00:00:00 IGIHE NETWORK KN KINYARWANDA EN ENGLISH FR FRANCAIS

Miliyari 10 Frw zigiye kwifashishwa mu kubaka ibimoteri bigezweho mu mijyi yunganira Kigali

Yanditswe na Igizeneza Jean Désiré
Kuya 19 Mutarama 2023 saa 08:55
Yasuwe :

Mu rwego rwo gukomeza kwimakaza isuku no kurushaho kurimbisha imijyi yunganira Kigali ndetse no gukomeza kubungabunga ibidukikije u Rwanda rugiye gutangira kubaka ibimoteri bigezweho bifatanye n’inganda zitunganya imyanda yo mu musarani bizatwara arenga miliyari 10 z’amafaranga y’u Rwanda.

Ni ibimoteri bizubakwa ku nkunga ya Banki Nyafurika Itsura Amajyambere, AfDB mu turere twa Musanze, Rubavu, Karongi na Rusizi, ibizoroshya uburyo bw’imicungire y’imyanda dore ko bizaba bifite n’uburyo bwo guhindura ibora mo ifumbire.

Kugeza ubu amasoko y’ibi bimoteri yamaze gutangwa. Biteganyijwe ko amasezerano yo kubyubaka hamwe na ba rwiyemezamirimo azaba yasinywe muri Werurwe 2023 imirimo igatangira muri Mata ikazamara amezi 12.

Umuyobozi w’Agateganyo ushinzwe iterambere rya serivisi z’amazi n’isukura muri, WASAC, Murekezi Dominique, yabwiye IGIHE ko mu iyigwa ry’umushinga, hateganyijwe igice kizakomeza kwakira ibishingwe bikazashyingurwa umushinga urangiye.

Ati “Mu Karere ka Musanze ikimoteri kizubakwa mu Murenge wa Gacaca. Aha ho ibishingwe bizakomeza gushyirwa ahasanzwe ikimoteri mu gihe ikindi kizaba kiri kubakwa.”

Ibi bimoteri bizaba bifite ubushobozi butandukanye hakurikijwe ingano y’ibishingwe biboneka muri buri mujyi bikorwe hanashingirwa ku cyerekezo 2050 cyo kuzamura ubukungu bw’igihugu no kubungabunga ibidukikije.

Ikimoteri kizubakwa mu Karere ka Musanze kizaba gifite ubushobozi bwo kwakira ibishingwe bingana na metero kibe ibihumbi 200 no kwakira imyanda yo mu musarani ingana na metero kibe 90 ku munsi.

Icyo mu Karere ka Rubavu kizajya cyakira ibishingwe bya metero kibe ibihumbi 200 n’imyanda yo mu musarani ingana na metero kibe 250 ku munsi mu gihe icyo mu Karere ka Karongi kizajya cyakira ibishingwe bya metero kibe ibihumbi 100 n’imyanda yo mu musarani.

Ikizubakwa mu Karere ka Rusizi cyo gifite ubushobozi bwo kwakira ibishingwe bingana na metero kibe ibihumbi 100 na metero kibe 30 z’imyanda yo mu musarani.

Iyi myanda yo mu musarane izajya yumishwa ikorwemo ifumbire indi ibyazwe ingufu, ibizunganira uruganda ruzubakwa mu Karere ka Kicukiro ruzuzura rutwaye arenga miliyari 7,5 Rwf yatanzwe na Banki yo mu Budage y’iterambere KFW.

Ni umushinga uje gukemura uburyo busanzwe bukoreshwa bwo kurunda ibishingwe ku musozi aho usanga bitabasha kubyazwa umusaruro ndetse bikagira ingaruka zitandukanye harimo kwangiza ibidukikije, kunyanyagira kw’imyanda, gukoresha nabi ubutaka, aho bishobora no kuba byateza indwara.

Ibigiye kubakwa bigiye kwiyongera ku byubatswe mu 2017 mu turere twa Nyanza, Kayonza na Nyagatare ubu bimaze imyaka itandatu bikora.

Murekezi ati “Dushingiye k’ubunararibonye twakuye mu bimoteri byamaze kubakwa, muri uyu mushinga w’ibimoteri bigezweho, hazakoreshwa uburyo bwo kuvangura imyanda hakurwamo ibora izajya ibyazwamo ifumbire.”

Akomeza avuga ko imyanda ya pulasitiki ishobora kuzabyazwamo ibindi harimo na gaz, impapuro zikazajya zifungwa hifashishijwe imashini (compressing machine) na zo zigatunganywa zikongera gukoreshwa, mu gihe imyanda mike isigara itabora kandi itabyazwamo ibindi iteganyirijwe ibyobo byo kuyishyinguramo.

Ati “Uko bizakorwa byizweho. Imyanda izajya igezwa ku kimoteri ibanze gushyirwa ahabugenewe ivangurwe aho hashobora no kwifashishwa uburyo bw’imashini mu kuvangura iyo myanda.”

U Rwanda rushyize imbaraga mu kugabanya ingano y’ibishingwe bijyanwa ku bimoteri binini gutunganywa binyuze mu kubibyariza umusaruro aho byavanguriwe mu bice bitandukanye.

Bizoroshywa n’igishushanyo mbonera gikomatanyije cyo ku rwego rw’igihugu (National Integrataed Saniation Master Plan) kigaragaza byimbitse ibikwiye gukorwa muri buri karere cyamaze kuboneka kugira ngo iyi myanda yose ijye ibyazwamo umusaruro ibyari ibibazo bibe ibisubizo.

Iyi niyo mpamvu hari kubakwa ibikorwaremezo bitunganya imyanda hagendewe kuri icyo gishushanyo mbonera kandi bikubakwa mu buryo bwo koroshya ikusanywa ry’imyanda, igaragara mu duce tw’igihugu.

Bijyana no gushishikariza abikorera no kubereka ko imyanda yabyazwamo ibindi bikoresho, kwereka abikorera ingero z’uko imyanda ibyazwa ifumbire y’imborera nziza kandi ifite isoko hagendewe kubatangiye kubikora hano mu gihugu n’ahandi.

Ni umushinga wiyongera ku yindi irimo n’uwo WASAC iherutse gusinyana amasezerano y’ubufatanye na Komisiyo y’Umuryango wa Afurika y’Iburasirazuba ishinzwe kubungabunga icyogogo cy’ikiyaga cya Victoria (LVBC), ajyane no kubaka uruganda rutunganya amazi mabi yo mu ngo n’imyanda yo mu musarane kugira ngo bitangiza ibidukikije.

Wiyongera ku mishinga irimo uwo Minisiteri y’Ibikorwaremezo iri mu biganiro n’Abanya-Suède yo kubyaza imyanda y’ikimoteri cya Nduba kikabyazwamo gaz yakwifashishwa mu modoka cyangwa mu guteka.

Muri Mutarama u Rwanda rweguriye umushoramari wo muri Leta Zunze Ubumwe z’Abarabu (UAE), ufite uruganda rutunganya imyanda y’ibikoresho by’ikoranabuhanga rwa Enviroserve, rukorera mu Karere ka Bugesera.

Enviroserve Rwanda Green Park ifite intego yo gukusanya toni 200 z’imyanda ku kwezi aho hazajya hifashisha uburyo butandukanye nko kugura iyo myanda mu baturage. Byose bikagaragaza umuhati igihugu gifite mu kwita ku bidukikije ari na ko hahangwa indi mirimo.

U Rwanda rwahagurukiye kwita ku bidukikije hakusanywa imyanda itabwa ku gasozi ikabyazwa umusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .