengagiza kugira ubwiherero bwujuje ibisabwa no gukaraba intoki igihe umuntu arangije kubukoresha biri mu bitera indwara zitandukanye.

Ati “Iyo gukaraba intoki bikozwe neza bigabanya indwara z’impiswi n’izindi ndwara zituruka ku mwanda ku gipimo cya 40%. Isuku nkeya cyane cyane kudakaraba intoki bishobora gutera indwara z’imirire mibi n’igwingira mu bana.”

Umuyobozi Mukuru muri Minisiteri y’Ubutegetsi bw’Igihugu ushinzwe Iterambere ry’icyaro n’imibereho myiza, Bahame Hassan, yavuze ko mu Rwanda hari ubwiherero bugera ku bihumbi 400 ariko intego ari ukugera ku 100% bitarenze mu 2024. Ni ukuvuga ko buri rugo mu ngo miliyoni 2.8 rugomba kugira ubwiherero.

Avuga ko muri gahunda zo gukangurira Abanyarwanda kubaka ubwiherero bwujuje ibisabwa aho basanze budahari kandi n’umuturage atishoboreye kubaka cyangwa kubusana babibumufashamo.

Ati “Aho dusanze ubwiherero wenda butameze neza kandi tukabona ko nyirabwo nta bushobozi byabaga ngombwa ko dukoresha imbaraga igihugu cyaduhaye kugira ngo tubusane cyangwa se tubwubake.”

Ubushakashatsi bwa OMS bwakorewe mu bihugu 42 birimo n’u Rwanda mu 2017 bwerekana ko ingo zigera kuri 54% zifite ikibazo cy’ubuke bw’ibikoresho byo gukaraba intoki cyiganje cyane mu bihugu byo Munsi y’Ubutayu bwa Sahara.

Mu bikorwa bizibandwaho harimo no gutoza abaturage umuco wo gukoresha kandagira ukarabe bavuye mu bwiherero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza