Yifuzaga kuba Umupadiri: Uko Meya wa Bugesera yatunguwe no kuba Umuyobozi

Yanditswe na Ishimwe Alain
Kuya 21 Nzeri 2020 saa 04:54
Yasuwe :
0 0

Umuyobozi w’Akarere ka Bugesera, Mutabazi Richard, wahoze ari Umunyamabanga Mukuru w’Ishyirahamwe ry’Umukino w’intoki wa Basketball mu Rwanda (FERWABA), yatangaje ko atigeze atekereza kuba Umuyobozi w’Akarere n’ubwo yahoze muri njyanama y’Akarere ka Bugesera kuva mu 2016.

Mutabazi azwi mu mikino cyane cyane basketball mu Rwanda. Azwiho kandi kugira urugwiro, aho akunze kugaragara asabana n’abantu b’ingeri zose kuva ku bana kugera ku bakuru.

Mu kiganiro na RBA, Mutabazi yatangaje uko byamugendekeye kugira ngo abe Meya w’Akarere ka Bugesera na cyane ko we atiyumvishaga uburyo yaba umuyobozi wo ku rwego rw’akarere.

Yagize ati “Wenda ntabwo nakabya ngo mvuge nka kumwe ujya wumva nk’umuhanzi indirimbo ze zanyuzeho avuga ati ‘kuva mu myaka ine ishize nabyiyumvagamo’, rwose ntabwo nabeshya ngo nigeze niyumvamo ko nzaba meya cyangwa umuyobozi wo ku rwego uru cyangwa uru.”

Yakomeje agira ati “Nakuze ubuzima bwanjye bugenda buhinduka. Numvaga nzaba umupadiri nkiga mu mashuri y’ibanze, nageze mu mashuri yisumbuye numva nzaba umunyamakuru [ariko] navuyemo numva ngomba kuba umuganga, [ariko] birangira mbaye umukanishi”.

Mutabazi kandi yasobanuye uko byagenze kugira ngo abe ari we utoronywa nk’umuyobozi w’akarere by’agateganyo, n’uko yabyakiriye.

Yagize ati “Abantu bose niba bantoranyije mbyange kubera ko nkwiriye kuba ikindi kirenze meya, mbyage kubera ko ntafite imbaraga zo kubiyobora kandi banshyigikiye? Naravuze nti ‘reka mbigerageze ahubwo mbikore mu buryo bwanjye, nibagera igihe cyo gutora, bazareka kuntora kuko uburyo atari bwiza cyangwa se nibantora bazaba bemeye ko nkomereza muri uwo mujyo, [rero] ntibizigera bimvuna".

Mutabazi yatangaje ko nyuma yaje kwiyamamariza kuba Umuyobozi w’Akarere amaze kubona ko yabishobora kuko yiyumvagamo ko ubwo yashoboye kuyobora akarere ari umwe, bitazamunanira ari kumwe n’abamwungiriza.

Uyu mugabo kandi yatangaje ko kuba meya nibura amezi atatu gusa uba ubonye ubunararibonye bwinshi kandi mu bintu bitandukanye ku buryo utabibona ahandi nko mu ishuri.

Yagize ati “Iyo uri meya, iby’ubucuzuzi urabibazwa, iby’amashuri urabibazwa, iby’amakimbirane mu miryango, iby’umutekano mu muhanda urabibazwa, n’ibindi byinshi. Guhuza ibyo bintu byose hamwe kandi hari amatsinda abifitiye ubumenyi abishinzwe, amakuru uvanamo n’ubunararibonye uvanamo birakomeye cyane”.

Mutabazi Richard mbere y’uko aba Umuyobozi w’Akarere ka Bugesera yahoze ari Umujyanama w’ako karere kuva muri 2016. Yabaye n’Umunyamabanga Mukuru w’Ishyirahamwe ry’Umukino wa Basketball mu Rwanda (FERWABA).

Uyu mwanya yawutorewe mu 2013 yongera kugirirwa icyizere muri manda y’imyaka ine mu matora yo mu 2018. Yanayoboye Ikigo cy’Umukino w’Amagare kiri mu Karere ka Musanze ‘Africa Rising Cycling Centre-ARCC’ mu gihe cy’umwaka umwe.

Meya Richard Mutabazi wa Bugesera ntiyari yiteze ko azaba umuyobozi w'akarere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .