00:00:00 IGIHE NETWORK KN KINYARWANDA EN ENGLISH FR FRANCAIS

Meteo Rwanda yateguje ko imvura igiye kugabanyuka mu gihugu hose

Yanditswe na IGIHE
Kuya 22 May 2022 saa 01:46
Yasuwe :

Ikigo gishinzwe ubumenyi bw’ikirere (Meteo Rwanda) cyatangaje ko mu minsi iri imbere imvura igiye kugabanyuka mu gihugu hose, uko abantu bakomeza gusatira ibihe by’impeshyi.

Kuri uyu wa Gatandatu nibwo iki kigo cyatangaje iteganyagihe ry’iminsi 10 iri imbere, ni ukuvuga hagati y’amatariki ya 21 -31 Gicurasi 2022.

Kivuga ko muri iyo minsi mu Rwanda hateganyijwe imvura iri hagati ya milimetero 0 na 60.

Gikomeza kiti "Imvura izagabanuka mu gihugu hose. Imvura iri hagati ya milimetero 45 na 60 niyo nyinshi iteganyijwe muri iki gice ikaba iteganyijwe henshi mu turere twa Nyamasheke, Rubavu, Rutsiro, Nyabihu, Musanze, Burera, mu majyaruguru y’uturere twa Gakenke na Ngororero, mu burengerazuba bw’uturere twa Nyamagabe na Nyaruguru no mu burasirazuba bw’akarere ka Rusizi."

Mu bice bisigaye by’Intara y’Amajyaruguru, Iburengerazuba, n’ibyo mu turere twa Nyaruguru na Nyamagabe hateganyijwe imvura iri hagati ya milimetero 30 na 45.

Imvura iri hagati ya milimetero 0 na 15 niyo nkeya iteganyijwe muri iki gice, ikaba iteganyijwe mu gice kinini cy’uturere twa Kayonza na Kirehe, mu burasirazuba bw’akarere ka Gatsibo no mu majyepfo y’akarere ka Bugesera.

Meteo Rwanda ivuga ko ibice bisigaye by’Intara y’Iburasirazuba n’Amajyepfo ndetse n’umujyi wa Kigali hateganyijwe imvura iri hagati ya milimetero 15 na 30.

Yakomeje iti "Nkuko byari biteganyijwe mu iteganyagihe ry’igihembwe cy’Itumba rya 2022, iyi mvura nke iteganyijwe mu gice kinini cy’igihugu iragaragaza icika ry’imvura y’Itumba uretse mu Ntara y’Iburengerazuba n’iy’Amajyaruguru aho biteganyijwe ko imvura izacika hagati y’itariki ya 1 n’iya 10 Kamena 2022."

"Imvura iteganyijwe izaba iri ku kigero cy’impuzandengo y’imvura isanzwe igwa henshi mu gihugu muri iki gice. Ikigero cy’impuzandengo y’imvura isanzwe igwa muri iki gice iri hagati ya milimetero 5 na 50."

Imvura iteganyijwe izaba irimo inkuba n’umuyaga, ikazaterwa n’isangano ry’imiyaga riherereye mu karere u Rwanda ruherereyemo ryongerera imbaraga imvura ituruka ku miterere ya buri hantu.

Uretse ibijyanye n’imvura, mu gice cya gatatu cy’ukwezi kwa Gicurasi 2022 hateganyijwe ubushyuhe bwinshi buri hagati ya dogere celsius 17 na 29 mu Rwanda.

Meteo Rwanda ikomeza iti "Mu bice bimwe by’umujyi wa Kigali, ikibaya cya Bugarama, igice cy’Amayaga n’ibice bimwe by’uturere twa Ngoma na Bugesera niho hateganyijwe ubushyuhe bwinshi kurusha ahandi buzaba buri ku gipimo kiri hagati ya dogere celsius 26 na 29."

Igipimo cy’ubushyuhe kiri hagati ya dogere celsius 23 na 26 giteganyijwe mu bice bisigaye by’intara y’Iburasirazuba, umujyi wa Kigali, mu turere twa Rusizi, Nyamasheke na Karongi ku nkengero z’ikiyaga cya Kivu no mu Ntara y’Amajyepfo.

Mu burengerazuba bw’uturere twa Nyamagabe na Nyaruguru hateganyijwe ubushyuhe buri hagati ya dogere celsius 20 na 23.

Meteo Rwanda yakomeje iti "Ubushyuhe buteganyijwe buri ku kigero cy’impuzandengo y’ubushyuhe busanzwe mu kwezi kwa Gicurasi igice cya gatatu."

Mu majyaruguru y’intara y’Amajyaruguru muri Parike y’Igihugu y’Iburunga, mu burengerazuba bw’akarere ka Nyabihu no mu burasirazuba bw’akarere ka Rubavu, niho hateganyijwe ubushyuhe buke buri ku gipimo kiri hagati ya dogere celsius 17 na 20.

Imvura igiye kuba nkeya cyane mu gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .