MIGEPROF yasabye abashakanye kuzirikana kuboneza urubyaro muri ibi bihe birirwa mu rugo

Yanditswe na Twarabanye Venuste
Kuya 29 Werurwe 2020 saa 06:35
Yasuwe :
0 0

Minisiteri y’Uburinganire n’Iterambere ry’Umuryango (Migeprof) yasabye abashakanye ko muri iki gihe bari kumwe kubera gahunda yo kuguma mu ngo birinda Coronavirus, bazirikana gahunda zo kuboneza urubyaro.

Mu kiganiro Minisitiri w’Uburinganire n’Iterambere ry’Umuryango, Prof Bayisenge Jeannette yagiranye na RBA, yavuze ko bikwiye ko abashakanye bari mu ngo muri iki gihe bazirikana gahunda zo kuboneza urubyaro mu rwego rwo kwirinda inda zidateganyijwe.

Ati “Turasaba abashakanye ko muri iki gihe bari kumwe mu rugo kubera icyorezo cya Covid-19, bazirikana gahunda zo kuboneza urubyaro mu rwego rwo kwirinda inda zitateganyijwe.”

Minisitiri Bayisenge yakomeje ashishikariza abagize umuryango kwimakaza ibiganiro, abari barabuze umwanya bakongera kuganira ku ngingo zo guteza imbere urugo ndetse bakita ku bana.

U Rwanda ni kimwe mu bihugu byagezweho n’ingaruka nziza zo kuboneza urubyaro mu myaka ishize aho byatumye umubare w’abana umubyeyi ashobora kubyara uva ku gipimo cya 5.8 mu 2000 ukagera kuri 4.2 mu 2015. Muri icyo gihe, abakoresha uburyo bwa kizungu bavuye kuri 4% bagera kuri 48%.

Ibarura ry’ubwiyongere bw’abaturage n’imibereho yabo (DHS) 2014-2015, rigaragaza ko 53% by’abagore bashatse bose bakoreshaga uburyo bwo kuboneza urubyaro.

Gusa ntabwo biragera ku gipimo cyifuzwa nk’igihugu kiri mu bifite umubare munini w’abatuerage muri Afurika, ingingo ifatwa nk’inzitizi ku ntego z’iterambere.

Nicole Pasquino, Umuyobozi w’umuryango wita ku buzima bw’imyororokere muri Canada, Options for Sexual Health yatanze inama z’uko mu gihe abantu bari mu ngo zabo bubahiriza amabwiriza yashyizweho, badakwiriyeho kwirengagiza uburyo bwo kuboneza urubyaro.

Aganira n’ikinyamakuru City News yagize ati “Tuzi ko ibi bishobora kongera ubukana bw’inda zitateganyijwe. Hari amakuru atandukanye avuga igihe runaka abana bavuka ari benshi ariko nkeka ko mu gihe abantu begeranye cyane, umwe ari hafi y’undi, imibonano mpuzabitsina ni kimwe mu bibagabanyiriza guhangayika.”

Imibare yashyizwe ku mugaragaro n’ikigo gishinzwe ibarurishamibare mu Bwongereza mu mwaka wa 2015, yagaragaje ko mu myaka 20 ishize, abana benshi bavutse nyuma y’amezi icyenda Noheli ibaye.

Ibi ngo bishobora kuba biterwa n’uko abashakanye bamara iminsi bari kumwe mu birori bisoza umwaka.

Mu Bwongereza abana 1,800 ni bo bavukaga buri munsi, ariko icyo kegeranyo cyagaragaje ko tariki ya 26 Nzeri 2015 biyongereye bakagera ku 1,974 .

Umwarimu wigisha ibijyanye n’ubuzima bw’imyororokere muri kaminuza ya Sheffield, witwa Allan Pacey yavuze ko yemeranya n’abakoze ubu bushakashatsi, kuko iminsi mikuru igira uruhare mu kwiyongera kw’abana bavuka mu minsi ikurikiyeho kuko abashakanye cyangwa abakundana bamara igihe bari kumwe.

Ku wa 21 Werurwe 2020 nibwo Guverinoma y’u Rwanda, yatangaje ko hashingiwe ku ntera icyorezo cya Coronavirus kimaze gufata n’uburyo ibindi bihugu bihangana nacyo, hafashwe ingamba zirimo gufunga imipaka, abantu badafite ibikorwa byihutirwa bakaguma mu ngo mu rwego rwo gukumira ikwirakwira ryacyo.

Izo ngamba zitangazwa abagaragayeho coronavirus bari 17 ubu bamaze kugera kuri 60. Igihe cy’ibyumweru bibiri cyatanzwe, inzego z’ubuzima zivuga ko gishobora kongera bitewe n’ubukana bw’icyorezo.

Minisitiri Bayisenge Jeannette yavuze ko bikwiye ko abashakanye bari mu ngo muri iki gihe bazirikana gahunda zo kuboneza urubyaro mu rwego rwo kwirinda inda zidateganyijwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .