MIGEPROF yasabye abari mu ngo kwirinda ihohotera muri ibi bihe bya coronavirus

Yanditswe na Twarabanye Venuste
Kuya 29 Werurwe 2020 saa 02:45
Yasuwe :
0 0

Minisiteri y’Uburinganire n’Iterambere ry’Umuryango (Migeprof) yasabye abagize umuryango kwirinda ihohoterwa bimakaza urukundo ndetse abafite abana bakarushaho kubitaho muri iki gihe abantu basabwa kuguma mu rugo nk’imwe mu nama zikomeye zo kwirinda Coronavirus.

Hashize igihe hacicikana ubutumwa ku mbuga nkoranyambaga bamwe berekena ko kuba mu rugo muri iki gihe, hari inyungu bari kubiboneramo, abandi bakerekana ko byababereye ihurizo kuko bagoroberezaga ahandi kubera gutinya gutaha kare mu ngo zabo,kubera ubwumvikane buke.

Mu kiganiro Dusangire Ijambo cyatambutse kuri RBA kuri iki Cyumweru tariki 29 Werurwe 2020, Migeprof yasabye abagize umuryango kubahiriza ingamba zo kwirinda coronavirus ariko na none nk’umuryango bikababera umwanya wo gushyira imbere urukundo ko kujya inama.

Kuri abo bavuga ko kuba mu ngo byababereye ihurizo kuburyo byumvikana ko byabaviramo amakimbirane, Kayitesi Goretti Ushinze kurwanya ihohoterwa rishingiye ku gitsina muri Migeprof, yabibukije ko ihohoterwa ari icyaha.

Ati “Buri wese aho ari yumve ko ihohoterwa ari icyaha gihanwa n’amategeko, iyo uhohoteye umuntu uba umuvukije uburenganzira bwe kandi ntawemerewe kuvutsa undi uburenganzira bwe.”

Kayitesi avuga ko nyuma yo gushyira ingamba zo kwirinda mu bikorwa, ‘Guma mu rugo’ ukwiye kuba umwanya wo gushyira gahunda z’urugo ku murongo, abafite abana bakababa hafi mu gusubira mu masomo no kubaha amasomo atandukanye arimo no kubigisha ku ihohoterwa ribakorerwa.

Ati “ Muri ibi bihe turi mu rugo dufashanye dushyire urukundo imbere, buri wese yubahe mugenzi we yumve ko ntawe ufite uburenganzira bwo kwihanira. Icyo umuntu yagukorera cyose ntabwo ushobora kwihanira ntibyemewe. Ahubwo tuganire turebe ngo ese iyi minsi dusabwa kuba mu rugo tugiye kuyitwaramo dute, za nshingano, baba bana twari dufite umwanya muto wo kuganira tubaganirize gute, tunababwira na bya bibazo byari bisanzwe bibugarije birimo na rya hohoterwa ribakorerwa.”

Umuhuzabikorwa wa Isange One Stop Center, Shafiga Murebwayire akaba anashinzwe kurwanya ihototerwa rishingiye ku gitsina no kurengera abana yavuze ko Isange zose mu gihugu uko ari 44 ziherereye mu bitaro zifunguye kuburyo n’uwahohoterwa ubu adakwiye gutinya kuzigana.

Ati “Nkuko serivisi zo kuvura abarwayi zisanzwe zirimo zikora, n’izo serivisi zo kuri Isange zirakora. Ni ukuvuga ngo kuri RIB [Urwego rw’igihugu rw’ubugenzacyaha] baramwakira, kuri Isange baramwakira. Ntihagire umuntu uheranwa n’iryo hohoterwa yakorewe ngo kubera ko hariho gahunda ya Guma mu rugo. Iyo ageze ku muhanga agasobanura impamvu imujyanye baramufasha akagenda.”

Hari nimero zitandukanye zashyizweho uhohotewe ashobora guhamagara; hari 3029 cyangwa kuri 3512 hakaba na nimero ya RIB 166 ni mu gihe ku ihohoterwa rikorewe umwana ahamagara ku 116.

Ubushakashatsi bw’Umuryango w’Abibumbye bwo muri Werurwe 2019 bugaragaza ko umugore umwe muri batanu aba yarahuye n’ihohoterwa rishingiye ku gitsina mu buzima bwe, ibi bikaba bigira ingaruka no ku muryango we muri rusange.

MIGEPROF yasabye abagize umuryango kubyaza umusaruro gahunda ya ‘Guma mu rugo’ birinda ihohoterwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .