00:00:00 IGIHE NETWORK KN KINYARWANDA EN ENGLISH FR FRANCAIS

Meya Sebutege yasabye abizihiza Pasika guharanira ko abana bavuye mu ishuri barisubizwamo

Yanditswe na Prudence Kwizera
Kuya 18 April 2022 saa 06:58
Yasuwe :

Umuyobozi w’Akarere ka Huye, Sebutege Ange, yaganiriye n’abakirisitu abifuriza Umunsi Mwiza w’Izuka rya Yezu (Pasika) abagenera n’ubutumwa bugamije guteza imbere imibereho myiza yabo.

Yaganiriye n’Abakirisitu bo muri Paruwasi ya Rango mu Karere ka Huye ku Cyumweru, tariki ya 17 Mata 2022, ubwo yari yifatanyije na bo mu guhimbaza Misa ya Pasika.

Nyuma y’Igitambo cya Misa yabayemo amasakaramentu arimo kubatizwa no gukomezwa, Sebutege yahawe umwanya muto aganira n’abakirisitu abagenera ubutumwa bukubiye mu ngingo enye.

Yabanje kubifuriza Pasika nziza abashimira n’uburyo babashije guhuza imbaraga bakavugurira Kiliziya ikaba nziza. Yabashimiye isuku bari bafite abasaba kuyihorana buri gihe kuko izabafasha kugira ubuzima bwiza no kwirinda indwara zituruka ku mwanda.

Yavuze ko akenshi iyo ageze mu Murenge wa Rango ahura n’abana barimo abafite umwanda, asaba ababyeyi gukemura icyo kibazo.

Ati “Muracyeye mumeze neza mufite isuku, iyi suku mufite ibe iya buri gihe mujye muyihorana haba ku mubiri ku myenda no mu ngo zanyu.”

Icya gatatu yabasabye ni ukwihutira kujyana abana ku ishuri kuko amashuri yatangiye.

Yababwiye ko hari n’abana bavuye mu ishuri asaba ababyeyi kubasubizayo kuko kwiga ari byo bizabafasha kugira ejo hazaza heza.

Mu ntangiriro z’uyu mwaka mu Karere ka Huye ibarura ryari ryagaragaje ko mu mashuri y’incuke, abanza, ayisumbuye n’ay’imyuga, abana bagera ku 8184 bataye ishuri kuva uyu mwaka watangira.

Barimo 1832 bataye ishuri mu gihembwe cya mbere n’abandi 6352 bataraza gutangira icya kabiri. Icyo gihe hahise hatangizwa ubukangurambaga bwo kubasubiza mu ishuri, abenshi barigarukamo.

Icya kane Sebutege yabibukije ni uko muri ibi bihe by’imvura bakwiye no kwibuka gukumira ibiza bishobora kubibasira bikangiza ubuzima bwabo cyangwa imitungo yabo.

Ati “Mwibuke kureba ko ibisenge by’inzu zanyu biziritse neza bidashobora gutwarwa n’umuyaga, musibure imirwanyasuri ku buryo amazi atabasenyera kandi mukurikize n’izindi nama mugirwa zo gukumira ibiza.”

Mu Karere ka Huye imibare igaragaza ko kuva muri Nzeri 2021 kugeza muri Gashyantare 2022 abantu bane bahitanywe n’ibiza, 15 barakomereka, inzu zasenyutse zigera kuri 42, hegitari 106 z’imyaka ihinze mu mirima zirangirika ndetse n’ibilometero 41 by’imihanda birasenyuka.

Yabasabye kwirinda kubaka mu kajagari kuko ari bimwe mu bidindiza iterambere, asaba ko ukeneye kubaka asaba ibyangombwa akabihabwa kugira ngo akurikize igishushanyo mbonera cyashyizweho.

Bamwe mu bakirisitu bari bitabiriye misa babwiye IGIHE ko bishimiye ko Umuyobozi w’Akarere ka Huye yaje kwifatanya na bo kuri Pasika.

Muhimpundu Olive ati “Byadushimishije cyane kuba umuyobozi w’Akarere yaje kwifatanya natwe kuri Pasika kandi inama yatugiriye zose twazumvise kandi tugiye kuzikurikiza.”

Bavuze kandi ko bishimiye kongera kwizihiza Pasika bari hamwe nyuma y’imyaka ibiri batabibasha kubera ingamba zo kwirinda icyorezo cya Covid-19.

Bamwe mu bakirisitu bari bitabiriye Misa bavuze ko bishimiye ko Umuyobozi w’Akarere ka Huye yaje kwifatanya na bo kuri Pasika kandi n’inama yabagiriye bagiye kuzubahiriza
Umuyobozi w’Akarere ka Huye, Sebutege Ange, yaganiriye n’Abakirisitu muri Paruwasi ya Rango abifuriza Pasika nziza bagenera n'ubutumwa bubafasha kubaho neza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .