Meya Rubingisa yasabye abakodesha muri Kigali kumvikana n’abafite inzu ku bukode bw’ukwezi

Yanditswe na Habimana James
Kuya 24 Werurwe 2020 saa 07:33
Yasuwe :
0 0

Meya w’Umujyi wa Kigali, Rubingisa Pudence, yasabye abafite inzu bakodesha muri Kigali kumvikana n’abakiliya babo muri ibi bihe igihugu gihanganye n’icyorezo cya COVID-19 iterwa na Coronavirus.

Rubingisa yavuze ko atari ugutegeka abafite inzu uko bitwara muri iki kibazo ariko ko hakwiye kubaho ubwumvikane cyane ko iki ari ikibazo cyugarije buri wese.

Nyuma y’aho icyorezo cya Coronavirus kigaragaye mu Rwanda tariki 14 Werurwe 2020, guverinoma yafashe ingamba zikomeye zigamije guhangana n’iki cyorezo ngo kidakomeza gukwira. Muri zo harimo bimwe mu bikorwa by’ubucuruzi byahagaritswe mu gihe cy’ibyumweru bibiri bishobora kongerwa, abaturage basabwa kuguma mu ngo.

Ni ibyemezo bishobora kugira ingaruka ku bari basanzwe bakodesha mu gihe icyorezo cyakomeza kwiyongera, kuko uburyo bwo kubona amafaranga yo kwishyura bushobora kugorana.

Meya Rubingisa yabwiye IGIHE ko igishoboka ari ibiganiro hagati y’ufite inzu n’ukodeshwa byabafasha kumvikana.

Yagize ati “Igikomeye ni ukugira ngo bombi bumvikane, cyane ko n’ubundi utakuramo umuntu ngo ubone undi ujyamo. Turavuga tuti niba umuntu atarimo kubona amafaranga, imibereho ikaba irimo kumugora, bareba uko bumvikama kandi nzi ko n’ubundi byari bisanzwe bibaho na mbere ariko ntabwo twabwira abantu ngo mubigenze gutya.”

Rubingisa yavuze ko igikwiye gushyirwa imbere, ari uko abantu bose bumva ko bari mu bihe bikomeye kandi bakwiye gufatanya.

Yavuze ko atategeka abafite inzu uko babigenza cyane ko bishoboka ko nabo aho ariho bavana uko babaho.

Ku mbuga nkoranyambaga, hagiye hatangwa ibitekerezo bisaba Leta gukora ubuvugizi ku bantu baba mu nzu bakodesha, kugira ngo batazishyuzwa ubukode bitewe n’ubukungu butifashe neza.

Nk’uwitwa Tuyisenge Jean Paul yagize ati “Nimubyemeze nk’ubuyobozi umupangayi azishyure 50%, impande zombi zikomeze ubuzima.”

Uwitwa Gasangwa we yavuze ati “Twabishyuraga twakoze none ntiturimo gukora, bategereze igihe tuzavira mu kato, mbese inzu zabo bazifate nk’ari mu kato.”

Hari uwagize ati “Aha rwose mwiteranya abantu kuko impande zombi birazireba. Umuntu ufite inzu imwe imutunze niwe ufite ibibazo kurusha umuntu uhembwa nubwo yaba ari umupangayi we.”

Minisitiri w’Ubucuruzi n’Inganda, Hakuziyaremye Soraya, aherutse kuvuga ko muri ibi byumweru bibiri, batasaba abafite inzu kutishyuza ubukode, ariko bazareba uko ikibazo kigenda gifata intera hagire ingamba zifatwa.

Rubigingisa yavuze ko igikwiye gushyirwa imbere, ari uko abantu bose bumva ko bari mu bihe bikomeye kandi bakwiye gufatanya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza