Meteo Rwanda irasabwa arenga miliyoni 900 Frw mu gusimbuza ibikoresho bimaze imyaka 15

Yanditswe na Habimana James
Kuya 5 Ukuboza 2019 saa 10:26
Yasuwe :
0 0

Ikigo cy’Igihugu cy’Ubumenyi bw’Ikirere, Meteo Rwanda, kigaragaza ko nubwo hari byinshi kimaze kugeraho, kikibangamiwe n’ibikoresho bimwe bishaje kuko hari n’ibimaze imyaka 15 bigikoreshwa.

Kuri uyu wa Kane ubuyobozi bwa Meteo Rwanda bwagiranye inama na Banki y’Isi n’abandi bafatanyabikorwa, harebwa uruhare rwa buri wese mu bijyanye n’imihandagurikire y’ikirere no kubagaragariza aho iki kigo gifite imbogamizi ngo kigere ku nshingano zacyo.

Umuyobozi w’Ishami rishinzwe gufata ibipimo, kubisesengura no kureba ko byujuje ubuziranenge muri Meteo Rwanda, Musoni Didace, yavuze ko iyo urebye u Rwanda mu karere ruherereyemo, ruri mu myanya itatu ya mbere mu kugira ibikoresho bigezweho gusa ngo n’ibihari bimaze imyaka myinshi.

Aganira na IGIHE yagize ati “Ikintu cyose iyo kimaze imyaka hari ukuntu kigenda gitakaza imbaraga, imyaka 15 ntabwo ari mike muri ibi bikoresho kuko ubundi buri myaka irindwi tuba dukwiye kubisimbuza.”

“Turagira ngo tuvugurure ibikorwa remezo bya Meteo, turifuza ko sitasiyo zizajya zipima ako kanya ibyo zibonye, ayo makuru akagera ku biro bikuru ako kanya. Turashaka ko habaho gusesengura kugira ngo dukuremo iteganyagihe rya rindi ritari butungurane. Niba imvura igiye kugwa mu kanya nko mu minota 20 bikaboneka kandi tukabikugezaho kuko nicyo kintu ubu Abanyarwanda bakeneye.”

Avuga ko “Niba tugeze kuri 80% turashaka kugera kuri 99% niko tugomba gukora ariko urumva iyo izo sitasiyo zimaze imyaka 15 biba ari ikibazo. Ikigaragara kandi ni uko gupfa kw’amasitasiyo kugenda kwiyongera, nk’ubu usanga dukoresha amafaranga menshi twohereza abatekinisiye kujya gusana icyuma cyangiritse.”

-  Meteo itewe impungenge n’uburyo ibikoresho bihenze

Musoni avuga ko ibyuma bihenze kuko nka sitasiyo imwe bifuza ya yiyindi yikoresha, ihagaze miliyoni 18 Frw mu gihe bifuza izirenga 50.

Ati “Ubwo urumva ko ari miliyoni zirenga 900 Frw kandi ubwo ni kuri sitasiyo gusa, mu gihe dushaka na za mudasobwa zisesengura ayo makuru, ibi nabyo birashaka amafaranga.”

Yongeyeho ko abaterankunga baramutse batanze inkunga ya miliyoni nka 400 Frw, iki kibazo cyakemuka.

Inzobere ishinzwe guhangana n’Ibiza muri Banki y’Isi, Makato Suwa, yabwiye IGIHE ko iyi banki yiteguye gufatanya na Meteo Rwanda, kugira ngo amakuru itanga abe yizewe kandi bifashe abagenerwabikorwa.

Yagize ati “Mu busanzwe ibikoresho bisaje muri uru rwego, abahanga bagaragaza ko ari ngombwa ko bikomeza gusimbuzwa kugira ngo bitange umusaruro mwiza.

Meteo Rwanda kugeza ubu ifite amasitasiyo 320, muri ayo hari ubwoko bufite imikorere ya automatique 156, agera ku 100 apima imvura gusa naho 56 apima ibihe bigera ku munani buri minota 10.

Umuyobozi w’Ishami rishinzwe gufata ibipimo, kubisesengura no kureba ko byujuje ubuziranenge, Musoni Didace, yavuze ko mu bikoresha bifashisha harimo ibimaze imyaka 15
Meteo Rwanda yahuye n'abafatanyabikorwa mu kiganiro cyasuzumiwemo uko yarushaho kunoza imikorere yayo
Abakozi ba Banki y'Isi bijeje gukomeza ubufatanya na Meteo Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .